اقپارات جانە كوممۋنيكاتسيالار ءمينيسترى داۋرەن اباەۆ دۋبايدا ءوتىپ جاتقان الەمدىك ۇكىمەت ءسامميتى شەڭبەرىندە بىرىككەن اراب امىرلىكتەرىنىڭ ەكونوميكا ءمينيسترى سۇلتان يبن سايد ءال-مانسۋري مىرزامەن كەزدەسۋ وتكىزدى, دەپ حابارلايدى مينيسترلىكتىڭ ءباسپاسوز قىزمەتى.
كەزدەسۋ بارىسىندا مينيستر تسيفرلاندىرۋ سالاسىنداعى تاجىريبەمەن ءبولىسىپ, «ساندىق قازاقستان» باعدارلاماسى, Smart-city تەحنولوگياسىن دامىتۋ شەڭبەرىندە استانا حابىن قۇرۋ تۋرالى ايتىپ بەردى. تاراپتار ساندىق ترانسفورماتسيانى ىلگەرىلەتۋگە جانە دامىتۋعا باعىتتالعان IT جانە جوعارى تەحنولوگيالار سالاسىندا ءوزارا ىنتىماقتاستىق جۇرگىزۋگە كەلىستى.
بۇدان بولەك, داۋرەن اباەۆ ءباا باقىت ءمينيسترى وحۋد ءال-رۋميمەن كەزدەستى. تاراپتار حالىققا مەملەكەتتىك قىزمەتتەر كورسەتۋ, ۇسىنىلاتىن راسىمدەردى جەڭىلدەتۋ پروتسەسىن جاڭعىرتۋ, سونداي-اق مەملەكەتتىك قىزمەتتەر سالاسىنداعى مەنەدجمەنت ماسەلەلەرى بويىنشا ەكىجاقتى ىنتىماقتاستىق بارىسىن جانە ونى ىلگەرىلەتۋ جولدارىن تالقىلادى.