ەلى ءۇشىن قۋ جانىنان بەزىنىپ, باستارىن بايگەگە تىككەن قايراتكەر ۇلداردى ەسكە الۋعا ارنالعان استا وبلىس اكىمىنىڭ ورىنباسارى رۋسلان رۇستەموۆ, اكادەميك دوسمۇحامبەت كىشىبەكوۆ, قوعام قايراتكەرى ابدىجالەل باكىر, «مۇستافا شوقاي» قورىنىڭ توراعاسى بازارباي اتاباەۆتار ءسوز سويلەدى. سونىمەن قاتار, سىردىڭ باس قالاسىندا الاشتىڭ جانە تۇركى الەمىنىڭ ارداقتىسى مۇستافا شوقايعا ارنالعان ەسكەرتكىشتىڭ سالتاناتتى اشىلۋ ءراسىمى ءوتتى.
ەسكەرتكىشتىڭ اشىلۋ سالتاناتىندا قىزىلوردا وبلىسىنىڭ اكىمى قىرىمبەك كوشەرباەۆ ايماق تۇرعىندارىن وسىناۋ ەلەۋلى وقيعامەن قۇتتىقتادى.
- مۇستافا شوقاي – كەز-كەلگەن ءىرى تاريحي قۇبىلىس سەكىلدى بىرجاقتى سيپاتتاۋعا بولمايتىن, ۇيرەنشىكتى قالىپقا سالۋعا كەلمەيتىن تۇلعا. ول سول زامانداعى اسا كۇردەلى عالامدىق تاريحي پروتسەسستىڭ بەل ورتاسىندا, ەپيتسەنترىندە ءجۇرىپ, تۇركى الەمىنىڭ, ءوز ۇلتىنىڭ مۇددەسىن قورعاۋعا تىرىستى. سوندىقتان مۇستافا شوقاي اق پەن قىزىلعا نەمەسە قوڭىرعا جاق, يا قارسى بولدى دەگەن قارابايىر تۇسىنىككە سىيمايدى. ول ءوزىنىڭ بۇكىل عۇمىرىن, كۇللى قاجىر-قايراتى مەن اقىل-ويىن تۋعان حالقىنىڭ, ءتۇبى ءبىر تۇتاس تۇركى جۇرتىنىڭ بىرىگىپ وركەندەۋىنە ارنادى,- دەدى قىرىمبەك ەلەۋ ۇلى.
سونداي-اق, سالتاناتتى شارادا قر ۇعا اكادەميگى, ق.ساتباەۆ اتىنداعى قازاق ۇلتتىق تەحنيكالىق عىلىمي زەرتتەۋ ينستيتۋتىنىڭ پروفەسسورى دوسمۇحامبەت كىشىبەكوۆ, قر پارلامەنتى سەناتىنىڭ دەپۋتاتى مۇرات باقتيار ۇلى قۇتتىقتاۋ ءسوز سويلەدى.
ەسكەرتكىشتى قازاقستان سۋرەتشىلەر وداعىنىڭ مۇشەسى, ءمۇسىنشى كوشەر بايعازيەۆ سالعان. ەسكەرتكىشتىڭ جالپى بيىكتىگى 12 مەتردى قۇرايدى.
ەرجان بايتىلەس, "ەگەمەن قازاقستان"
قىزىلوردا