ۇلتتىق ۇلاننىڭ «وڭتۇستىك» وڭىرلىك قولباسشىلىعىنا قاراستى 5571 اسكەري ءبولىمىنىڭ ساپتىق الاڭىندا ريو وليمپياداسىنىڭ چەمپيوندارى دميتري بالاندين, نيجات راحيموۆ جانە بىرقاتار سپورتشىلار سالتاناتتى تۇردە اسكەري انت قابىلداپ, رەسمي تۇردە ۇلتتىق ۇلان قاتارىنا ءوتتى. بۇل تۋرالى قازاقپارات حابارلادى.
انت قابىلداۋ سالتاناتتى شاراسىندا اسكەري ءبولىمنىڭ جاۋىنگەرلىك تۋى شىعارىلدى. سپورتشىلاردى قۇتتىقتاۋعا ۇلتتىق ۇلاننىڭ «وڭتۇستىك» وڭىرلىك قولباسشىلىعى قولباسشىسىنىڭ مىندەتىن اتقارۋشى گەنەرال-مايور اندرەي كاسكەلەنوۆ كەلدى.
اسكەري انت قابىلداعان دميتري بالاندين ەرەكشە كوڭىل كۇيگە بولەنگەنىن ايتىپ, اعىنان جارىلدى.
«ۇلاندىق جاۋىنگەر اتانعانىما شىن جۇرەكتەن قۋانىشتىمىن. بۇرىن-سوڭدى قولىما قارۋ ۇستاپ كورمەگەندىكتەن اسكەري انت قابىلداۋ ساتىندە ءسال قوبالجىدىم. بىراق وتان الدىندا وزگە دە ساربازدار سەكىلدى اسكەري كيىم كيىپ انت قابىلداۋ ءساتى ماعان ەرەكشە اسەر ەتتى. وزىمە ارتىلعان مىندەتتەردى ابىرويمەن ورىنداپ, ەلىمىزدىڭ, ۇلتتىق ۇلاننىڭ نامىسىن قاشان دا بيىك ۇستاۋعا تىرىسامىن. انتىما ادال بولامىن, قازاقستان رەسپۋبليكاسىنا قىزمەت ەتەمىن!» – دەدى وليمپيادا چەمپيونى.