مەملەكەت باسشىسى نۇرسۇلتان نازارباەۆ يۋري گاگاريننىڭ عارىشقا تاريحي ۇشۋىنا 50 جىل تولۋىنا وراي رەسەي فەدەراتسياسىنىڭ پرەزيدەنتى دميتري مەدۆەدەۆكە قۇتتىقتاۋ جەدەلحاتىن جولدادى.
بارشا قازاقستاندىقتار مەن جەكە ءوزىمنىڭ اتىمنان ءسىزدى جانە رەسەي حالقىن يۋري گاگاريننىڭ تاريحي ۇشۋىنا 50 جىل تولۋىمەن قۇتتىقتايمىن!
ادامزاتتىڭ عارىشقا العاشقى ساپارى بارشا ادامزات ءۇشىن ايتۋلى وقيعا بولدى. ول ءبىزدىڭ تەحنيكا مەن عىلىمنىڭ ۇلكەن جەتىستىگى, بارلىق تۋىسقان حالىقتاردىڭ ۇجىمدىق كۇش-جىگەرى مەن ەڭبەكقورلىعىنىڭ ناتيجەسى.
ادامزاتتىڭ عارىشتىق ساپارى قازاقستاندىق بايقوڭىردان باستالدى. سودان بەرى ءجۇز جىلدىڭ جارتىسىنان استام ۋاقىت بايقوڭىردان عارىش كەمەلەرى مەن قۇرىلعىلارى ۇشىرىلىپ كەلەدى. ميسسياسىن اياقتاعان عارىشكەرلەردى ءبىزدىڭ جەرىمىز قۇشاق جايا قارسى الۋدا.
قازاقستان مەن رەسەيدىڭ بىرلەسكەن عارىشتىق باعدارلامالاردى جۇزەگە اسىرىپ جاتقانىنا قۋانىشتىمىن. ءبىزدىڭ جەمىستى قارىم-قاتىناستارىمىز ءبىزدىڭ مەملەكەتتەر مەن حالىقتاردىڭ, بارشا ادامزاتتىڭ يگىلىگى ءۇشىن جالعاسىن تاۋىپ, دامي بەرەتىنىنە سەنىمدىمىن, دەلىنگەن جەدەلحاتتا.