ەلباسى نۇرسۇلتان نازارباەۆ حالىققا كەزەكتى جولداۋىن ۇسىندى. قۇجاتتا قاراپايىم حالىق يگىلىگى ءۇشىن قولعا الىنۋى ءتيىس جۇمىستار از ەمەس. سولاردىڭ ىشىندە جولداۋدا: «جاڭا تەحنولوگيالاردىڭ ەنگىزىلۋىنە بايلانىستى ءداستۇرلى سالالاردا ەڭبەك رەسۋرستارى بوساپ قالاتىن بولادى. سوندىقتان جاڭا يندۋستريا قۇرىپ, جۇمىسپەن قامتۋدىڭ جانە ازاماتتاردىڭ ناقتى تابىسىن ءوسىرۋدىڭ قوسىمشا مۇمكىندىگى بولۋعا ءتيىس», – دەپ ەرەكشە اتاپ كورسەتىلگەن.
اسىرەسە, جاڭا نىسانداردىڭ پايدا بولىپ, ولاردىڭ پايدالانۋعا بەرىلۋى دە الدىمەن تۇرعىندار ءۇشىن ءتيىمدى. بۇگىندە اقتوبە وڭىرىندە تالاي جاڭا الىپ جوبالاردىڭ جۇزەگە اسىرىلىپ جاتقانىنا كۋا بولىپ ءجۇرمىز. سونىڭ ىشىندە تەمىر جول بويىندا پايدا بولعان تىڭ دۇنيەلەر قانشاما. ءبىر عانا شالقار – بەينەۋ تەمىر جولىنىڭ اينالاسىندا ونداعان جاڭا ەلدى مەكەندەر پايدا بولىپ, جۇزدەگەن ادام جۇمىسپەن قامتىلىپ جاتىر. مۇنىڭ ءوزى, قاراپ وتىرساق, ەڭ الدىمەن قاراپايىم حالىق ءۇشىن ءتيىمدى. ويتكەنى, بۇگىنگى زاماندا جۇمىس تابۋ وڭاي ەمەس. ەكىنشى جاعىنان, بۇرىن الماتىدان كەلە جاتقان جولاۋشى قاندىاعاشتى اينالىپ, بەينەۋ جولىنا تۇسەتىن. بۇگىندە شالقاردان بۇرىلعان سوڭ, اتىراۋ, ماڭعىستاۋ وبلىستارىنا تىكەلەي وتەدى. بۇل دا ءبىر حالىق يگىلىگى ءۇشىن جاسالعان جۇمىس بولىپ وتىر.
اقتوبەنىڭ ىرگەسىندە بوي كوتەرگەن رەلس ارقالىعى زاۋىتىنىڭ ونىمدەرىن دانەكەرلەپ, ۇزىن رەلس شىعاراتىن كاسىپورىننىڭ ىرگەتاسى بىلتىر قالاندى. ونىڭ ەكونوميكاعا, حالىققا تيىمدىلىگى ايتارلىقتاي زور. باستىسى, سول قۇرىلىس نىساندارىنا ونداعان-جۇزدەگەن ادام جۇمىلدىرىلۋدا. ىسكە قوسىلعان سوڭ دا جۇزدەگەن ادام جۇمىسپەن قامتاماسىز ەتىلمەك. قازاقستاننىڭ ءۇشىنشى جاڭعىرۋى وسىنداي ىلكىمدى جوبالاردى ىسكە قوسىپ, حالىقتى جۇمىسپەن قامتۋدى كوزدەيتىنى ايتپاسا دا تۇسىنىكتى.
قانات ءالماحانوۆ,
اقتوبە جۇك تاسىمالى بولىمشەسى كاسىپوداق كوميتەتىنىڭ توراعاسى
اقتوبە