كەزدەسۋگە م.جولداسبەكوۆ, ك.ساعاديەۆ, ر.شىرداباەۆ, و.ابدىكارىموۆ, ب.ىزمۇحامبەتوۆ, م.قاسىمبەكوۆ قاتىستى دەپ حابارلايدى اقوردانىڭ رەسمي سايتى.
باسقوسۋدا كونستيتۋتسيالىق رەفورمالارعا, اۋىل شارۋاشىلىعى مەن شارۋاشىلىعىن, دەنساۋلىق ساقتاۋ سالاسىن, عىلىم مەن ءبىلىمدى, ورتا جانە شاعىن بيزنەستى دامىتۋعا جانە جەكەشەلەندىرۋگە قاتىستى ەكونوميكا, الەۋمەت, قوعام ماسەلەلەرى تالقىلاندى.
ەلباسى تاۋەلسىزدىكتىڭ 25 جىلىندا قازاقستان ءجۇرىپ وتكەن كۇردەلى جولى تۋرالى ايتا كەلىپ, ەلدىڭ بولاشاق دامۋىنىڭ نەگىزگى جولدارى تۋرالى ءسوز قوزعادى.
- قازاقستان بۇگىندە الەم جۇرتشىلىعى بىلەتىن ەلگە اينالدى, ەكونوميكانىڭ بەتالىسى جاقسى. ەندى بار جەتىستىكتى «ءۇشىنشى جاڭعىرتۋ» جولداۋىندا بەلگىلەنگەن ماقساتتارعا جەتۋ ءۇشىن پايدالانۋ كەرەك, - دەدى نازارباەۆ.
مەملەكەت باسشىسى قازاقستان ازاماتتارى بەتپە-بەت كەلىپ وتىرعان قازىرگى زامان قيىندىقتارىنا نازار اۋداردى.
- نارىق جولىن تاڭداعان ءبىزدىڭ قوعام الدىندا تۇبەگەيلى جاڭا مىندەتتەر تۇر. ەلدىڭ بولاشاق دامۋى ولاردىڭ ءتيىمدى شەشىلۋىنە بايلانىستى. جاھاندىق ەكونوميكا داۋىرىندەگى نەگىزگى ماسەلە يننوۆاتسيا بولىپ وتىر. يندۋستريالىق توڭكەرىستەر ءبىزدى اينالىپ وتپەۋى ءتيىس. ەكونوميكامىزعا يننوۆاتسيالىق تەحنولوگيالاردى سىڭىرە ءبىلۋىمىز كەرەك, - دەدى نازارباەۆ.
پرەزيدەنت بۇل مىندەتتەردى ورىنداۋ ءۇشىن ءتيىستى قارجى كەرەك ەكەنىن ايتتى.
- يننوۆاتسيالىق تەحنولوگيالاردى جاساۋعا قارجى بولمەسەك, الەمدە قالىپتاسىپ وتىرعان جاڭا ەكونوميكالىق ۇردىسكە ىلەسە الماي, كەنجەلەپ قالۋىمىز مۇمكىن. جاپپاي ءوندىرىستى دامىتۋ ءۇشىن قاجەت تەحنولوگيالاردى ەنگىزۋ ارقىلى ەڭبەك ونىمدىلىگىن ارتتىرۋىمىز كەرەك. بۇل ءۇشىن عىلىمي-زەرتتەۋ ينستيتۋتتارىن قۇرۋ قاجەت. ولار كاسىپورىندار جانە ەلدىڭ جەتەكشى وقۋ ورىندارى جانىنان اشىلاتىن بولادى. مىسالى, «الاتاۋ» تەحنوباعى, نازارباەۆ ۋنيۆەرسيتەتى جانىنان قۇرىلۋى مۇمكىن, - دەدى پرەزيدەنت.
كەزدەسۋگە كەلگەن مەملەكەت قايراتكەرلەرى مەملەكەت باسشىسى ۇسىنعان مەملەكەتتىك بيلىك تارماقتارى اراسىنداعى وكىلەتتىكتەردى قايتا ءبولۋ رەفورمالارىن قولدايتىندارىن جەتكىزدى. كوپتەگەن باستامالاردىڭ, ونىڭ ىشىندە اسىرەسە پارلامەنتتىڭ قۇزىرەتىن كۇشەيتۋ, دەربەستىك پەن جاۋاپكەرشىلىكتى ارتتىرۋ باعىتىنداعى ۇسىنىستاردىڭ زامان تالابىنا ساي ەكەنىن ايتتى.
بۇعان قوسا, كەزدەسۋگە قاتىسۋشىلار رەسپۋبليكالىق جانە جەرگىلىكتى بيۋدجەت قاراجاتىنىڭ جۇمسالۋىنا قوعامدىق باقىلاۋ جاساۋعا, سالالىق باعدارلامالاردىڭ ورىندالۋىنا, جەر رەفورماسىنا, سىبايلاس جەمقورلىققا قارسى سانانى ورنىقتىرىپ, «مۇلدەم توزبەۋشىلىك» ساياساتىن ءتيىمدى جۇزەگە اسىرۋعا, سونداي-اق بەس ينستيتۋتسيونالدىق رەفورمانى ىسكە اسىرۋ بويىنشا ۇلت جوسپارىندا بەلگىلەنگەن مىندەتتەردى كەزەڭ-كەزەڭمەن ورىنداۋعا قاتىستى تۇيتكىلدى ماسەلەلەرگە توقتالدى.