ەگىندىكول اۋدانىنىڭ تۇرعىندارى ەجەلدەن ۇيىمشىلدىعىمەن, ەلىمىزدەگى وڭ وزگەرىستەرگە وزىندىك ەكپىن بەرەر بەلسەندىلىگىمەن ەرەكشەلەنىپ تۇرادى. باستى سەبەپ – جاقسى ءومىر ءسۇرۋ ءۇشىن جاقسى ەڭبەك ەتىپ, جاقسىلىقتاردى ءوز قولىمەن جاساۋدى مۇرات ساناۋدا دەپ بىلەمىن. تىڭ كوتەرۋ جىلدارى وسى ولكەگە جاس اگرونوم رەتىندە جولدامامەن كەلگەن مەن ءۇشىن بۇل تىرشىلىك ماعىناسىن ارتتىرار ۇلكەن قاسيەت رەتىندە, جىگەرلەندىرۋشى قاسيەتكە يە ۇعىم.
ولكەمىز اسا ماڭىزدى وزگەرىستەر قۇشاعىندا. ەل تاۋەلسىزدىگىنىڭ تابارىك تالاپتارىنان تۋىنداعان جەمىستەردى كورۋدىڭ قانشالىقتى قىمبات تا عانيبەت ەكەندىگىن تۇشىنۋ دا باقىت. كۇنى ەرتەڭ كەزەكتەن تىس پرەزيدەنتتىك سايلاۋ بولماق. ەلىمىزگە ايگىلى ءتورت ازامات باسەكەگە ءتۇسكەلى تۇر. بۇل – باقتالاستىق ەمەس. وتانىمىزدىڭ كەمەلدىگىن بايقاتاتىن قادام دەپ باعالايمىن. ەندى جەر ءجۇزى نازارىنداعى سايلاۋىمىزدى تالاپ دارەجەسىندە وتكىزۋ ۇلىق پارىزىمىز دەپ بىلەمىن.
اۋدانىمىزدا 18 سايلاۋ ۋچاسكەسى قۇرىلىپ, داۋىس بەرەتىندەردىڭ ءتىزىمى مۇقيات قاتتالدى. سونىڭ 30 پايىزى زەينەت جاسىنداعى ازاماتتار بولعاندىقتان, اقساقالدار القاسىنىڭ توعىز مۇشەسىندە دە تىنىم جوق. سايلاۋالدى جينالىس, كەزدەسۋ, باسقا دا ساياسي شارالاردىڭ بارلىعىنا قاتىسىپ, اعالىق اقىل-پايىمىمىزدى ورتاعا سالدىق. اۋماقتىق سايلاۋ كوميسسياسىنىڭ توراعاسى ومىرزاق جۇمانعا راحمەت, ءبىزدى بىردە-ءبىر شارادان تىس قالدىرمايدى. جۋىردا اۋدان ورتالىعىنداعى №317 سايلاۋ ۋچاسكەسىندە بيىل تۇڭعىش رەت داۋىس بەرەتىن 8 جاسپەن كەزدەسۋ ۇيىمداستىرىلدى. مەن ولارعا سوناۋ قىرقىنشى جىلدارى اقمولا كاسىپتىك مەكتەبىندە وقىپ ءجۇرىپ, ءبىرىنشى رەت داۋىس بەرگەنىمدى اڭگىمەلەپ بەردىم. سايلاۋلاردىڭ ەرەكشەلىگىن تۇسىندىرۋگە تىرىستىم. قىزىق جاعداي بولدى. كەزدەسۋ ۇستىندە ۋچاسكە ورنالاسقان №1 قازاق ورتا مەكتەبىنىڭ مۇعالىمى جاندوس الياكباروۆ 3 ءساۋىر كۇنى 25 جاسقا تولادى ەكەن. شاراعا قاتىسقان سەگىز جاس (اۋدان بويىنشا – 78) جاندوس اعالارىنىڭ تۋعان كۇنىن ەرەكشە وقيعا رەتىندە اتاپ وتۋگە شەشىم جاسادى. ماسەلە وندا ەمەس, ماسەلە ەرتەڭگى كۇنىمىزدىڭ ايشىقتى وقيعالارعا, جاقسى ۇمىتتەرگە تولى بولاتىندىعىنا سەنىمنىڭ مولدىعىندا دەپ ۇقتىم.
جولدىباي بالتابەكوۆ, اقساقالدار القاسىنىڭ توراعاسى.
اقمولا وبلىسى, ەگىندىكول اۋدانى.