پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆ س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە بولدى, – دەپ حابارلادى پرەمەر-ءمينيستردىڭ ءباسپاسوز قىزمەتى.
قازاقستان حالقىنا جولداۋىندا مەملەكەت باسشىسى اۋىل شارۋاشىلىعى مينيسترلىگىنىڭ الدىنا ءوندىرىس سۇرانىسىنا قاجەتتى اگرارلىق عىلىمي زەرتتەۋلەرگە ينۆەستيتسيا تارتۋ كولەمىن ارتتىرۋدى تاپسىرعان بولاتىن.
ا.مىرزاحمەتوۆ وقۋ ورنىنىڭ پروفەسسورلىق-وقىتۋشىلىق قۇرامى جانە ستۋدەنتتەرىمەن كەزدەسىپ, قازاقستاندا اگرارلىق عىلىمنىڭ دامۋ پەرسپەكتيۆالارىن تالقىلادى.
سونداي-اق, پرەمەر-ءمينيستردىڭ ورىنباسارى قازاقستان-بەلارۋس ينجەنەر مامانداردى قايتا دايىنداۋ ورتالىعىنىڭ تراكتور پاۆيلونىندا, قازاقستان-گەرمانيا ءدال ەگىنشىلىك ورتالىعىندا, جەم دايىنداۋدى مەحانيكالاندىرۋ جانە اگروينجەنەريا, استىق جينايتىن كومبايندار زەرتحاناسىندا جانە دە ەت پەن ءسۇت وڭدەيتىن وقۋ-تاجىريبەلىك تسەحىندا بولدى.
ا.مىرزاحمەتوۆ كوپ ءتىلدى وقىتۋ توبىنىڭ ساباعىنا كىرىپ, قازاقستان-بەلارۋس ورتالىعى جوباسى بويىنشا بەلارۋس مەملەكەتتىك اگروتەحنيكالىق ۋنيۆەرسيتەتىندە وقىپ جاتقان ستۋدەنتتەرمەن ونلاين رەجىمدە سۇحباتتاسۋ ساتىنە كۋا بولدى.