قازاقستانداعى نەسيە نارىعى 2016 جىلى ايتارلىقتاي وزگەردى. ءبىر جىلدا جەكە تۇلعالاردىڭ مەرزىمى ءوتىپ كەتكەن نەسيەلەرى 10,3%-دان 9,5%-عا تومەندەدى. بانكتەر كەپىلزاتسىز نەسيەنىڭ پايىزىن تومەندەتىپ, ساپالى تۇتىنۋشىلاردى ىزدەۋدە.
ناتيجەسىندە بولشەك نەسيە نارىعى تارىلا باستادى. 2017 جىلدىڭ قاڭتار ايىندا جەكە تۇلعالاردىڭ نەسيە پورتفەلى 0,4 پايىزعا (16,3 ملرد تەڭگە) تومەندەپ, 4 ترلن تەڭگەنى قۇرادى. 2016 جىلى بانكتەر نەسيە بەرۋدى ازايتا باستاعانى بيىل تاعى قايتالانۋى مۇمكىن دەگەن پىكىر ايتۋعا ءالى ەرتە. ويتكەنى, جىل باسىندا, ادەتتە, حالىق جاڭاجىلدىق شىعىننان كەيىن كوپكە دەيىن نەسيەگە جولاماي تۇرا تۇرادى. 2016 جىلى دا قاڭتاردا نەسيە پورتفەلى 0,3 پايىزعا ازايعان بولاتىن.
دەگەنمەن, 2017 جىلى ءبىرىنشى رەت نەسيە الۋشىلار قاتارى كوبەيگەن. ءبىر اي ىشىندە 197,4 ملرد تەڭگەنىڭ نەسيەسى بەرىلگەن. بۇل وتكەن جىلدىڭ قاڭتارىمەن سالىستىرعاندا 70,9 پايىزعا ارتىق.
ەكىنشى دەڭگەيلى بانكتەردىڭ پورتفەلىندەگى بولشەك نەسيە كولەمى 31,4 پايىزدان 32,2 پايىزعا ارتتى.
ەستەرىڭىزگە سالا كەتەيىك, 2016 جىلى بولشەك نەسيە بەرۋ كورسەتكىشى كۇرت تومەندەگەن. وعان سەبەپ بولعان فاكتور سوڭعى بەس جىلدا حالىقتىڭ جاپپاي نەسيەگە بەت بۇرۋى.
2016 جىل سوڭىنا دەيىن بولشەك نەسيە بەرۋ كورسەتكىشى 2010 جىلعىمەن سالىستىرعاندا 89,2 ملرد تەڭگەگە تومەندەدى.
سونىمەن قاتار, بولشەك نەسيەنىڭ ازايۋى وسى نارىقتاعى ۇلتتىق بانكتىڭ باقىلاۋ تەتىكتەرىنىڭ كۇشەيتىلۋى.
2016 جىلدىڭ 1 قاڭتارىنان باستاپ نەسيە بەرۋ ءۇشىن بانكتەردىڭ نەسيە تاريحى مەن ناقتى تابىس كولەمىنىڭ تەكسەرىلۋى تالاپ ەتىلدى. ەگەر نەسيەگە ءوتىنىش بەرۋشى تۇلعانىڭ اي سايىنعى نەسيە تولەمىنىڭ كولەمى جالپى تابىسىنىڭ 35 پايىزىنان اسىپ كەتەتىن بوسلا, جانە نەسيە تاريحىندا كەمشىلىكتەر بولسا, وندا بانك ءوتىنىشتى قاناعاتتاندىرمايدى.
قازىرگى تاڭدا ايلىق جالاقى تابىسى بار ادامدارعا كەپىلزاتسىز نەسيە بەرەتىن ەلدە 17 بانكتىڭ 30 ۇسىنىسى بار. ال نارىقتا جالپى ەكسپرەسس نەسيە بەرۋشى 18 بانكتىڭ 46 ۇسىنىسى جۇمىس ىستەيدى.
بارلىق بانكتەردىڭ ورتاشا پايىزدىق ۇستەمە اقىسى 30,3 پايىزدى قۇرايدى. ال ءبىر جىل بۇرىن بۇل كورسەتكىش 32,1 پايىز ەدى.
قازىر ەڭ تومەنگى پايىزدىق كورسەتكىش قازكوم بانكى (16,3 پايىز), ودان كەيىن اتف بانكى (17,2%), ءۇشىنشى ورىندا (Kaspi بانكى 21,4%).
ەڭ كوپ سوما ۇسىناتىن بانكتەردىڭ كوش باسىندا دا قازكوم (6 ملن تەڭگە), ودان كەيىن 7 بانك (5 ملن تەڭگە).