سارسەنبى كۇنى پارلامەنت ءماجىلىسىنىڭ توراعاسى ورال مۇحامەدجانوۆتىڭ جەتەكشىلىگىمەن پالاتانىڭ جالپى وتىرىسى بولىپ ءوتتى. توراعا الدىمەن ارىپتەستەرىن مامىر ايىنداعى مەيرامدارمەن قۇتتىقتادى. ول ءوز سوزىندە ءساۋىر ايىنىڭ سوڭىندا استانادا تۇركى تىلدەس ەلدەر پارلامەنتتىك اسسامبلەياسىنىڭ ەكىنشى وتىرىسى جوعارى دەڭگەيدە وتكەنىن, وندا وسى ۇيىمعا توراعالىق ەتۋ مارتەبەسى ءازىربايجاننان قازاقستانعا تابىس ەتىلگەنىن ايتتى, دەپ حابارلادى وسى پالاتانىڭ ءباسپاسوز قىزمەتى.
جالپى وتىرىستا «بەلارۋس رەسپۋبليكاسىنداعى, قازاقستان رەسپۋبليكاسىنداعى جانە رەسەي فەدەراتسياسىنداعى تەحنيكالىق رەتتەۋدىڭ بىرىڭعاي قاعيداتتارى مەن قاعيدالارى تۋرالى كەلىسىمدى راتيفيكاتسيالاۋ تۋرالى» زاڭ جوباسى تالقىعا سالىندى. بۇل زاڭ جوباسى بويىنشا يندۋستريا جانە جاڭا تەحنولوگيالار ءبىرىنشى ۆيتسە-ءمينيسترى البەرت راۋ بايانداما جاسادى. تالقىلاۋدان كەيىن زاڭ جوباسى ماقۇلداندى.
كەلەسى كەزەكتە «تاريفتىك ساياسات نەگىزدەرىن قوسا العاندا, تەمىر جول كولىگىنىڭ قىزمەتتەرىنە قول جەتكىزۋدى رەتتەۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى قارالىپ, ول بويىنشا كولىك جانە كوممۋنيكاتسيا ءمينيسترىنىڭ ورىنباسارى ازات بەكتۇروۆ بايانداما جاسادى. بۇل زاڭ جوباسى بويىنشا ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەسى ساعىنبەك تۇرسىنوۆ قوسىمشا بايانداما جاسادى. تاريفتىك ساياسات نەگىزدەرىن قوسا العاندا, تەمىر جول كولىگىنىڭ قىزمەتتەرىنە قول جەتكىزۋدى رەتتەۋ تۋرالى كەلىسىم 2010 جىلى 9 جەلتوقساندا ءماسكەۋدە بەلارۋس رەسپۋبليكاسى, قازاقستان رەسپۋبليكاسى جانە رەسەي فەدەراتسياسى ۇكىمەتتەرىنىڭ اراسىندا جاسالدى. زاڭ جوباسى تالقىلاۋدان ءوتىپ, تولىقتاي ماقۇلداندى.
ءماجىلىستىڭ جالپى وتىرىسىندا «مۇناي ونiمدەرiنiڭ جەكەلەگەن تۇرلەرiن ءوندiرۋدi جانە ولاردىڭ اينالىمىن مەملەكەتتiك رەتتەۋ تۋرالى», «تابيعي مونوپوليالار جانە رەتتەلەتىن نارىقتار تۋرالى» قازاقستان رەسپۋبليكاسىنىڭ زاڭىنا وزگەرىس پەن تولىقتىرۋلار ەنگىزۋ تۋرالى» زاڭ جوبالارى دەپۋتاتتاردىڭ تالقىسىنا شىعارىلدى. وسى ەكى زاڭ جوباسى بويىنشا مۇناي جانە گاز ءمينيسترى ساۋات مىڭباەۆ تۇسىنىك بەردى. بۇل زاڭ جوبالارى بويىنشا ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى ەرجان راحمەتوۆ قوسىمشا بايانداما جاسادى.
پارلامەنت ءماجىلىسىنىڭ بارلىق كوميتەتتەرى العاشقى زاڭ جوباسى بويىنشا وڭ قورىتىندىلار بەردى. جۇمىس توبىنا 230-دان استام تۇزەتۋ كەلىپ ءتۇستى, ولار مۇناي ونiمدەرiن ءوندiرۋ جانە ولاردىڭ اينالىمى سالاسىنداعى مۇددەلى مينيسترلىكتەر مەن ۆەدومستۆولار, قوعامدىق بىرلەستىكتەر مەن ۇيىمدار وكىلدەرىنىڭ قاتىسۋىمەن جۇمىس توبىنىڭ جيىرما سەگىز وتىرىسىندا جانە كوميتەتتىڭ كەڭەيتىلگەن وتىرىسىندا جان-جاقتى قارالىپ, قورىتىندى سالىستىرما كەستەدە كورسەتىلدى.
س.مىڭباەۆتىڭ سوزىنە قاراعاندا, ەلىمىزدە كوپ تۇتىنىلاتىن اي 92, 93, 95 ماركالى بەنزين ءوندىرۋدە ازىرشە رەسەيگە تاۋەلدىلىك بار. قازاقستاندا بۇگىندە اتالعان ماركالارداعى 13 ميلليون توننا بەنزين شىعارىلادى. اتىراۋ, شىمكەنت جانە پاۆلودار ءموز-دەرىن جاڭعىرتۋ ۇدەرىستەرى اياقتالاتىن 2015 جىلى بۇل كورسەتكىش 17 ميلليون تونناعا ۇلعاياتىن كورىنەدى. كەيىنگى جىلدارى اتالعان بەنزين كولەمى دە جەتكىلىكسىز بولادى. سوندىقتان 2020 جىلعا قاراي ەلىمىزدە ءتورتىنشى ءموز سالۋ جۇمىسى قولعا الىنادى ەكەن.
ال «تابيعي مونوپوليالار جانە رەتتەلەتىن نارىقتار تۋرالى» قازاقستان رەسپۋبليكاسىنىڭ زاڭىنا وزگەرىس پەن تولىقتىرۋلار ەنگىزۋ تۋرالى» زاڭ جوباسىنىڭ نەگىزگى ماقساتى ماڭىزدى الەۋمەتتىك ءمانى بار, سونداي-اق ەل ەكونوميكاسىنا ەلەۋلى اسەر ەتەتىن ءونىمگە, تاۋارلارعا جانە كورسەتىلەتىن قىزمەتتەرگە باعالاردى مەملەكەتتىك رەتتەۋ تەتىگىن ەنگىزۋ بولىپ تابىلادى. زاڭ جوباسىمەن جۇمىس بارىسىندا جۇمىس توبى تابيعي مونوپوليالار سالالارىندا جانە رەتتەلەتىن نارىقتاردا باسشىلىقتى جۇزەگە اسىراتىن ۋاكىلەتتى ورگاننىڭ قۇزىرەتىن ناقتىلاۋ بولىگىندە تۇزەتۋلەر ەنگىزدى. پارلامەنتى ءماجىلىسىنىڭ بارلىق كوميتەتى زاڭ جوباسى بويىنشا وڭ قورىتىندىلار بەردى.
تالقىلاۋلاردان كەيىن ەكى زاڭ جوباسى دا تولىقتاي ماقۇلداندى. سونىمەن بىرگە, ۇكىمەتتەن كەلىپ ءتۇسكەن جاڭا زاڭ جوبالارىنا قورىتىندى ازىرلەۋ ۋاقىتتارىن ناقتىلاۋ بويىنشا شەشىم شىعارىلدى.