كەشە سەنات توراعاسى قاسىم-جومارت توقاەۆتىڭ جەتەكشىلىگىمەن وتكەن پالاتانىڭ كەزەكتى پلەنارلىق وتىرىسىندا بەس ماسەلە تالقىعا ءتۇستى. ونىڭ دەنى حالىقارالىق قۇجاتتاردى بەكىتۋگە قاتىستى بولدى.
الدىمەن كۇن تارتىبىندە «قازاقستان رەسپۋبليكاسى مەن يتاليا رەسپۋبليكاسى اراسىنداعى ستراتەگيالىق ارىپتەستىك تۋرالى شارتتى راتيفيكاتسيالاۋ تۋرالى» زاڭ جوباسى قارالدى. شارت ەكونوميكالىق, ساياسي, عىلىمي-تەحنيكالىق جانە وزگە دە سالالارداعى ىنتىماقتاستىقتى تەرەڭدەتۋدى كوزدەيدى. وعان 2009 جىلدىڭ 5 قاراشاسىندا ريم قالاسىندا قول قويىلعان. قۇجاتقا ەلىمىز باستاماشى بولسا, ول «ەۋروپاعا جول» مەملەكەتتىك باعدارلاماسى اياسىندا جۇزەگە اسىپ وتىر.
جالپى, يتاليا قازاقستاننىڭ بارلىق باستامالارىن قولداپ كەلە جاتقان ەلدەردىڭ قاتارىنان سانالادى. ەلىمىزدىڭ ساۋدا ءارىپتەستەرىنىڭ ىشىندە دە يتاليا الدىڭعى ورىنداردىڭ ءبىرىن الادى. ەكى ەل اراسىنداعى تاۋار اينالىمى وتكەن جىلى 11 ميلليارد اقش دوللارىن قۇراپ, بۇرناعى جىلمەن سالىستىرعاندا 30 پايىزعا ارتقان.
سەناتورلار زاڭ جوباسىنىڭ مەملەكەتتىك تىلدەگى ماتىنىنە قاتىستى ماسەلەنى پىسىقتاپ العان سوڭ ونى قابىلداعان ءجون دەپ تاپتى.
كەلەسى كەزەكتە «شانحاي ىنتىماقتاستىق ۇيىمىنا مۇشە مەملەكەتتەردىڭ تەرروريزمگە قارسى قۇرىلىمدارى ءۇشىن كادرلار دايارلاۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى قارالدى. كەلىسىم اتالعان ۇيىمعا مۇشە مەملەكەتتەردىڭ تەرروريزمگە قارسى قۇرىلىمدارى ءۇشىن قۇقىقتىق نەگىزدەر جاساۋمەن قاتار, كادرلار دايارلاۋ دەڭگەيىن ارتتىرۋدى كوزدەيدى. سونداي-اق تەرروريزمگە قارسى ءىس-قيمىل سالاسىندا, ونىڭ جاڭا قىر كورسەتۋلەرى مەن قاتەرلەرىنە قارسى كۇرەستە حالىقارالىق ىنتىماقتاستىقتى نىعايتادى. دەپۋتاتتار اتالعان زاڭدىق قۇجاتتىڭ ماڭىزىن ەسكەرىپ, ونى زاڭدىق تۇرعىدان بەكىتتى.
«پاتەنت قۇقىعى تۋرالى شارتتى راتيفيكاتسيالاۋ تۋرالى» زاڭ جوباسىنىڭ قارالۋى عىلىمي-تەحنيكالىق جاڭالىقتاردىڭ تۇرمىسىمىزعا كەڭىنەن ەنىپ وتىرعاندىعىمەن بايلانىستى. شارتتىڭ ماقساتى الەمدەگى ەڭ وزىق تەحنولوگيالاردى قولداۋ بولسا, ول زياتكەرلىك مەنشىكتى قورعاۋمەن تىكەلەي بايلانىستى ەكەنى ءسوزسىز. پاتەنت قۇقىعى تۋرالى شارتتى (PLT) 2000 جىلعى 1 ماۋسىمدا كونسەنسۋس ارقىلى 140-تان استام ەلدىڭ قاتىسۋىمەن دۇنيەجۇزىلىك زياتكەرلىك مەنشىك ۇيىمىنىڭ (دزمۇ) اياسىندا قۇرىلعان ديپلوماتيالىق كونفەرەنتسيا قابىلداعان-دى. ونىڭ ەرەجەلەرى 1970 جىلعى 19 ماۋسىمداعى پاتەنتتىك كووپەراتسيا تۋرالى شارتقا تىعىز بايلانىستى بولسا, ەلىمىز وعان 1993 جىلى قوسىلدى. PLT شارتى ۇسىنىلاتىن قۇجاتتارعا قويىلاتىن فورمالدى تالاپتاردى بىرىزدىلەندىرىپ جانە وڭايلاتىپ, قۇجاتتار رەسىمدەۋ كەزىندە قاتە جىبەرۋدى ازايتادى. بۇل پاتەنت قۇقىعىن جوعالتۋ جاعدايلارىنا دا قاتىستى. زاڭ جوباسى ءبىراۋىزدان قولداۋ تاپتى.
تالقىلاۋ ناتيجەسىندە دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قارۋلى كۇشتەردىڭ, باسقا دا اسكەرلەر مەن اسكەري قۇرالىمداردىڭ ارسەنالدارى, بازالارى مەن قويمالارى جانىنداعى تىيىم سالىنعان ايماقتار مەن تىيىم سالىنعان اۋداندار ماسەلەلەرى بويىنشا تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا قابىلدادى. زاڭ جوباسى وق-ءدارى مەن جارىلعىش زاتتاردى ساقتاۋدا قاۋىپسىزدىكتى قامتاماسىز ەتۋ ماقساتىندا قارۋلى كۇشتەردىڭ, باسقا دا اسكەرلەر مەن اسكەري قۇرالىمداردىڭ ارسەنالدارى, بازالارى مەن قويمالارى جانىنداعى تىيىم سالىنعان ايماقتار مەن تىيىم سالىنعان اۋداندار ماسەلەلەرى بويىنشا نورماتيۆتىك قۇقىقتىق اكتىلەردى بەكىتۋ ءجونىندەگى ۇكىمەت وكىلەتتىگىن تولىقتىرۋعا باعىتتالعان.
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە ۋاكىلەتتى مەملەكەتتىك ورگاندار مەن قازاقستان رەسپۋبليكاسى ۇكىمەتىنىڭ تەكسەرىلەتىن سۋبەكتىلەرگە قويىلاتىن تالاپتاردى بەلگىلەيتىن نورماتيۆتىك قۇقىقتىق اكتىلەردى قابىلداۋ قۇزىرەتتەرىن قايتا قاراۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا وزگەرىستەر مەن تولىقتىرۋلار ەنگىزىلىپ, ماجىلىسكە جىبەرىلدى.
اسقار تۇراپباي ۇلى.