بيىل «كورەيانىڭ قازاقستانداعى جىلىنا» وراي, اتالعان ەلدىڭ مادەنيەت, سپورت جانە تۋريزم ءبىرىنشى ۆيتسە-ءمينيسترى مو چحول-مين باستاعان دەلەگاتسيانىڭ استاناعا ارنايى كەلگەنىن بۇعان دەيىن حابارلاعان بولاتىنبىز. «كورەيانىڭ قازاقستانداعى اپتالىعى» فەستيۆالىنە قاتىسۋ ءۇشىن ات ارىتىپ جەتكەن قوناقتاردىڭ اراسىندا كورەيانىڭ بەلگىلى ونەر ادامدارى مەن ۇجىمدارى بار ەكەنىن دە ايتقان ەدىك. سولاردىڭ ءبىرى «حانزادا جۋمونگ» سەريالى ارقىلى كوپتىڭ ىقالاسى مەن قوشەمەتىنە بولەنگەن بەلگىلى اكتەر سون يل-گۋك. استانادا كورەيا دەلەگاتسياسىمەن بولعان ءباسپاسوز ءماسليحاتىنان كەيىن وڭتۇستىككورەيالىق اكتەرمەن اڭگىمەلەسۋدىڭ ءساتى تۇسكەن ەدى.
– ءسىز بالا كەزىڭىزدە اكتەر بولعىڭىز كەلمەپتى. الايدا, ۋاقىت وتە كەلە وسى جولدى تاڭداپسىز. نەگە؟
– ءيا, مەن بالا كەزىمدە ديزاينەر بولۋدى ارماندادىم. الايدا, سول ماماندىق بويىنشا ۋنيۆەرسيتەتكە وقۋعا تۇسە المادىم. سوسىن مەنىڭ تانىستارىم باسقا كاسىپتى تاڭداۋعا كەڭەس بەردى. ماسەلەن, ساحناداعى ونەرگە بايلانىستى. ال ساحناداعى ونەر اكتەرلىك ماماندىققا تىكەلەي قاتىستى ەكەنىن بىلەسىز. سول سەبەپتى, مەن اقىر سوڭىندا تەاتر فاكۋلتەتىنە وقۋعا ءتۇستىم. مىنە, مەنىڭ اكتەرلىك جولىم وسىلاي باستالدى.
– كوپشىلىككە تانىس «تەڭىز ءامىرشىسى» سەريالىنان كەيىن بارىپ, «حانزادا جۋمونگ» سەريالىنا شاقىرتۋ الىپسىز. ياعني, اۋەلى «تەڭىز ءامىرشىسى» سەريالى ارقىلى تانىمال بولعان ەكەنسىز. بۇل سەريالعا تۇسۋگە قالاي كەلدىڭىز؟
– جالپى العاندا, مەنىڭ «تەڭىز ءامىرشىسى» دەگەن سەريال ارقىلى تانىمال بولا باستاعانىم راس. سول كەزدە وتباسىمىزدا دا ءتۇرلى قيىنشىلىقتار بولعان ەدى. وسى سەريالدان كەيىن ماتەريالدىق جاعدايىمىز دا ءتۇزەلدى. سوندىقتان, «تەڭىز ءامىرشىسى» دەگەن سەريال مەن ءۇشىن ىستىق. «تەڭىز ءامىرشىسى» سەريالىنداعى حە ءشيننىڭ رولىندە باستاپقىدا باسقا اكتەر ويناۋى كەرەك بولاتىن. الايدا, ول اكتەردىڭ باسىنداعى بەلگىلى ءبىر جاعداي مەن سەبەپكە بايلانىستى مەنى شاقىرتتى. ءوزىڭىز بىلەتىن شىعارسىز, بۇل سەريالداعى حە شين – جاعىمسىز كەيىپكەر. ونىڭ ۇستىنە ول سەريالداعى باستى كەيىپكەر ەمەس. الايدا, سوعان قاراماستان, مەنى كورەرمەندەردىڭ باسىم كوپشىلىگى جاقسى كورىپ كەتتى. نەگىزىنەن مەن كوبىنەسە جاعىمسىز كەيىپكەرلەردىڭ رولىندە كوبىرەك ويناپپىن.
– ال «حانزادا جۋمونگ» سەريالىنا تۇسۋگە ارنايى ۇسىنىس ءبىلدىرىلدى مە؟
– تاريحتا حانزادا جۋمونگ – جان-جاققا تاراپ, بىتىراپ كەتكەن تايپالاردىڭ باسىن قوسىپ, ادامداردىڭ جۇرەگىنە ءۇمىت وتىن ۇيالاتقان, ءسويتىپ, ۇلى كوگۋرە, ياعني كورەيا مەملەكەتىنىڭ نەگىزىن قالاعان بەلگىلى تۇلعا. سوندىقتان, سەريالعا تۇسۋگە ۇسىنىس تۇسكەندە قاتتى قۋاندىم. ۇسىنىستى بىردەن قابىلدادىم.
