كەشە پارلامەنت سەناتىنىڭ توراعاسى قاسىم-جومارت توقاەۆ قازاقستان رەسپۋبليكاسىنداعى كەزەكتەن تىس پرەزيدەنتتىك سايلاۋدى بايقاۋ جونىندەگى ەقىۇ-نىڭ قىسقا مەرزىمدى بايقاۋشىلارى ميسسياسىنىڭ ارنايى ۇيلەستىرۋشىسى, ەقىۇ پارلامەنتتىك اسسامبلەياسى بايقاۋشىلار دەلەگاتسياسىنىڭ باسشىسى تونينو پيتسۋلانى قابىلدادى, دەپ حابارلادى سەناتتىڭ ءباسپاسوز قىزمەتى.
ەقىۇ پا بايقاۋشىلار دەلەگاتسياسىن قابىلداي وتىرىپ, توراعا حالىقارالىق قوعامداستىق تاراپىنان پرەزيدەنتتىك سايلاۋعا ەرەكشە ىقىلاس بايقالىپ وتىرعانىن اتاپ ءوتتى. سايلاۋ مونيتورينگىنە تەك ەقىۇ پا تاراپىنان 80-نەن استام بايقاۋشىلار قاتىسادى.
وقيعانىڭ قازاقستان تاريحىنداعى ماڭىزدىلىعىن اتاپ وتە كەلىپ, ق.توقاەۆ: «بۇل سايلاۋ ناۋقانى اشىق ءارى تولەرانتتى جاعدايدا وتەدى جانە حالىقارالىق نەگىزگى ەرەجەلەر مەن قاعيدالارعا سايكەس كەلەدى», دەپ مالىمدەدى.
«پرەزيدەنتتىككە ءتورت ءۇمىتكەردىڭ ءبارى وزدەرىنىڭ سايلاۋالدى ناۋقانىن شىنايى كورسەتىپ جاتقان بۇقارالىق اقپارات قۇرالدارىنا بىردەي قول جەتكىزە الدى», – دەدى توراعا جانە ول «قازاقستاندىق بيلىك سايلاۋ كەزەڭى ءمولدىر جانە اشىق ءوتۋ ءۇشىن بارلىق ءمۇمكىندىكتى جاساۋعا كۇش سالۋدا», دەپ اتاپ ءوتتى. ق.توقاەۆ الداعى پرەزيدەنتتىك سايلاۋ اشىق جانە ءادىل وتەتىنىنە سەنىم ءبىلدىردى.
ت.پيتسۋلا ميسسيا پرەزيدەنتتىك سايلاۋ مونيتورينگىن جۇرگىزۋدەگى جاۋاپكەرشىلىگىن تولىق ۇعىناتىنىن جانە قازىرگى كەزدە جۇمىسقا كىرىسكەنىن اتاپ ءوتتى.