ەلباسى نۇرسۇلتان نازارباەۆ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى قايرات قوجامجاروۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋدە ق.قوجامجاروۆ ەلباسىن اگەنتتىكتىڭ قازىرگى قىزمەتى تۋرالى حاباردار ەتىپ, «100 ناقتى قادام» ۇلت جوسپارىن ىسكە اسىرۋ اياسىندا اتقارىلىپ جاتقان جۇمىستار جونىندە باياندادى.
نۇرسۇلتان نازارباەۆ ورتالىق مەملەكەتتىك جانە جەرگىلىكتى اتقارۋشى ورگاندارداعى بوس تۇرعان ورىنداردى قىسقارتۋ, سونداي-اق, ەڭبەكاقى تولەۋ قورىنىڭ قاراجاتىن قايتا ءبولۋ ارقىلى ەنگىزىلىپ جاتقان مەملەكەتتىك قىزمەتشىلەردى ىنتالاندىرۋدىڭ بونۋستىق ءجۇيەسىنىڭ ماڭىزدىلىعىن اتاپ ءوتتى.
ق.قوجامجاروۆ «ب» كورپۋسىنداعى مەملەكەتتىك قىزمەتشىلەردى اتتەستاتتاۋ بارىسى تۋرالى حابارلاپ, اتتەستاتتاۋدان وتۋشىلەر جاقسى ناتيجە كورسەتىپ جاتقانىن ايتتى. اگەنتتىك توراعاسىنىڭ اقپاراتى بويىنشا, بۇگىنگە دەيىن جوعارى اتتەستاتسيالىق كوميسسيانىڭ 14 وتىرىسى بولىپ, رەسپۋبليكالىق دەڭگەيدە 700-دەن استام قىزمەتكەر اڭگىمەلەسۋدەن وتكەن.
سونداي-اق, اگەنتتىك ءتوراعاسى «ا» باسقارۋشى كورپۋسىن رەفورمالاۋعا قاتىستى ۇسىنىستار جونىندە باياندادى. وندا قىزمەتكەرلەردىڭ وسى ساناتىنا جاتاتىن لاۋازىمدار قاتارىن قىسقارتۋ كوزدەلگەن.
قازاقستان پرەزيدەنتى سىبايلاس جەمقورلىقپەن كۇرەسۋ, ۇدايى ونىڭ الدىن الۋ جۇمىسىن ساپالى جۇرگىزۋ قاجەتتىگىنە دە نازار اۋداردى.
– قىلمىستىق قۋدالاۋ تەك زاڭ اياسىندا عانا جۇزەگە اسىرىلۋعا ءتيىس. ازاماتتاردى سالماقتى نەگىزدەرسىز جانە بۇلتارتپايتىن دالەلدەرسىز تۇتقىنداۋعا بولمايدى, – دەدى نۇرسۇلتان نازارباەۆ.
سۋرەت پرەزيدەنتتىڭ ءباسپاسوز قىزمەتىنەن الىندى