– قازىرگى تاڭدا قانداي كينولارعا ءتۇسىپ ءجۇرسىز؟ تەاتر ساحناسىندا دا وينايسىز با؟
– جاقىندا عانا ءبىر كريمينالدىق سەريالدىڭ ءتۇسىرىلىمى اياقتالدى. ال مامىردىڭ ورتاسىنا قاراي, ءبىر سپەكتاكلدە ويناماقپىن. بۇل سپەكتاكل كورەيانىڭ تاۋەلسىزدىگى جولىندا كۇرەسكەن ءبىر قايراتكەردىڭ باسىنان كەشكەندەرى تۋرالى. بۇدان كەيىن دە بىرقاتار كينولارعا ءتۇسۋدى كوزدەپ وتىرمىن. ول كينولاردىڭ اتاۋلارى قانداي ەكەنىن ازىرگە ايتا المايمىن.
– كورەيا كينويندۋسترياسىنىڭ وزىنە ءتان وزگەشەلىگى مەن كينو ءتۇسىرۋ ۇدەرىسىندەگى ەرەكشەلىگى تۋرالى نە ايتاسىز؟
– مەنىڭ بىلەتىنىم, جاپونيا مەن امەريكادا ادەتتە كينونى تۇتاستاي تۇسىرەدى, سوسىن مونتاجدايدى. ەكرانعا سودان كەيىن جىبەرەدى. ال كورەيادا سەريالدىڭ الدىمەن 20-30 پايىزى تۇسىرىلەدى. مونتاجدالادى. ەكرانعا جىبەرىلەدى. ءبىز سول ارقىلى كورەرمەننىڭ «رەاكتسياسىن» بايقايمىز. سەريالدىڭ قالعان بولىگىندە كورەرمەننىڭ كوزقاراسىنا قاراپ وتىرىپ, كينوعا وزگەرىس ەنگىزەمىز. كورەيا كينولارىنىڭ قازاقستاندا كەڭىنەن تانىمال بولۋىنىڭ سىرى وسىندا جاتسا كەرەك. مەنىڭشە, ءبىزدىڭ سەريالدارىمىزدىڭ باستى ارتىقشىلىعى وسى. ەكىنشىدەن, كورەي سەريالدارى كوبىنەسە جەكە كاپيتال قاراجاتىنا تۇسىرىلەدى. مەملەكەتتىك بيۋدجەت قاراجاتىمەن تۇسىرىلەتىن سەريالدار از.
– ال ءوزىڭىز پروديۋسەر بولىپ, كينو ءتۇسىرۋ ويىڭىزدا جوق پا؟
– جوق. مەن اكتەرمىن.
– بولاشاقتا قازاقستانمەن بىرلەسكەن كينوعا ءتۇسۋ ويىڭىزدا بار ما؟
– ارينە, ەگەر مۇمكىندىك بولىپ جاتسا, قۋانا-قۋانا تۇسەر ەدىم.
– ءسىز ءوزىڭىزدىڭ جاسىڭىزدان اناعۇرلىم جاس كورىنەسىز. ءوزىڭىزدىڭ كەسكىن-كەلبەتىڭىزدى, سىرتقى ءپىشىنىڭىزدى جاقسى ساقتاپ تۇرۋ ءۇشىن نە ىستەيسىز؟ ماماندىعىڭىز دا كۇردەلى عوي.
– ەڭ الدىمەن, الكوگولدىك ءىشىمدىكتەردى ىشپەيمىن. تەمەكى شەكپەيمىن. مەنىڭ سىرتقى ءپىشىنىمنىڭ جاستىعى سالاماتتى ءومىر سالتىن ۇستانۋىمنان عوي دەپ ويلايمىن. ەكىنشىدەن, مەن كوكونىس ونىمدەرى مەن جەمىس-جيدەكتەردى عانا جەيمىن. ال ەت ونىمدەرىن جەمەيمىن. 10 جىلدىڭ ءجۇزى بولدى. وسىدان بىرەر كۇن بۇرىن ماعان كاۋاپ ازىرلەپ قويىپتى. الگىنى كورىپ, قاتتى جەگىم كەلگەنى-اي. ءۇشىنشىدەن, مەن سپورتپەن شۇعىلدانعاندى جاقسى كورەمىن. ونىڭ ىشىندە ترياتلوندى ۇناتامىن. ءتورتىنشىدەن, ءاردايىم تەك جاقسى نارسەلەر تۋرالى ويلاۋعا تىرىسامىن. ءبىر سوزبەن ايتقاندا, ءوپتيميسپىن.
