ۇلى جەڭىس مەيرامى قارساڭىندا ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ قارجى پوليتسياسى اكادەمياسىندا ۇلى وتان سوعىسىنىڭ ارداگەرلەرىمەن سىندارلى كەزدەسۋ بولىپ ءوتتى. سۇم سوعىستىڭ زوبالاڭىن كورىپ, ءولىم مەن ءومىر ايقاسقان قان مايداندا قاسىق قانى قالعانشا جاۋمەن شايقاسقان جاۋجۇرەك جانداردىڭ جارالى جۇرەكتەرىنەن جىلدار جىلجىعان سوڭ اقتارىلعان سىرلارىن اكادەميانىڭ پروفەسسورلىق-وقىتۋشىلار قۇرامى مەن تىڭداۋشىلارى زەيىن قويا تىڭدادى.
– سوعىستىڭ سالعان زارداپتارىن كەيىنگى ۇرپاق ۇمىتپاۋعا ءتيىس, – دەدى جينالعاندار الدىندا ءسوز سويلەگەن قارجى اكادەمياسىنىڭ باستىعى پولكوۆنيك مارات ءباشىموۆ. بۇگىندە ۇلى جەڭىسكە 66 جىل تولىپ وتىر. وسىعان وراي ءبىز ارداگەرلەردى شاقىرىپ, تىڭداۋشىلارمەن كەزدەستىرىپ, ولارعا سوعىستىڭ قانداي سويقان اكەلەتىنىن جانە ەل, جەر ءۇشىن جان اياماي جاۋمەن شايقاسا ءبىلۋ كەرەكتىگىن مايداندا بولعان وتان قورعاۋشىلاردىڭ ءوز اۋزىنان ەستىرتىپ وتىرمىز. بۇل ارداگەرلەر قاتارى كۇننەن-كۇنگە سيرەپ بارا جاتقان ۋاقىتتا وتە قاجەتتى ءىس. ونىڭ جاستار ءۇشىن تاربيەلىك ءمانى زور.
مۇنان كەيىن ءسوز العان اۋعاندىق ارداگەرلەر وداعىنىڭ توراعاسى, «نۇر وتان» حدپ ساياسي كەڭەسىنىڭ مۇشەسى ش.وتەگەنوۆ, ۇلى وتان سوعىسىنىڭ ارداگەرى ب.گالچەنكو جانە تىل ارداگەرى د.سۋحونوسەنكولار اكادەميا تىڭداۋشىلارىنا ءوز جۇرەكجاردى تىلەكتەرىن جەتكىزدى. قازاقستان جەرىندە ۇلتتار دوستىعى نىعايىپ, شىنايى بىرلىك پەن بەيبىت تىرلىك جالعاسىن تابا بەرسىن دەدى. ولار قازىرگى الەمدە بەدەلى وراسان ارتقان ەلىمىزدىڭ ودان ءارى دامي ءتۇسۋى ءۇشىن جانە تىنىشتىق پەن ىنتىماقتىڭ ساقتالۋىنا ءالى دە ءوز ۇلەستەرىن قوسۋعا دايار ەكەنىن ءبىلدىردى.
وقالى كيىمدەگى سىپتاي تارتىلعان تىڭداۋشىلار ساپ تۇزەپ, سوعىس جىلدارىندا جاۋىنگەرلەردىڭ جۇرەگىنە جىلىلىق ۇيالاتقان اسەم اندەردى جاستىقتىڭ جالىندى جىگەرىمەن شىرقاي الدارىنان وتكەندە ارداگەرلەر وزدەرى دە مايدانعا اتتاناردا تاپ وسىنداي تەپسە تەمىر ۇزەتىن قالىپتا بولعاندارى ەلەستەپ, سولعىن جانارلارىنا جان ءبىتىپ, كىرپىكتەرىنە تامشى ءىلىندى. ولارعا بۇگىنگى ەل قورعايتىن جاڭا ۇرپاق لەگى ىزەت ءبىلدىرىپ, قۇرمەت كورسەتتى. اعا ۇرپاقتىڭ ەل شەتىنە تونگەن قيىن-قىستاۋ كەزىندە اسقان ەرلىك كورسەتكەنىن ولار ەندى جاقسى تۇسىنەدى. ال ارداگەرلەر دە سوعىستا قىرشىن بولعانداردىڭ ۇمىتىلمايتىندىعىن ءبىلدىرىپ, داڭق ەسكەرتكىشىنە گۇل شوقتارىن قويىپ, باس ءيدى. ءسويتىپ, 9 مامىر – جەڭىس كۇنىنە ارنالعان «جەلبىرە, جەڭىس جالاۋى» اتتى سالتانتتى شارانىڭ سوڭى بي مەن سازدى اۋەنگە ۇلاستى.
الەكساندر تاسبولاتوۆ.