ەندى قازاقستاندىقتاردىڭ دايىن قۇجاتتاردى الۋ ءۇشىن حقكو-عا بارۋدىڭ قاجەتى جوق, كەز كەلگەن كورسەتىلگەن ورىنعا, ءۇي بولسىن, كەڭسە بولسىن, كۋرەر جەتكىزىپ بەرەتىن بولادى, دەپ حابارلادى «ازاماتتارعا ارنالعان ۇكىمەت» مەملەكەتتىك كورپوراتسياسى» كوممەرتسيالىق ەمەس اكتسيونەرلىك قوعامى ءباسپاسوز قىزمەتى.
بۇل سەرۆيستى پايدالانۋ ءۇشىن تۇتىنۋشى قىزمەت الۋعا قاجەتتى تولىق قۇجاتتار پاكەتىن حقكو ينسپەكتورىنا وتكىزەدى جانە دايىن قۇجاتتاردى جەتكىزىپ بەرۋ جونىندەگى ءوتىنىمدى تولتىرۋ ءۇشىن حقكو عيماراتىندا ورنالاسقان «قازپوشتا» اق قىزمەتكەرلەرىنە جۇگىنەدى. قۇجاتتاردى جەتكىزىپ بەرۋ قىزمەتى جەكە جانە زاڭدى تۇلعالارعا كوممەرتسيالىق نەگىزدە كورسەتىلەدى.
ۇيگە جەتكىزىپ بەرۋ باعاسى قىزمەت كورسەتىلەتىن ايماققا جانە سوڭعى جەتكىزىلىم مەكەنجايىنا بايلانىستى بولادى. جەتكىزىلىم جايلى اقپاراتتى بەرىلگەن ترەك-ءنومىرى بويىنشا post.kz سايتىنان قاداعالاپ وتىرۋعا بولادى. قىزمەتتىڭ ەڭ تومەنگى قۇنى – 500 تەڭگە. قىزمەت الۋشى جەتكىزىلىم تولەمىن دايىن قۇجاتتاردى العاننان كەيىن جۇرگىزەدى.
«ازاماتتارعا ارنالعان ۇكىمەت» مەملەكەتتىك كورپوراتسياسى» كە اق باسقارما توراعاسى ابىلايحان وسپانوۆتىڭ ايتۋىنشا, جاڭا قىزمەت حقكو-عا كەلۋگە ۋاقىتى تاپشى جاندارعا ارنالعان.
قازىرگى ۋاقىتتا قىزمەتتەردى اۆتوماتتاندىرۋ جۇمىستارى بەلسەندى تۇردە ءجۇرىپ جاتىر. كوپتەگەن قازاقستاندىقتار قىزمەتتى ەلەكتروندىق ۇكىمەت پورتالىنىڭ كومەگى ارقىلى ۇيدەن شىقپاي-اق الادى.