– استاناعا كەلگەندە 500-گە تارتا كورەرمەنىڭىزبەن كەزدەسىپ, ولارعا قولتاڭبا بەرگەنىڭىزدى بىلەمىز. ءوزىڭىزدىڭ قازاقستاندا تانىمال ەكەنىڭىزدى بىلگەندە قانداي سەزىمدە بولدىڭىز؟
– مەنى جاقسى كورەدى ەكەن. ءتىپتى مەن ويلاعاننان دا اسىپ ءتۇستى. وتكەن جىلى قازاقستان پرەزيدەنتى نۇرسۇلتان نازارباەۆتىڭ كورەياعا جاساعان ساپارىنا ورايلاستىرىلعان قابىلداۋدا بولدىم. بۇل – اكتەر ءۇشىن قۇرمەت. سەبەبى, اكتەر كوپشىلىك اراسىندا تانىمال بولماسا, ونى مۇنداي قابىلداۋلارعا شاقىرمايدى عوي. سول كەزدە مەن قازاقستان جۇرتىنىڭ ماعان دەگەن ىقىلاسى جاقسى ەكەنىن ەستىپ قالعان ەدىم. ال استاناعا كەلگەندە كورەرمەننىڭ ماعان دەگەن ىقىلاسىنىڭ شىنايى ەكەنىنە كوزىم جەتتى. استانانىڭ بازارىنا بارعاندا دا وسىنداي ىقىلاستى بايقادىم. مەنى بىردەن تانىپ, «جۋمونگ, جۋمونگ» دەپ جاتقاندارى دا بولدى. مەندە باسىندا بازارعا بارۋ دەگەن وي بولماعان ەدى. الايدا, بازاردىڭ جانىنان ءوتىپ بارا جاتىپ, نەشە ءتۇرلى كوز تارتار كوكونىس پەن جەمىس-جيدەكتەردى كورىپ, ەرىكسىز ايالدادىم.
تاعى ءبىر ايتاتىنىم, مەنىڭ كورەيادا ءبىر دوسىم بار. قازاقستاننان. ەسىمى – ايگەرىم ايداروۆا. ول مەنى قازاقستان پرەزيدەنتىمەن كەزدەسۋ كەزىندە قازاق تىلىندە سالەمدەسۋدى ۇيرەتتى. سونداي-اق, قازاق جەرىنە بارعاندا ورىس تىلىندە ەمەس, قازاق تىلىندە سويلەۋگە كەڭەس بەردى. سوندىقتان, مەن قازاق ءتىلىن ازداپ ۇيرەنىپ ءجۇرمىن.
– ءسىزدىڭ زايىبىڭىز سۋديا ەكەن. ونەر ادامى مەن سۋديا قالاي كەزدەسىپ ءجۇر؟ وتباسىڭىزدىڭ قانداي بولعانىن قالايسىز؟
– ءبىزدى ءسىز سەكىلدى جۋرناليستەر تانىستىردى. سودان كەيىن ەكەۋمىز كەزدەسىپ جۇردىك. كەيىن, ءبىر جارىم جىلدان كەيىن ۇيلەندىك. ارينە, مەن بالالارىمنىڭ كوپ بولعانىن قالايمىن. بىراق ازىرگە بالامىز جوق.
– ەستۋىمشە, ءسىزدىڭ ارعى اتاڭىز گەنەرال بولىپتى. مۇنىڭ ءسىزدىڭ ومىرىڭىزگە قانداي دا ءبىر اسەرى بولدى ما؟
– ءيا, مەنىڭ اتام – كورەيا تاريحىنداعى بەلگىلى ادام. حح عاسىردىڭ باسىنداعى تاۋەلسىزدىك جولىنداعى قوزعالىستىڭ باسىندا تۇرعان, جاپون باسقىنشىلارىنا قارسى كۇرەسكەن گەنەرال كيم چجا ءچجيننىڭ شوبەرەسىمىن. ول تۋرالى دەرەكتى فيلمدەر ءتۇسىرىلگەن, تاريح ءپانى وقۋلىقتارىندا دا ۇلى اتام تۋرالى ءمالىمەتتەر كەزدەسەدى. ال انام اكتريسا بولعان. قازىر ساياساتپەن اينالىسادى. دەپۋتات. ال جالپى العاندا, تەكتى تۇلعانىڭ ۇرپاعى بولۋ, تاريحتا اتى قالعان جاننىڭ شوبەرەسى بولۋ ماعان ۇلكەن جاۋاپكەرشىلىك جۇكتەيدى.
اڭگىمەلەسكەن ءلايلا ەدىلقىزى.