ءۇش جىلدان كەيىن قازاقستان ارقىلى وتەتىن ترانزيتتىك تاسىمالدان تۇسەتىن تابىستىڭ كولەمى 4 ملرد. دوللارعا جەتۋى ءتيىس. ۇكىمەتتىڭ الدىندا وسىنداي مىندەت تۇر. بۇگىن استانادا وتكەن ءباسپاسوز ءماسليxاتىندا قر ينۆەستيتسيالار جانە دامۋ مينيسترلىگىنىڭ ترانزيتتىك جانە كولىكتىك لوگيستيكانى دامىتۋ دەپارتامەنتى ديرەكتورىنىڭ ورىنباسارى سەرىك باشيموۆ اتالعان كورسەتكىشكە جەتۋ جولدارى جايىندا ايتىپ بەردى, دەپ xابارلايدى قازاقپارات.
"قىتاي - ەۋروپا - قىتاي باعىتىنداعى تەمىرجول قاتىناسى ارقىلى كونتەينەرلىك تاسىمالدان شامامەن 1,5 ملرد. دوللار تۇسەدى دەگەن بولجام بار. قىتاي - يران - يراك تەمىرجولىنان 400 ملن., سونداي-اق قىتاي - كاۆكاز - ىستانبۇل باعىتىنداعى كونتەينەرلىك تاسىمالدان 400 ملن. دوللار ءتۇسۋى ءتيىس", - دەيدى باشيموۆ.
ونىڭ ايتۋىنشا, بۇگىندە قازاقستاننىڭ اۋە كەڭىستىگى ارقىلى جولاۋشىلاردىڭ ترانزيتتىك تاسىمالى دا ءبىراز پايدا اكەلىپ وتىر. سوڭعى بەس جىلدا اتالعان كورسەتكىش ءتورت ەسەگە ءوستى.
2012 جىلى قازاقستان تەرريتورياسى ارقىلى ۇشىپ وتەتىن جولاۋشىلاردىڭ سانى 120 000 ادام بولسا, 2016 جىلدا ولاردىڭ سانى 478 000 ادامعا ارتتى. اعىمداعى جىلدىڭ سوڭىندا جولاۋشىلاردىڭ ترانزيتتىك تاسىمالى 600 000 ادامعا جەتەدى دەگەن بولجام بار. وتكەن جىلى وسى تاسىمالدان تۇسكەن تابىستىڭ كولەمى 267 ملرد. تەڭگەنى قۇراعان.
"بۇدان بولەك, اقىلى جولداردى ەنگىزۋدىڭ ارقاسىندا قازاقستان ارقىلى وتەتىن جۇكتەردەن دە تابىس تۇسەدى. ونىڭ جالپى كولەمى 18 ملن. دوللارعا دەيىن جەتۋى ءتيىس", - دەپ اتاپ كورسەتتى باشيموۆ.
بريفينگ كەزىندە ول "استانا - تەمىرتاۋ", "الماتى - قورعاس" پەن "الماتى - قاپشاعاي" تاس جولدارىندا اقىلى جۇيەنى ەنگىزۋ مەرزىمىن دە جاريالادى.
ايتا كەتەيىك, بۇگىندە ۇكىمەتكە قازاقستاننىڭ ترانزيتتىك الەۋەتىن كوتەرۋ بويىنشا ۇلكەن مىندەتتەر جۇكتەلىپ وتىر. اتاپ ايتقاندا, 2020 جىلعا دەيىن رەسپۋبليكا ارقىلى تاسىمالداناتىن جۇك كونتەينەرلەرىنىڭ سانى 2 ملن. داناعا, ال اۋە كەڭىستىگى ارقىلى ۇشىپ وتەتىن ترانزيتتىك جولاۋشىلاردىڭ سانى 1,6 ملن. ادامعا جەتۋى ءتيىس.