قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىندە سىبايلاس جەمقورلىق قۇقىق بۇزۋشىلىقتاردىڭ سەبەپتەرى مەن جاعدايلارىن ازايتۋ مەن جويۋ جۇمىستارىنىڭ قورىتىندىسىنا ارنالعان جيىن ءوتتى. «قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەن «اتامەكەن» ۇلتتىق كاسىپكەرلەر پالاتاسى اراسىندا جول كارتاسى بەكىتىلدى. بۇل كارتانىڭ باستى ماقساتى – سىبايلاس جەمقورلىقتىڭ كولەمىن ازايتۋ, الدىن الۋ, سەبەپتەرى مەن سالدارلارىن جويۋ. وسىعان وراي 16 سالانى تەكسەرۋدى جوسپارلادىق. ەڭ الدىمەن دەنساۋلىق ساقتاۋ سالاسى تەكسەرىلدى. وسى سالادا نورماتيۆتىك-قۇقىقتىق اكتىلەردىڭ سايكەستىگىن تەكسەرۋ, ورىنداۋشىلىق-باسقارۋ جۇمىستارىن, مەملەكەتتىك قىزمەت كورسەتۋ, كادر ساياساتىن جۇرگىزۋ ماسەلەلەرى نازارعا الدىندى», – دەپ ءتۇسىندىرىپ ءوتتى, دەپ جازادى palata.kz.
قر مەملەكەتتىك قىزمەت جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك شپەكباەۆ. اگەنتتىك توراعاسىنىڭ ورىنباسارى دەنساۋلىق ساقتاۋ سالاسىنداعى بىرقاتار ماسەلەلەردى كوتەرىپ, مالىمەتتەردى كەلتىردى. مەديتسينالىق قىزمەت كورسەتۋ ساپاسىن ارتتىرۋ مەملەكەتتىڭ ساياساتىنىڭ نەگىزگى باعىتتارىنىڭ ءبىرى. اتالعان سالانىڭ قارجىلاندىرۋ سوڭعى 10 جىلدا 5 ەسەدەن استام وسكەن. 2005 جىلى 191 ملرد تەڭگە بولىنسە, بۇل سوما 2016 جىلى 1 ترلن-عا ارتقان. دەگەنمەن, دۇنيەجۇزىلىك دەنساۋلىق ساقتاۋ ۇيىمىنىڭ حالىقارالىق رەيتينگىندە قازاقستان 145 ەلدىڭ اراسىندا 111-ورىندا. 2016 جىلى 80 لاۋازىمدى تۇلعاعا قاتىستى 200-دەن استام سىبايلاس جەمقورلىق قىلمىسى تىركەلگەن, 22-ءسى سوتتالعان.
«اتامەكەن» ۇكپ باسقارما توراعاسىنىڭ ورىنباسارى رۋستام ءجۇرسىنوۆ «سك-فورماتسيا» بىرىڭعاي ديستريبيۋتەرىنىڭ جۇمىسىنا توقتالىپ, جىل سوڭىنا دەيىن ءاربىر سالا بويىنشا تالقىلاۋ وتەتىنىن ايتىپ, وڭىرلىك پالاتالاردى اسقان جاۋاپتىلىقپەن قاراۋعا شاقىردى.
