قازاقستاندا دوللارسىزداندىرۋ پروتسەسى قارقىندى جۇرۋدە. الداعى ۋاقىتتا دوللاردى ىعىستىرۋ شارالارى تاعى كۇشەيتىلمەك. بۇل تۋرالى The Business Year باسىلىمىنا بەرگەن سۇحباتىندا قر ۇلتتىق بانكىنىڭ توراعاسى دانيار اقىشەۆ مالىمدەدى.
"مەنىڭ مىندەتىم - دوللارمەن سالىنعان دەپوزيتتەردىڭ كولەمىن تاريعي 40 پايىزعا دەيىنگى قالپىنا كەلتىرۋ", - دەدى باس بانكير.
ونىڭ ايتۋىنشا, قازاقستان بۇل تۇرعىدا ايتارلىقتاي جەتىستىكتەرگە جەتتى.
ء"بىز بىرنەشە مەملەكەتتىڭ تاجىريبەسىن زەرتتەي كەلە مىنانى تۇسىندىك: دوللاردى ىعىستىرۋ ءۇشىن بىرنەشە جىل قاجەت بولعان. ماسەلەن, تۇركياداعى دوللارلىق دەپوزيتتىك 10 پايىز وزگەرۋى تەك سوڭعى 5 جىلدا بايقالعان", - دەدى اقىشەۆ.
ماسەلەن, اقىشەۆتىڭ ايتۋىنشا, 2016 جىلى جەكە تۇلعالاردىڭ دوللارداعى دەپوزيتتەرى كولەمى 70 پايىزدان 55 پايىزعا دەيىن تۇسكەن. بۇل ناقتى ۆاليۋتامەن ەسەپتەگەندە 1,1 ترلن تەڭگە. ال وسى ۋاقىتتا تەڭگەدەگى دەپوزيت كولەمى 3,3 ترلن تەڭگەگە ارتتى.
اقىشەۆتىڭ ايتۋىنشا, الداعى جىلدارى قازاقستان ەكونوميكاسىندا وڭ ءوسىم بولادى. بىراق قارقىن اناۋ ايتقانداي جوعارى بولا المايدى.
"2017 جىلى ەكونوميكا ءوسىمى 1,5-2 پايىز ارالىعىندا بولادى. بۇل مۇنايدىڭ باعاسىن 40 دوللارمەن ەسەپتەگەندەگى بولجام. نارىقتاعى جاڭا جاعدايعا ىڭعايلانۋ كەزەڭى 2018 جىلدىڭ سوڭىنا دەيىن جالعاسپاق. 2018 جىلدىڭ 1 ماۋسىمىنا دەيىن ەل ەكونوميكاسى ءوز الەۋەتىنەن تومەن كورسەتكىشتەن كورسەتەدى. بۇل ىشكى نارىقتاعى دەفلياتسيالىق قىسىمنىڭ اسەرى بولماق. ال سىرتقى اسەرگە كەلەر بولساق, ەۋروپا مەن رەسەي ەكونوميكاسىنىڭ قارقىن الۋى بىزگە دە وڭ اسەر ەتەدى", - دەدى باس بانك باسشىسى.
ونىڭ پىكىرىنشە, قازاقستان ەكونوميكاسىنا مۇناي سەكتورىنان بولەك باسقا دا قولداۋشى سالالار بار. اتاپ ايتار بولساق, ولار اۋىل شارۋاشىلىعى مەن اگروونەركاسىپتىك كەشەن, تىگىن ءىسى, تاماق ونەركاسىبى. سونىمەن قاتار گەوگرافيالىق ورنالاسۋ جاعىنان دا قازاقستان ەكونوميكاسى ءۇشىن ايتارلىقتاي ارتىقشىلىقتار بار.