وتكەن اپتادا وسكەمەنگە قازاقستان شايبالى حوككەيىنىڭ ماقتانىشى, الەم, ازيا ويىندارىنىڭ چەمپيونى ۆيتالي كولەسنيك گاگارين كۋبوگىن الىپ كەلدى. قۇرلىقتىق حوككەي ليگاسى (قحل) وسىدان 3 جىل بۇرىن گاگارين كۋبوگىن ەڭ ۇزدىك دەگەن كومانداعا تاپسىرۋ جونىندە شەشىم شىعارعان. مارتەبەلى كۋبوكتى قاتارىنان ەكى جىل تاتارستاننىڭ «اق بارس» كومانداسى يەلەنسە, وتكەن جىلى باشقۇرت اعايىنداردىڭ «سالاۆات يۋلاەۆ» كومانداسى جەڭىپ الدى. ال بۇل كوماندادا ۆ.كولەسنيكتىڭ ونەر كورسەتىپ جۇرگەنى بەلگىلى.
گاگارين كۋبوگى كۇمىستەن جاسالىپ, التىن جالاتىلعان, سالماعى 19 كيلو. كۋبوكتى وسكەمەنگە اكەلگەندەگى ماقسات – جاستار بويىندا پاتريوتتىق سەزىمدى قالىپتاستىرۋ. وسكەمەن ءبىر ماقتانسا, ءوزىنىڭ حوككەيىمەن ماقتانا الادى. قازىر قازاقستاننىڭ جۇزگە تارتا حوككەيشىلەرى شەت ەلدەر مەن كورشى رەسەيدىڭ جوعارى ليگاسى جانە قحل-دا ونەر كورسەتۋدە.
كۋبوك وتكەن بەيسەنبى كۇنى قازاقستان-امەريكا ۋنيۆەرسيتەتىنە اكەلىندى. ودان كەيىن يمپەراتور ساۋدا ۇيىندە كورەرمەندەر نازارىنا ۇسىنىلدى. شىعىس قازاقستان وبلىسىنىڭ اكىمى بەردىبەك ساپارباەۆ «ۆوستوك» ستاديونىندا ۆيتالي كولەسنيككە قۇرمەت كورسەتىپ, يىعىنا شاپان جاپتى. ول مىڭداعان جاستار الدىندا ءسوز الىپ, ەلىمىزدىڭ داڭقىن شىعارىپ جۇرگەن حوككەيشىدەن ۇلگى-ونەگە الۋ كەرەك ەكەندىگىنە نازار اۋداردى. سول كۇنى ستاديوندا اننەن شاشۋ شاشىلدى.
ۆ.كولەسنيك ءوز سوزىندە قازاقستان حوككەيىنىڭ كەلەشەكتە الەم چەمپيوناتىندا جۇلدە الۋىنا مۇمكىندىگى بار ەكەنىنە توقتالا كەتتى. ازيا ويىندارى كەزىندە استانا مەن الماتىدا جابىق ستاديوندار سالىنىپ, وندا بولاشاق چەمپيونداردىڭ جاتتىعىپ جاتقاندارىن تىلگە تيەك ەتتى.
وڭداسىن ەلۋباي, وسكەمەن. سۋرەتتى تۇسىرگەن اۆتور.
دەمەۋشىلىك دەم بەرگەن جارىس
ەلباسى نۇرسۇلتان نازارباەۆ بىلتىر جاريالاعان «جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى» اتتى جولداۋىندا «30 پايىزعا دەيىنگى قازاقستاندىقتار بۇقارالىق سپورتقا تارتىلۋ كەرەك» دەپ مىندەت قويعانى بەلگىلى. مەملەكەت باسشىسىنىڭ بۇل ويىن ىسكە اسىرۋدا وسى كۇندەرى ەلىمىزدىڭ تۇكپىر-تۇكپىرىندە سپورتتىڭ بۇقارالىعىن ارتتىرۋعا باسا نازار اۋدارىلۋدا.
قازىرگى كەزدە بارلىق اۋدانداردا سپورتتىڭ كوپتەگەن ءتۇرلەرى بويىنشا جارىستار ءجيى ۇيىمداستىرىلىپ تۇرادى. كەيدە اۋداندىق, كەيدە وبلىستىق ءباسەكەلەر وتسە, كەي كەزدەرى رەسپۋبليكالىق تۋرنيرلەردىڭ تۇساۋى كەسىلەدى. سونداي اۋدانداردىڭ ءبىرى – الماتى وبلىسىنىڭ الاكول اۋدانىنان كوپتەگەن بەلدى سپورتشىلاردىڭ شىققانىن جاقسى بىلەمىز. دزيۋدودان وليمپيا ويىندارىنىڭ جۇلدەگەرى ايدىن سماعۇلوۆ, ەركىن كۇرەستەن افينا مەن بەيجىڭ وليمپياداسىنا قاتىسۋشى, ازيا كۋبوگىنىڭ يەگەرى باۋىرجان ورازعاليەۆ, تاي-بوكستان الەم چەمپيوناتىنىڭ ەكى مارتە ءجۇلدەگەرى الماس ساقاەۆ, سامبودان الەم چەمپيوناتىنىڭ جۇلدەگەرى, ازيانىڭ ەكى دۇركىن چەمپيونى ەرلان ءتاجىكوۆ, بوكستان كسرو كۋبوگىنىڭ يەگەرى راشيد ۆاليەۆ, تانىمال جەلاياق بەكەن كۇرەڭكەەۆ سىندى ساڭلاقتاردىڭ بارلىعى دا وسى ءوڭىردىڭ ءتۇلەكتەرى.
