2017 جىلى 9 ناۋرىزدا "قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تۇزەتۋلەر ەنگىزۋ تۋرالى" قازاقستان رەسپۋبليكاسى زاڭىنىڭ قازاقستان رەسپۋبليكاسى كونستيتۋتسياسىنا سايكەستىگىن انىقتاۋ ماقساتىندا كونستيتۋتسيالىق كەڭەستىڭ نورماتيۆتىك قاۋلىسى جاريا ەتىلدى, - دەپ حابارلايدى قر كونستيتۋتسيالىق كەڭەسىنىڭ ءباسپاسوز قىزمەتى.
بيىل 6 ناۋرىزدا قازاقستان رەسپۋبليكاسىنىڭ پرەزيدەنتى اتالعان زاڭدى قازاقستان رەسپۋبليكاسىنىڭ كونستيتۋتسياسىنا, ونىڭ ىشىندە كونستيتۋتسيادا بەلگىلەنگەن قۇندىلىقتارعا رەسپۋبليكا قىزمەتىنىڭ تۇبەگەيلى پرينتسيپتەرىنە, باسقارۋ نىسانىنا سايكەستىگىنە قاراۋ تۋرالى كونستيتۋتسيالىق كەڭەسكە ءوتىنىش جولدادى. كونستيتۋتسيالىق كەڭەس ءوز شەشىمىندە 2017 جىلى 6 ناۋرىزدا قازاقستان رەسپۋبليكاسىنىڭ پارلامەنتى قابىلداپ, 2017 جىلى 6 ناۋرىزدا قازاقستان رەسپۋبليكاسىنىڭ پرەزيدەنتىنە قول قويۋعا ۇسىنىلعان "قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى" قازاقستان رەسۋبليكاسىنىڭ زاڭى قازاقستان رەسپۋبليكاسىنىڭ كونستيتۋتسياسىنا, ونىڭ ىشىندە رەسپۋبليكانىڭ كونستيتۋتسيالىق قۇندىلىقتارىنا, قىزمەتىنىڭ تۇبەگەيلى پرينتسيپتەرىنە جانە باسقارۋ نىسانىنا سايكەس كەلەدى دەپ قاۋلى ەتتى.
ەستەرىڭىزگە سالا كەتسەك, 6 ناۋرىزدا پارلامەنت قازاقستان كونستيتۋتسياسىنا ەنگىزىلگەن تۇزەتۋلەردى قابىلداعان بولاتىن. بىرىككەن كوميسسيا توراعاسى نۇرلان ءابدىروۆتىڭ ايتۋىنشا, پرەزيدەنت ۇسىنعان زاڭ جوباسىندا كونستيتۋتسيانىڭ 19 بابىنا 26 تۇزەتۋ قاراستىرىلعان.