ساقتاندىرۋ نارىعىنىڭ جاي-كۇيى مەن بولاشاعى تۋرالى قرۇب ساقتاندىرۋدى قاداعالاۋ دەپارتامەنتىنىڭ ديرەكتورى جانات قۇرمانوۆ بايانداما جاسادى. ول ەلىمىزدىڭ ساقتاندىرۋ نارىعىنداعى كۇشتەردىڭ سوڭعى جىلداردا قالاي وزگەرگەنىن ايتا كەلىپ, اكتيۆتەردىڭ, مەنشىكتى كاپيتالدىڭ جانە ساقتاندىرۋ رەزەرۆتەرىنىڭ سەرپىنى بويىنشا دەرەكتەر كەلتىردى.
قۇرمانوۆتىڭ ايتۋىنشا, 2017 جىلعى 1 قاڭتارداعى جاعداي بويىنشا قازاقستان رەسپۋبليكاسىنىڭ ساقتاندىرۋ سەكتورىندا 32 ساقتاندىرۋ ۇيىمى,15 ساقتاندىرۋ بروكەرى جانە 59 اكتۋاري بار. جيىنتىق اكتيۆتەر مەن مەنشىكتى كاپيتال تيىسىنشە 857 ملرد. تەڭگەنى جانە 402 ملرد. تەڭگەنى قۇرادى.
«اكتيۆتەر قۇرىلىمىندا سوماسى 373 ملرد. تەڭگە بولاتىن باعالى قاعازدار قۇرايدى. بۇل جالپى كورسەتكىشتىڭ 43%-ى. ەكىنشى دەڭگەيدەگى بانكتەردە ورنالاستىرىلعان سالىمدار جيىنتىق اكتيۆتەردىڭ 27% ۇلەسىن (228 ملرد. تەڭگەنى) قۇرايدى», – دەپ حابارلاعان قۇرمانوۆ ساقتاندىرۋ رەزەرۆتەرى سوماسىنىڭ وتكەن جىلمەن سالىستىرعاندا 9%-عا ۇلعايىپ, 412 ملرد. تەڭگە بولعانىن مالىمدەدى.
تۇتاستاي العاندا, قرۇب وكىلىنىڭ ايتۋىنشا, قازاقستاننىڭ ساقتاندىرۋ نارىعى 2016 جىلى نەگىزگى كورسەتكىشتەردىڭ وڭ سەرپىنىن جالعاسادى جانە ساقتاندىرۋ سىياقىلارى سوڭعى 5 جىلداعى ماكسيمۋمعا كوتەرىلدى.
ساقتاندىرۋ سىياقىسىنىڭ كولەمى 2016 جىلمەن سالىستىرعاندا 24%-عا ۇلعايىپ, 357 ملرد. تەڭگە بولدى.
«ساقتاندىرۋ نارىعىندا ساقتاندىرۋ شارتتارىن جاساسۋ جانە ساقتاندىرۋ وقيعالارىن رەتتەۋ كەزىندە كورسەتىلەتىن قىزمەتتەر ساپاسىنىڭ ايتارلىقتاي ارتۋى, حالىققا ارنالعان ەرىكتى ساقتاندىرۋ ونىمدەرى تىزبەسىنىڭ كەڭەيۋى, ساقتاندىرۋ قىزمەتتەرىن تىكەلەي ساتۋدىڭ, ونىڭ ىشىندە مىندەتتى ەرىكتى ساقتاندىرۋدىڭ ساقتاندىرۋ پوليستەرىن ونلاين ساتۋدىڭ دامۋى بايقالادى. ساقتاندىرۋ ۇيىمدارىنىڭ اقپاراتتىق قىزمەتىنىڭ جاندانۋى ازاماتتاردىڭ قارجىلىق ساۋاتتىلىعىن, ساقتاندىرۋ ۇيىمدارىنا جانە تۇتاستاي العاندا ساقتاندىرۋعا دەگەن سەنىمنىڭ ارتۋىنا ىقپال ەتەدى», – دەدى ج. قۇرمانوۆ.
ونىڭ ايتۋىنشا, ساقتاندىرۋدىڭ زاڭنامالىق بازاسىن جەتىلدىرۋ, ساقتاندىرۋ نارىعىنىڭ ينفراقۇرىلىمىن دامىتۋ, ساقتاندىرۋ ۇيىمدارىنىڭ قارجىلىق ورنىقتىلىعىن ارتتىرۋ بويىنشا قابىلدانعان شارالار ساقتاندىرۋ قىزمەتتەرىن تۇتىنۋشىلاردىڭ قۇقىقتارىن جانە مۇددەسىن قورعاۋدى كۇشەيتۋگە ىقپال ەتتى.
«ساقتاندىرۋ سەكتورىن تيىسىنشە دامىتۋ جانە جۇمىس ىستەۋى ماقساتىندا ساقتاندىرۋ ومبۋدسمانى, ساقتاندىرۋ تولەمدەرىنە كەپىلدىك بەرۋ قورى, ساقتاندىرۋ جونىندەگى دەرەكتەردىڭ بىرىڭعاي ساقتاندىرۋ بازاسى, اكتۋاريلەر قوعامى سياقتى ينفراقۇرىلىمدىق ۇيىمدار قۇرىلدى. ساقتاندىرۋ سىيلىقاقىلارىنىڭ سەرپىندى وسۋىنە قاراماستان, ولاردىڭ ءىجو-دەگى ۇلەسى تومەن دەڭگەيدە قالىپ وتىر. بۇل قازاقستاننىڭ ساقتاندىرۋ نارىعى الەۋەتىنىڭ زور ەكەندىگىن بىلدىرەدى», - دەدى قۇرمانوۆ.
قازاقستان ەكونوميكاسى مەن الەۋمەتتىك سالاسىنىڭ زاماناۋي دامۋ ساتىسى, جاھاندانۋ مەن الەمدىك جۇيەگە بەلسەندى ىقپالداسۋ پروتسەستەرى, دسۇ-عا كىرۋ وتاندىق ساقتاندىرۋ يندۋسترياسىنىڭ الدىنا جاڭا ماقساتتار مەن مىندەتتەر قويادى, ولاردى ىسكە اسىرۋ قارجى نارىعىن, ونىڭ ىشىندە ساقتاندىرۋ نارىعىن دامىتۋ ءۇشىن جاعدايلار جاساۋدى تالاپ ەتەدى, دەپ قورىتىندىلادى ۇلتتىق بانك وكىلى.