كەشە تاۋەلسىزدىك سارايىندا 2011 جىلعى ازيا-تىنىق مۇحيتى وڭىرىندەگى ەكونوميكالىق جانە الەۋمەتتىك جاعدايعا جاسالعان شولۋدىڭ تۇساۋكەسەرىنە ارنالعان ءباسپاسوز ءماسليحاتى بولىپ ءوتتى. وعان پرەمەر-مينيستر كارىم ءماسىموۆ, بىرىككەن ۇلتتار ۇيىمى باس حاتشىسىنىڭ ورىنباسارى, ازيا-تىنىق مۇحيتى بويىنشا ەكونوميكالىق جانە الەۋمەتتىك كوميسسيانىڭ (ەسكاتو) اتقارۋشى حاتشىسى نوەلين حەيزەر قاتىستى.
– 2011 جىلى ازيا-تىنىق مۇحيتى وڭىرىندەگى دامۋشى ەلدەردىڭ ەكونوميكاسى 7,3 پايىزعا وسەدى, – دەدى باسقوسۋدا بۇۇ باس حاتشىسىنىڭ ورىنباسارى ن.حەيزەر. سونداي-اق ول اتالعان ءوڭىردىڭ 2008-2009 جىلعى داعدارىستان كەيىن وتكەن جىلدان باستاپ جەدەل قالپىنا كەلە باستاعانىن تىلگە تيەك ەتە كەلە, 2010 جىلى بۇل ايماقتىڭ ەكونوميكاسى 8,8 پايىزعا دامىعانىن ايتتى. سونىمەن بىرگە وڭىردەگى دامۋشى ءىرى مەملەكەتتەردىڭ ەكونوميكاسى قارقىندى ىلگەرىلەي بەرمەك. ولاردىڭ ىشىندە قىتاي – 9,5 پايىزعا, ال ءۇندىستان – 8,7, يندونەزيا 6,5 پايىزعا وسەدى دەپ كۇتىلۋدە.
جالپى العاندا, بيىلعى جىلداعى دامۋ كەڭ اۋقىمدا قالىپتاسپاق. شىعىس جانە سولتۇستىك- شىعىس ازياداعى ءوسىم – 7,9 پايىزدى, سولتۇستىك جانە ورتالىق ازيا – 4,8, وڭتۇستىك جانە ءوڭتۇستىك-باتىس ازيا – 6,8, وڭتۇستىك-شىعىس ازيا – 5,5 جانە تىنىق مۇحيتى ارالدارىنداعى دامۋشى ەلدەردىڭ ەكونوميكاسىنىڭ ءوسىمى 5,5 پايىزدى قۇراماق.
«الدىڭعى جىلى 1,2 پايىز كولەمىندەگى وسىمنەن سوڭ قازاقستان ەكونوميكاسى وتكەن جىلى جىلدام, ياعني شامامەن 7 پايىزعا وسكەن. ءبىزدىڭ بولجام بويىنشا 2011 جىلى 6,2 پايىزعا ارتادى», – دەدى ن.حەيزەر. ساراپشىنىڭ پايىمداۋىنشا, قازاقستان ۇكىمەتىنىڭ بانك سەكتورىن تۇراقتاندىرۋ ارقىلى ەكونوميكانى تۇراقتاندىرۋ شارالارى ماڭىزدى قادام بولعان. دۇنيە جۇزىندەگى مۇناي جانە وزگە دە مينەرالدى شيكىزاتتارعا سۇرانىستىڭ ارتۋى 2010 جىلى ءوندىرىس قارقىنىنىڭ وسۋىنە سەبەپ بولعان. ايتسە دە, ەلىمىزدە اۋىل شارۋاشىلىعى ايتارلىقتاي تومەندەگەن. ويتكەنى, استىق شىعىمىنا وتكەن جىلعى قۇرعاقشىلىق اسەر ەتكەن.
باسقوسۋ سوڭىندا ۇكىمەت باسشىسى كارىم ءماسىموۆ حالىقارالىق ىنتىماقتاستىق بويىنشا ەسكاتو-عا قاتىسۋشى ەلدەرمەن ىقپالداستىققا باسا نازار اۋدارىلىپ وتىرعانىن ايتا كەلە, ەلىمىز بۇۇ-نىڭ ازيا-تىنىق مۇحيتى ءوڭىرى بويىنشا ەكونوميكالىق جانە الەۋمەتتىك كوميسسياسىمەن, بىرىككەن ۇلتتار ۇيىمىنىڭ وزگە دە اگەنتتىكتەرىمەن تىعىز ىنتىماقتاستىقتى ءارى قاراي جالعاستىرۋى كەرەكتىگىن دە نازاردان تىس قالدىرمادى. ول قازاقستاننىڭ داعدارىستان كەيىن دامۋى ۇكىمەتتىڭ داعدارىستى ەڭسەرۋ باعىتىنداعى شارالاردى جىلدام اتقارۋىنا بايلانىستى بولعانىن دا العا تارتتى. سونداي-اق, پرەمەر-مينيستر حالىقارالىق باسەكەلەستىك قاتاڭ تالاپتار بويىنشا ىسكە اسىرىلاتىنىن جانە وسىعان وراي يننوۆاتسيالاردى يگەرۋدىڭ ماڭىزدىلىعى بۇرىنعىدان دا ارتىپ وتىرعانىن قاپەرگە سالدى.
ءابدىراحمان قىدىربەك.