برازيليالىق كوفەنى جاقسى كورەتىن جۇرت كوپ. بىراق, ناعىز تازاسىنا كوپشىلىگىنىڭ قولى جەتە بەرمەيدى. سوندىقتان شىمكەنتتىڭ ءبىر ىسكەر ازاماتى سوناۋ برازيليادان ساپالى شيكىزاتىن الدىرىپ, تاڭداۋلى سورتىن دايىندايتىن تسەح اشقان. سول سۇرىپ, سول ءدام.
قانت ديابەتىنە شالدىققان ادامدارعا وسىمدىك جاپىراعىنان دايىندالاتىن ءشاي كوپ جاردەم بەرەدى ەكەن. قازاقستاندا وسپەيتىن وسى ءشوپتى تولەبي اۋدانىنىڭ ءبىر ازاماتى جىلىجايدا ءوسىرىپ, دايىن ونىمگە جەتكىزدى.
ساميدۋللا تەمىربەكوۆ دەگەن تولەبي اۋدانىنىڭ تاعى ءبىر ازاماتى شاعىن حاۋىزىندا افريكالىق بالىق ءوسىرىپ جاتىر. بىزدە جايىن, لاقا دەپ اتالاتىن بالىقتىڭ بۇل ءتۇرى جاعدايىن كەلىستىرسە مول پايدا بەرەدى ەكەن.
ماماندىعى ۇستاز افريكا لاقاسى تۋرالى قىزىق مالىمەتتەردى الەۋمەتتىك جەلىدەن وقىپ, ءوسىرىپ كورۋگە قىزىعۋشىلىعى ويانعان.
شاباقتى الدىرۋ ءۇشىن مۇحيت جالداپ, ساحارادان ەرنى كەزەرىپ افريكاعا بارۋدىڭ قاجەتى جوق, ءوسىرىپ جاتقان شارۋاشىلىقتار بار.
بۇگىندە ءۇي ىرگەسىندەگى حاۋىزدا 11 مىڭ شاباق ءوسىرىلىپ جاتىر.
– بۇلار جەمنەن گورى ەتتى جاقسى كورەدى, – دەيدى ساميدۋللا. –تابيعاتىمىز افريكاعا قاراعاندا, قاتالداۋ بولعاندىقتان حاۋىزدىڭ استىنا جىلۋ جۇيەسىن جۇرگىزىپ, قالىپتى جىلۋ ۇستاپ وتىرامىز. باعىپ, كۇتۋدىڭ قىر-سىرىن مەڭگەرىپ الدىق. بالىقتار توق بولسا جارىسىپ جۇزەدى, ءبىر-بىرىمەن وينايدى. اش بولسا كوڭىل كۇيلەرى كەلىسپەي, ءبىر ورىندا تۇرا بەرەدى. ەتتىڭ دە مايى ازىن جاقسى كورەدى.
كۇنىنە ءبىر قۇنان قويدىڭ سالماعىنداي ەت جەيتىن جىرتقىش بالىقتاردان پايدا تۇسپەسە كاسىپكەردىڭ وسىرمەيتىندىگى بەلگىلى.
ەكى-ءۇش ايدان سوڭ حاۋىزدا ءوسىرىلىپ جاتقان 11 مىڭ لاقا شاباقتىڭ ارقايسىسى كاسىپكەرگە ۇلكەن تابىس اكەلەرى حاق. كاسىپكەرلىك مەكتەبىنەن كومەك الىپ وتىرعان ازامات وزىنە دە, ەلگە دە پايدالى كاسىپ تاپتى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى