WBO نۇسقاسى بويىنشا الەم چەمپيونى بيللي دجو سوندەرس (24-0, 12 KO) WBC, WBA (Super), IBF جانە IBO بەلبەۋلەرىنىڭ يەسى قازاقستاندىق بىلعارى قولعاپ شەبەرى گەننادي گولوۆكينمەن (37-0, 33 KO) جۇدىرىقتاسقىسى كەلەتىنىن ايتتى.
«گولوۆكيننىڭ مىقتىلىعىنا كۇمان كەلتىرمەيمىن. بىراق ول ءالى مەن سياقتى بوكسشىمەن جۇدىرىقتاسقان ەمەس. دجەيكوبس وعان لايىقتى قارسىلىق كورسەتە ءبىلدى. بىراق دەني مەنىڭ دەڭگەيىمدەگى بوكسشى ەمەس», - دەدى سوندەرس.
34 جاستاعى گولوۆكيننىڭ ورتا ديۆيزيوندا ءابسوليۋتتى چەمپيون اتانۋى ءۇشىن تەك WBO بەلبەۋى جەتپەي تۇر. الداعى كۇندەرى گولوۆكين مەن سوندەرس وكىلدەرى جەكپە-جەك جونىندە كەلىسسوزدەر ءوتۋى ءتيىس. الدىن-الا مالىمەتتەر بويىنشا بوكس كەشى 17 ماۋسىم كۇنى استانادا ءوتۋى مۇمكىن.
ايتا كەتەيىك, كەشە قازاقستاندىق بوكسشى امەريكالىق دەنيەل دجەيكوبسپەن 12 راۋندتىق كەزدەسۋ وتكىزىپ, تورەشىلەردىڭ ءبىراۋىز شەشىمىمەن جەڭىسكە جەتتى.