جۋىردا اۋدان ورتالىعى – ءۇشارال قالاسىندا «الاكولدىڭ الا دوبى» اتتى ءداستۇرلى جارىستىڭ جالاۋى جەلبىرەدى. ونى باقىت كارىموۆ باسقاراتىن «Evgei LTD» كومپانياسى ۇيىمداستىردى. جالپى, بۇل ازاماتتىڭ ءمارتتىگى جايىندا ەل اراسىندا اڭگىمە كوپ. ول بيزنەستەن تۇسكەن قاراجاتىنىڭ ەداۋىر بولىگىن قايىرىمدىلىق شارالارىنا جۇمسايدى. سپورتتىق جارىستار ۇيىمداستىرىپ, دارىندى جاستارعا قامقور قولىن سوزادى. اۋدانداعى ءار باپكەر, ءار سپورتشى باكەڭە دەگەن ريزاشىلىعىن بىلدىرۋدەن جالىقپايدى. كارىموۆ تەك سپورتقا عانا ەمەس, باسقا دا سالالاردى نازارىنان تىس قالدىرمايدى. ماسەلەن, تالدىقورعان قالاسىنداعى «اينالايىن» بالالار ءۇيىن ءوز قامقورلىعىنا الىپ, قاجەتتى قۇرال-جابدىقتار, كيىم-كەشەك, جيھاز جانە دە باسقا دا زاتتار ساتىپ الىپ بەرگەن. بىلتىر ءبىر توپ ءمۇمكىندىگى شەكتەۋلى بالالاردى كولدىڭ جاعاسى مەن تاۋ بوكتەرىنە اپارىپ, 10 كۇن بويى تەگىن دەمالتتى. مىنە, بيىل ءبىز سول ابزال ازاماتتىڭ مۇرىندىق بولۋىمەن وتكەن جارىستىڭ كۋاسى بولدىق.
بۇعان دەيىن «الاكولدىڭ» الا دوبى باسەكەسى ءۇش مارتە ۇيىمداستىرىلىپ, جوعارى دەڭگەيدە وتكەن بولاتىن. وعان اۋدان اۋماعىندا ورنالاسقان كاسىپورىندار, مەملەكەتتىك مەكەمەلەر, ءاسكەري گارنيزوندار مەن اۋىل تۇرعىندارى قاتىسىپ ءجۇر. ءبىر ايتا كەتەرلىگى, جارىستىڭ جۇلدەلىك قورى دا ادام قىزىعارلىقتاي. ماسەلەن, بيىلعى دودادا باس جۇلدەنى ولجالاعان كوماندا 15 پلازمالىق تەلەديدارعا يە بولسا, ەكىنشى جانە ءۇشىنشى تۇعىرعا تابان تىرەگەندەرگە 15 شاڭسورعىش مەن 15 DVD بەرىلدى. سونداي-اق, جەكەلەگەن قاپتال بويىنشا ۇزدىك دەپ تانىلعان ويىنشىلار, سپورت ارداگەرلەرى, سپورت جاناشىلارى, وسى ءىستىڭ باسى-قاسىندا جۇرگەن باسقا دا ازاماتتاردىڭ ەڭبەگى ەسكەرۋسىز قالعان جوق. ولاردىڭ بارلىعىنا 30-عا تارتا ۇيالى تەلەفون تابىس ەتىلدى.
باسكە وسىنداي باعالى سىيلىقتار تىگىلىپ جاتسا, فۋتبول ءسۇيەر قاۋىم ايانىپ قالسىن با. بيىل جارىس جولىنا 22 كوماندا شىقتى. بارلىعى دا جاسىل الاڭدا جاقسى ويىن ورنەگىن كورسەتۋگە تىرىستى. ەكى كۇنگە سوزىلعان جارىس بارىسىندا توپتىق ءباسەكە اياقتالىپ, ءۇشىنشى كۇنى ءجۇلدەلى ورىندار ءۇشىن وتكەن باسەكەدە ءبىرىنشى ورىندى «Evgei LTD», ەكىنشى ورىندى جايپاق اۋىلى كومانداسى, ال ءۇشىنشى ورىندى بەسكول اۋىلىنىڭ كومانداسى يەلەندى.
داستان كەنجالين,
حالىقارالىق تەڭبىل دوپ ءتۋرنيرى
استانادا شانحاي ىنتىماقتاستىق ۇيىمى ەلدەرىنىڭ قۇرىلعانىنا 10 جىل تولۋىنا وراي 6-10 ماۋسىم ارالىعىندا الەم جاستارىنىڭ التى قۇراما كومانداسىنىڭ (U-19) قاتىسۋىمەن كەشە فۋتبولدان حالىقارالىق جاسوسپىرىمدەر ءتۋرنيرى باستالدى.
ءىس-شارا وتكەن جىلعى 10 قاراشاداعى «قازاقستان رەسپۋبليكاسىنىڭ شىۇ-عا توراعالىق ەتۋىنىڭ ءىس-ارەكەتتەرى باعدارلاماسىنا» سايكەس وتكىزىلۋدە. تۋرنيرگە قىتاي, رەسەي, قىرعىزستان, تاجىكستان جانە قازاقستاننىڭ ەكى قۇراما كومانداسىنىڭ جاس فۋتبولشىلارى قاتىسىپ جاتىر.