ول 35 جاستا, ءبىلىمى جوعارى. 2005 جىلى قازاق مەملەكەتتىك مەديتسينالىق ۋنيۆەرسيتەتىن, 2008 جىلى گاننوۆەر جوعارى مەديتسينا مەكتەبىن بىتىرگەن. اقش-تا «قوعامدىق دەنساۋلىق ساقتاۋ» ماماندىعى بويىنشا ءىس-تاجىريبەدەن وتكەن. قوعامدىق دەنساۋلىق ساقتاۋ ماگيسترى.
قانات توسەكباەۆ ەڭبەك جولىن جەدەل جاردەم قىزمەتىندە فەلدشەر بولىپ باستاعان.
2008-2009 جىلدارى «ۇلتتىق مەديتسينالىق حولدينگ» اق باسقارما باسشىسىنىڭ كەڭەسشىسى, 2009-2010 جىلدارى «استانا مەديتسينالىق ۋنيۆەرسيتەتى» اق-دا باس مامان, 2010-2013 جىلدارى استانا قالالىق جەدەل جاردەم ستانساسىندا باس دارىگەر, 2013-2015 جىلدارى «الماتى» ءساناتوريى» اق باسشىسى, 2015 جىلدان بەرى الماتى قالاسىندا بالالار جۇقپالى اۋرۋلار اۋرۋحاناسىنىڭ باس دارىگەرى بولىپ قىزمەت اتقاردى.
قانات دۇيسەنباي ۇلىنىڭ ەمدەۋ ىسىندە, دەنساۋلىق ساقتاۋ سالاسىندا, باسقارۋشىلىق جۇمىستا ءىس-تاجىريبەسى, ۇيىمداستىرۋشىلىق قابىلەتى بار. وسىعان وراي وبلىس اكىمى التاي كولگىنوۆ جاڭا باسشىعا ناقتى تاپسىرما جۇكتەدى.
«ەلباسى نۇرسۇلتان ءابىش ۇلى نازارباەۆتىڭ دەنساۋلىق ساقتاۋ سالاسىن دامىتۋ, سالاۋاتتى ءومىر سالتىن قالىپتاستىرۋ باعىتىندا ناقتى تاپسىرمالار بەرگەنى ءمالىم. وتكەن جىلى وبلىستا 215 الەۋمەتتىك نىسان كۇردەلى جوندەلسە, سونىڭ دەنى – دەنساۋلىق ساقتاۋ مەكەمەلەرى. اسىرەسە, اۋدانداردا اۋرۋحانالار مەن مەديتسينالىق پۋنكتتەردى جاڭارتۋ جۇمىستارى جۇرگىزىلدى. قالالىق كوپ بەيىندى اۋرۋحانا اشىلدى. جەدەل جاردەم ستانسالارىنا, الىس ەلدى مەكەندەرگە ارنايى كولىكتەر الىندى. مۇنداي جۇمىستار بيىل دا جالعاسادى. ەلباسىنىڭ شەشىمىمەن جاقىندا دەنساۋلىق ساقتاۋ مينيسترلىگى قايتا قۇرىلدى. مەملەكەت تاراپىنان بارىنشا قولداۋ جاسالۋدا. سوندىقتان وڭىردە وسى سالانىڭ جۇمىسىن ۇيىمداستىرا ءبىلۋ قاجەت», – دەدى ءوڭىر باسشىسى.