جۋىردا انكارا قالاسىندا ورنالاسقان قازاقستاننىڭ تۇركياداعى ەلشىلىگىندە قازاقستان مەن تۇركيا اراسىنداعى ديپلوماتيالىق قارىم-قاتىناستىڭ 25 جىلدىعى اياسىندا «تاۋەلسىزدىككە ارنالعان عۇمىر: ماحامبەت وتەمىس ۇلى» اتتى جىر جيناعىنىڭ تۇساۋكەسەر ءراسىمى ءوتتى, دەپ حابارلادى ەلشىلىكتىڭ ءباسپاسوز قىزمەتى.
اتالعان شاراعا قازاقستاننىڭ ءتۇركياداعى ەلشىلىگىنىڭ ۋاقىتشا سەنىمدى وكىلى ءالىمحان ەسەنگەلديەۆ, ەۋرازيا جازۋشىلار قاۋىمداستىعىنىڭ توراعاسى ياكۋب وماروعلى, ارداحان ۋنيۆەرسيتەتىنىڭ ادەبيەتتانۋشى-عالىمدارى پروفەسسور ورحان ءسويلەمەز جانە پروفەسسور ايابەك باينيازوۆ, تۇرىك زيالى قاۋىم وكىلدەرى قاتىستى.
جيىندى اشقان ءا.ەسەنگەلديەۆ ەكى باۋىرلاس ەل اراسىنداعى ديپلوماتيالىق قارىم-قاتىناستىڭ 25 جىلدىعىمەن قۇتتىقتاپ, قازاقستاننىڭ قول جەتكىزگەن جەتىستىكتەرى مەن ەلباسى ن.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا ارناعان جولداۋى تۋرالى مالىمەت بەردى. سونداي-اق, ەكى ەل اراسىنداعى مادەني جانە گۋمانيتارلىق بايلانىستى كۇشەيتۋگە باعىتتالعان جۇمىستارمەن تانىستىرىپ, تۇرىك تىلىندە جارىق كورگەن قازاق كوركەم ادەبيەتىنىڭ ءىنجۋ-مارجاندارىن اتاپ ءوتتى. سونىڭ ىشىندە قازاقتىڭ اقبەرەن اقىنى ماحامبەتتىڭ جىر جيناعى بار ەكەندىگىن جەتكىزدى. كىتاپتىڭ جارىق كورۋىنە قولداۋ كورسەتكەن ەۋرازيا جازۋشىلار قاۋىمداستىعىنا قاراستى «بەنگۋ» باسپاسىنا, ماحامبەتتىڭ جىرلارىن تۇرىك تىلىندە سويلەتكەن و.سويلەمەزگە جانە ا.باينيازوۆقا العىس ءبىلدىردى.
ەۋرازيا جازۋشىلار قاۋىمداستىعىنىڭ توراعاسى يا.وماروعلى ءوز سوزىندە تاۋەلسىزدىكتىڭ 25 جىلدىعىن تويلاعان قازاقستاننىڭ 2017 جىلى بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە قىزمەتىنە كىرىسكەنىنە بايلانىستى ەلباسى ن.نازارباەۆتى جانە باۋىرلاس قازاق حالقىن شىن جۇرەكتەن قۇتتىقتاپ, جاھاندىق ەكونوميكا داعدارىسقا دۋشار بولعان قازىرگى ۋاقىتتا قازاقستاننىڭ ءوزى ۇستانىپ وتىرعان دانا ەكونوميكالىق ساياساتىنىڭ ارقاسىندا قيىندىقتان كوپ قينالماي وتكەندىگىن اتاپ كورسەتتى. سونىمەن قاتار, ماحامبەت شىعارماشىلىعىنىڭ تۇركى الەمىنىڭ رۋحاني قازىناسى ەكەندىگىن, ونىڭ ءاربىر ولەڭىندە تاۋەلسىزدىكتى اڭساۋ جانە كۇرەسكەرلىك رۋحتىڭ ساقتالعاندىعىن جەتكىزدى.
ارداحان ۋنيۆەرسيتەتىنىڭ پروفەسسورى و.سويلەمەز 1995 جىلى كولۋمبيا ۋنيۆەرسيتەتىندە «1985 جىلدان كەيىنگى قازاقتىڭ ۇلتتىق الەۋەتى» تاقىرىبىندا دوكتورلىق ديسسەرتاتسيا قورعاعانىن جانە قازاق ادەبيەتىنە قاتىستى بىرقاتار جۇمىستار اتقارعانىن ايتا كەلە, ماحامبەت شىعارماشىلىعى جونىندە بايانداما جاسادى. اقىن-جىراۋلاردان قالعان جىرلاردىڭ تۇركى دۇنيەسىنىڭ رۋحاني الەمىن بايىتا تۇسكەنىنە, سونىڭ ىشىندە ماڭگى مۇرا بولىپ قالعان ماحامبەتتىڭ ءاربىر ولەڭىنىڭ مۇحيتقا قۇيىلعان وزەندەي الەم ادەبيەتىنىڭ ءىنجۋ-مارجانى ەكەندىگىنە باسا نازار اۋداردى.
تۇركيانىڭ اتاقتى اقىنى الي اكباش تۇركى حالىقتارىنىڭ پوەزياسى, سونىڭ ىشىندە قازاق پوەزياسىنىڭ ەرەكشەلىكتەرى تۋرالى مالىمەت بەرىپ, ماحامبەتتىڭ ولەڭدەرىن وقىپ, ۇلى اقىننىڭ جىرلارىندا ساقتالعان تىنىستىڭ كەڭدىگىن, ۇلى بايتاق دالانىڭ سۇلۋلىعىن جانە وزىنە ءتان ىرعاعىن كورسەتىپ, تالداپ بەردى.
شارا سوڭىندا قازاق ادەبيەتىن ناسيحاتتاپ, قازاقستان مەن تۇركيا اراسىنداعى دوستىق جانە ىنتىماقتاستىقتىڭ نىعايۋىنا ۇلەس قوسقانى ءۇشىن عالىم ورحان ءسويلەمەز «قازاقستان-تۇركيا دوستىعى» مەدالىمەن, پروفەسسور ايابەك باينيازوۆ العىس پلاكەتكاسىمەن ماراپاتتالدى.