تەننيستەن قازاقستاننىڭ قىزدار قۇراما كومانداسى فەدەراتسيا كۋبوگىنىڭ ەكىنشى الەمدىك توبىندا پلەي-وفف كەزەڭىنە شىقتى. جولداما ءۇشىن جاپونيا كومانداسىمەن بولعان ويىندا ءبىزدىڭ تەننيسشى قىزدارىمىز ءۇش ماتچ بويىنشا 2:1 ەسەبىمەن جەڭىسكە جەتتى.
ءبىرىنشى ويىندا گالينا ۆوسكوبوەۆا جاپون تەننيسشىسى ناومي وساكادان 6:1, 2:6, 3:6 ەسەبىمەن جەڭىلىپ قالدى. جاعدايدى يۋليا پۋتينتسەۆا تۇزەدى. ول قارسىلاسى ميساكي دويدى 7:6, 6:2 ەسەبىمەن تىزە بۇكتىردى. ال شەشۋشى ويىندا ياروسلاۆا شۆەدوۆا مەن گالينا ۆوسكوبوەۆا جۇبى قارسىلاستارىنان 6:3, 7:6 ەسەبىمەن باسىم ءتۇستى.
ەسكە سالار بولساق, قازاقستاندىق تەننيسشى قىزدار وسىمەن ەكىنشى رەت فەدەراتسيا كۋبوگىنىڭ پلەي-وفف كەزەڭىنە جولداما الىپ وتىر.
قايرات ءابىلدينوۆ, «ەگەمەن قازاقستان»