اتىراۋ وبلىسى بويىنشا باس مەملەكەتتىك ەكولوگيالىق ينسپەكتورى قانات قالمۇقاننىڭ ايتۋىنشا, اتالعان مۇناي كومپانياسى تەڭىز كەن ورنىندا ەكولوگيالىق رۇقساتسىز 33 ملن كۋبومەتردەن استام گاز جاققان. سول ءۇشىن 4 ملرد 845 ملن تەڭگە ايىپپۇل سالىندى. ال كەن ورنى ورنالاسقان جىلىوي اۋدانىنىڭ تۇرعىندارى ەكولوگيالىق احۋالدىڭ جىل ساناپ ناشارلاپ بارا جاتقانىنا الاڭداۋلى. «تەڭىزشەۆرويل» كومپانياسىنىڭ ۇكىمەتپەن جانە بۇقارامەن بايلانىس ءبولىمىنىڭ باس مەنەدجەرى رزابەك ارتىعاليەۆ ەلەكتر ەنەرگياسى وشكەن نەمەسە باسقا دا وندىرىستىك اقاۋلار بولعان كەزدە ۋلى گازداردىڭ اۋاعا تارالماۋى ءۇشىن زاۋىتتاعى قوندىرعىنى وزگەرتەمىز دەيدى. سونداي-اق, ەكىنشى بۋىن زاۋىتىندا كومىرسۋتەگىلەردىڭ درەناج جۇيەسى الماستىرىلادى. تابيعات قورعاۋ شارالارىنا قىرۋار قارجى قارالعانىمەن, ناتيجە ءالى از.
اۋا لاستاۋدان وڭىردەگى باسقا دا ءىرى كاسىپورىندار قالىسار ەمەس. وتكەن جىلدىڭ وزىندە اتىراۋلىق ەكولوگتار 30 اپاتتى جاعدايدى انىقتاعان. ىلەسپە گازدى الاۋ ارقىلى جاعۋ فاكتىلەرى «ەمبىمۇنايگاز» كومپانياسى مەن «بولاشاق» زاۋىتىندا دا تىركەلدى. اۋانى ءبۇلدىرىپ, سول ءۇشىن ايىپپۇل تولەپ قاراپ وتىرۋ ادەتكە اينالىپ بارادى.
باقىتگۇل باباش,
«ەگەمەن قازاقستان».
اتىراۋ