«ءبىز ءۇشىن «سك-فارماتسيا» جۇمىس تاجىريبەسى وتە اۋىر ءتيىپ وتىر. بۇل تاقىرىپتى بىرنەشە رەت كوتەردىك. ءبىز ساتىپ الۋلار ءتارتىبى, فورمۋليار تۋرالى دا ايتتىق. الايدا ناتيجە جوق. «سك-فورماتسيا» الدىندا 4 باستى ماقسات تۇردى, ونىڭ ءبىرىنشىسى – بيۋدجەت قاراجاتىن ۇنەمدەۋ. الايدا 2010 جىلى 31,3 ملرد تەڭگە بولسا, 2016 جىلى – 115 ملرد تەڭگە. انىعىندا «سك-فورماتسيا» دانەكەر بولىپ وتىر. ءبىزدىڭ ەسەبىمىز بويىنشا شامامەن 9% ۇستەمە. باسەكەلەستىك ءىسى جونىندەگى اگەنتتىك تەكسەردى, مونوپوليالىق كىرىس 26,7 ملرد تەڭگەنى قۇرادى. قالاي بيۋدجەت قاراجاتىن ۇنەمدەۋ تۋرالى ايتامىز؟ ايىپپۇلدىڭ ءوزى عانا 1,3 ملرد تەڭگە. ەلدىڭ فارماتسەۆتيكالىق سالاسىن دامىتۋ تاپسىرماسى ورىندالمادى», – دەدى رۋستام ءجۇرسىنوۆ.
مۇنىمەن قوسا «اتامەكەن» ۇكپ باسقارما توراعاسىنىڭ ورىنباسارى مەديتسينا سالاسىنداعى مەملەكەتتىك-جەكەمەنشىك سەرىكتەستىك جوباسىنىڭ ماسەلەسىن كوتەرىپ, ورتاعا بۇل جوبالاردى قالاي جۇزەگە اسىرۋ كەرەكتىگى تۋرالى ساۋال تاستادى.
ءوز كەزەگىندە اقتوبە وبلىسى وڭىرلىك كاسىپكەرلەر پالاتاسىنىڭ باسشىسى نۇرلىبەك مۇقانوۆ دەنساۋلىق ساقتاۋ سالاسىنداعى مەديتسينالىق مەكەمەلەردىڭ, وتاندىق اتۋار وندىرۋشىلەردىڭ ماسەلەلەرىن كوتەردى. اسىرەسە مەملەكەتتىك ساتىپ الۋلاردا وتاندىق تاۋار وندىرۋشىلەردى قولداۋعا باسا نازار اۋداردى.
«مەديتسينالىق تەحنيكانى ساتىپ الۋ كەزىندە 2016 جىلى الماتى قالاسى دەنساۋلىق ساقتاۋ باسقارماسى №4 لوت بويىنشا مامموگرافيالىق اپپاراتتىڭ 126 پارامەترى جازىلعان, تەحنيكالىق سيپاتتاماسى تولىقتاي قۇنى 48,9 ملن تەڭگە تۇراتىن رەسەيلىك ءونىمدى قايتالايدى, ال اقتوبەدە شىعارىلاتىن بۇل تەحنيكانىڭ بالاماسى 42,9 ملن تەڭگە تۇرادى. ال №11 لوت بويىنشا رەسەيدە شىعارىلاتىن فليۋوروگراف سيپاتتاماسى بەرىلگەن, ونىڭ قۇنى 32 ملن تەڭگە تۇرادى, بىراق «اكتيۋبرەنتگەن» اق شىعاراتىن سونداي تەحنيكانىڭ قۇنى 24 ملن تەڭگە. مۇنداي جاعداي استانا قالاسىندا دا ورىن العان, ساتىپ الۋلار ناتيجەسىندە وتاندىق تاۋارعا قاراعاندا 40%-عا قىمبات رەسەيلىك اپپارات الىنعان», – دەپ مىسال كەلتىردى نۇرلىبەك مۇقانوۆ.
اقتوبە وبلىسى كاسىپكەرلەر پالاتاسىنىڭ باسشىسى جۇرگىزىلگەن قوعامدىق مونيتورينگ قورىتىندىسى بويىنشا سىبايلاس جەمقورلىق قاۋپىن جويۋ ماقساتىندا قر دەنساۋلىق ساقتاۋ مينيسترلىگىنىڭ نازارىنا بىرنەشە ۇسىنىس بەردى. ولاردىڭ قاتارىندا ساتىپ الۋ پروتسەدۋراسىن بىرىڭعاي پورتالقۇرۋ ارقىلى ەلەكتروندى فورماتقا اۋىستىرۋ, مەملەكەتتىك-جەكەمەنشىك سەرىكتەستىك شەڭبەرىندە وڭىرلەردە مەديتسينالىق كلاستەردى دامىتۋ, ءتيىستى قۇزىرەتتى جەرگىلىكتى اتقارۋ ورگاندارىنا بەرۋ ارقىلى بىرىڭعاي ديستريبيۋتەر قىزمەتىن قىسقارتۋ ۇسىنىلدى.
