استاناداعى ۇلتتىق كىتاپحانادا "ەگەمەن قازاقستان" جوبالارىن تانىستىرۋ ءراسىمى باستالدى. شارانى اشىپ, جۇرگىزگەن "ەگەمەن قازاقستان" گازەتى باسقارما توراعاسى دارحان قىدىرالى باسىلىم قولعا العان ءۇش جوبانىڭ ءمان-ماقساتىن ءتۇسىندىردى.
"تسيفرلى قازاقستان" باعدارلاماسى اياسىندا ىسكە اساتىن شارالاردىڭ العاشقىسى – «ەگەمەن قازاقستان» گازەتىنىڭ ارحيۆتەگى بارلىق نومىرلەرىن جيناقتاپ, بەتتەرىن تۇگەلدەي سكانەرلەۋ ارقىلى تسيفرلى نۇسقاعا كوشىرۋ. بۇل جۇمىستار باس باسىلىمنىڭ 100 جىلدىق مەرەيتويىنا وراي قولعا الىنعان بولاتىن. جوبا اياسىندا گازەتتىڭ «ۇشقىن» دەگەن اتاۋمەن العاش 1919 جىلعى 17 جەلتوقساندا شىققان كەزىنەن باستاپ, «ەڭبەك تۋى», «ەڭبەكشىل قازاق», «ەڭبەكشى قازاق», «سوتسيالدى قازاقستان», «سوتسياليستىك قازاقستاننان» «ەگەمەن قازاقستانعا» دەيىنگى نومىرلەرى تسيفرلى مۇراعاتقا جيناقتالادى.
"ەلباسى حالىققا جولداۋىندا تسيفرلى قازاقستان" جوبالارىن باستاۋدى تاپسىرعان بولاتىن. وسى باعدارلاما اياسىندا "ەگەمەن قازاقستاننىڭ" ءجۇز جىلدىق تاريحىندا شىققان ساندارىن تسيفرلى جۇيەلەرگە ەنگىزۋدى قولعا الدىق. بىرىنشىدەن, بۇل گازەتتىڭ مۇراعاتىن ساقتاۋعا, ونى قورعاۋعا مۇمكىندىك بەرەدى. ەكىنشىدەن, زەرتتەۋشىلەر ءۇشىن وتە ءتيىمدى بولادى", دەدى دارحان قىدىرالى. گازەت نومىرلەرىن تولىقتاي تسيفرلى فورماتقا كوشىرۋ كەلەسى جىلى اياقتالادى.
جۇرتشىلىق نازارىنا ۇسىنىلعان جوبالار جونىندە پىكىر بىلدىرگەن جازۋشى, قوعام قايراتكەرى سۇلتان ورازالين "ەگەمەننىڭ" تاريحى - ەلدىڭ تاريحى" دەي كەلە, تسيفرلى فورماتتاعى گازەت ساندارى ەل تاريحىن زەرتتەۋشىلەردىڭ جۇمىسىن جەڭىلدەتەتىنىن ايتتى.
ەكىنشى جوبا «تسيفرلى قازاقستان: ماڭگىلىك ەل مۇرالارى» دەپ اتالادى.
ونىڭ اياسىندا «ەگەمەننىڭ» اسا باي فوتومۇراعاتىندا ساقتالعان, قازاقستاننىڭ كەڭەس داۋىرىندەگى تاريحىن, تاۋەلسىزدىكتىڭ ماڭىزدى ساتتەرى مەن جارقىن جەتىستىكتەرىن, قاراپايىم ادامدار تۇرمىسىن بەينەلەيتىن سۋرەتتەر, سونداي-اق ەلباسىنىڭ, وزگە دە كورنەكتى مەملەكەت, قوعام جانە مادەنيەت قايراتكەرلەرى مەن اتاقتى سپورتشىلاردىڭ, قازاقستان قالالارى مەن كورىكتى جەرلەرىنىڭ سيرەك فوتوسۋرەتتەرى ۋيكيپەديا ونلاين-ەنتسيكلوپەدياسى ارقىلى عالامتور پايدالانۋشىلارىنا ۇسىنىلا باستادى.
«الەمنىڭ كەز كەلگەن تۇكپىرىنەن ينتەرنەت ارقىلى قازاقستاندى ىزدەگەن ادام وسى سۋرەتتەردى كورەدى. سۋرەتتەردىڭ اعىلشىن, ورىس, قازاق تىلىندەگى تۇسىندىرمەلەرى بولادى. بىرىنشىدەن, بۇل جوبا ارقىلى اسا قۇندى فوتوماتەريالداردى جوعالۋدان ساقتايمىز. ەكىنشىدەن, ولاردى كوپشىلىك نازارىنا ۇسىنامىز», دەدى باسىلىم جەتەكشىسى دارحان قىدىرالى.