قۇرلىقتىق حوككەي ليگاسىنىڭ تۇراقتى چەمپيوناتىندا استانانىڭ «بارىسى» ءوز ايدىنىندا ءنوۆوسىبىردىڭ «سيبير» كومانداسىن قابىلداپ, 2:1 ەسەبىمەن باسىم ءتۇستى.
كەزدەسۋدىڭ 8-مينۋتىندا «سيبير» حوككەيشىسى كيريلل ۆورابەۆ قاقپانى ءدال كوزدەپ, ەسەپ اشتى. الايدا, بارىن سالىپ, العا ۇمتىلعان استانالىقتار 14-مينۋتتا-اق تارازى باسىن تەڭەستىرىپ ۇلگەردى. بۇل رەتتە داستين بويدتىڭ سوققىسىنا قوناقتار قارسى تۇرا المادى.
وسىدان كەيىن قالعان ەكى كەزەڭدە بىرقاتار شابۋىل ۇيىمداستىرىلعانمەن, ەسەپ وزگەرىسسىز قالدى. دەگەنمەن, وۆەرتايمدا نايدجەل دوۋس مەرگەندىگىمەن تانىلىپ, كومانداسىنا جەڭىس سىيلادى.
قورجىنىندا 89 ۇپايى بار «بارىس» «شىعىس» كونفەرەنتسياسىندا 5-ورىندا كەلەدى. ال 9-ورىندا تۇرعان «سيبيرمەن» قازىر ون ۇپاي ءبولىپ تۇر. دەمەك, ەدۋارد زانكوۆەتس شاكىرتتەرى قالعان ەكى كەزدەسۋدە جەڭىلسە دە, پلەي-وفف كەزەڭىنەن شەت قالمايدى. ەرتەڭ ەلوردالىقتار نوۆوكۋزنەتسكىنىڭ «مەتاللۋرگ» ۇجىمىمەن كۇش سىناسسا, 18 اقپاندا «اۆانگاردتى» قابىلدايدى.
ايتا كەتەيىك, قازىرگى ۋاقىتتا پلەي-وفف كەزەڭىنە ون كوماندا ءوتىپ تۇر. «باتىس» كونفەرەنتسياسىندا – سكا, تسسكا, «لوكوموتيۆ», ماسكەۋدىڭ «ديناموسى», «تورپەدو» جانە مينسكىنىڭ «ديناموسى», ال «شىعىستا» – ماگنيتوگورلىق «مەتاللۋرگ», «اۆانگارد», «اك بارس», «تراكتور» جانە «بارىس».