سونىمەن قاتار, قر مەملەكەتتىك قىزمەت جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتىنىڭ باسشىسى سەرىكباي نۇرعيساەۆ دەنساۋلىق ساقتاۋ سالاسىندا جۇرگىزىلگەن تەكسەرۋ قورىتىندىسىن باياندادى.
«دەنساۋلىق ساقتاۋ سالاسى ەرەكشە الەۋمەتتىك ماڭىزعا يە. 2016 جىلى الماتى وبلىسىندا كورسەتىلگەن 12 ملن مەملەكەتتىك قىزمەتتىك قىزمەتتىڭ 6 ميلليونى دەنساۋلىق ساقتاۋ سالاسىنا تيەسىلى. 2017 جىلى قاڭتارداعى مالىمەتكە سۇيەنسەك, وبلىس تۇرعىندارىنا 826 مەديتسينالىق مەكەمە كومەك كورسەتەدى. ونىڭ ىشىندە 663 مەكەمە مينيسترلىك جۇيەسىندە بولسا, 163-ءى جەكە مەنشىكتە. دەنساۋلىق ساقتاۋ سالاسىنا مەملەكەتتىك قارجىلاندىرۋ جىل سايىن ارتىپ كەلەدى, اتاپ ايتقاندا الماتى وبلىسى 2013 جىلى 54 ملرد تەڭگە بولىنسە, 2016 جىلى 69 ملرد تەڭگەگە وسكەن. دەگەنمەن, دەنساۋلىق ساقتاۋ سالاسىندا جەمقورلىق جاعدايى ساقتالىپ وتىر. بۇل سالا ماماندارىنىڭ ەڭبەكاقىسىنىڭ تومەندىگى, ءتيىستى الەۋمەتتىك قورعالماۋى وسىعان سەبەپكەر», – دەدى سەرىكباي نۇرعيساەۆ.
مۇنىمەن قوسا الماتى وبلىسى بويىنشا دەنساۋلىق ساقتاۋ سالاسىن تەكسەرۋ بويىنشا بىرقاتار ماسەلەلەر كوتەرىلىپ, ونىڭ سىبايلاس جەمقورلىق سەبەپتەرى دە انىقتالعانىن, مەملەكەتتىك قىزمەت كورسەتۋدىڭ, اسىرەسە انىقتاما بەرۋدەگى زاڭ بۇزۋشىلىقتاردى ءتۇسىندىرىپ ءوتتى. وسىعان وراي مەديتسينالىق انىقتاما بەرۋدى ەلەكتروندى ۇكىمەت پورتالى ارقىلى جۇرگىزۋدى ۇسىندى.
جيىن بارىسىندا قر پارلامەنت دەپۋتاتتارى, قر دەنساۋلىق ساقتاۋ مينيسترلىگىنىڭ وكىلدەرى قاتىسىپ, مەديتسينالىق قىزمەت كورسەتۋ, مەديتسينا سالاسىنداعى مامان دايىنداۋ, وتاندىق فارماتسەۆتيكا سالاسىنىڭ احۋالى, مىندەتتى مەديتسينالىق ساقتاندىرۋ ماسەلەلەرىن كوتەردى.
مەملەكەتتىك قىزمەت جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك شپەكباەۆ ۇسىنىستاردى جولداۋدى سۇراپ, «اتامەكەن» ۇكپ بىرلەسىپ جاساپ, دەنساۋلىق ساقتاۋ مينيسترلىگىنە جولداناتىنىن, التى ايدان كەيىن جۇمىس ناتيجەسى تۋرالى تاعى دا تالقىلاۋ بولاتىنىندىعىن حابارلادى.