استىق كولەمىن ارتتىراتىن باستى شارتتاردىڭ ءبىرى – جاڭا, ونىمدىلىگى جوعارى سۇرىپتاردى تاۋىپ, ولاردى وندىرىسكە جىبەرۋ عوي. وسى ورايدا الەمدە بۇگىنگى تاڭدا تاقىر ءداندى ارپانى قولدانۋدىڭ جوعارى ەكەنىن ايتقىمىز كەلەدى. ونىڭ تيىمدىلىگى مىنا جاعدايلاردان كورىنەدى:
دانىنەن جاسالعان قۇراماجەم مەن ۇننىڭ ەكونوميكالىق ءتيىمدىلىگى وتە جوعارى; قۇرعاقشىلىققا ءتوزىمدى جانە بارلىق تابيعي جاعدايلارعا شىدامدى; اۋىل شارۋاشىلىعى مينيسترلىگىنىڭ دەرەكتەرىنە قاراعاندا, 2000-2015 جىلدار ارالىعىندا اۋا رايىنىڭ قولايلىلىعى جاعدايىندا بۇل ارپانىڭ ونىمدىلىگى بيدايعا قاراعاندا گەكتارىنان 1,5-2,5 تسەنتنەر جوعارى بولعان. سونىمەن قاتار, جۇرەك-قان تامىرلارى اۋرۋلارىن, قانت ديابەتى مەن قاتەرلى ىسىك دەرتتەرىن قايتاراتىن ديەتالىق تاعامدارعا قاجەتتى بيولوگيالىق كومپونەنتتەر دە مۇندا جەتكىلىكتى.
وكىنىشكە قاراي, اكادەميك باراەۆ اتىنداعى استىق شارۋاشىلىعىنىڭ عىلىمي-ءوندىرىستىك ورتالىعىندا ءوسىرىلىپ شىعارىلعان ارپانىڭ وسى باعالى سۇرپى قازىر اقمولا وبلىسىنىڭ 6624 گەكتارعا تەڭ اۋماقتارىندا عانا وسىرىلەدى. سوندىقتان ءبىز – ماجىلىستەگى ءارىپتەستەرىم ۆ.بوجكو, ر.كيم جانە ش.نۇرىموۆ ءبارىمىز استىق ءوندىرۋ سالاسىن ءارتاراپتاندىرۋ شەڭبەرىندە تاقىر ءداندى ارپانى ەت دايىنداۋعا قولدانىلاتىن قۇراماجەمدى جەتىلدىرۋ رەتسەپتۋراسىنىڭ قاتارىنا ەنگىزۋ, سونىمەن قاتار, ونى استىقتى وبلىستارعا ءوسىرۋدى ۇسىنۋ قاجەت دەپ پايىمدايمىز. تاقىر ءداندى ارپانىڭ تۇقىمىن باپتايتىن كاسىپورىندى بەلگىلەپ, وعان قارجىلىق قولداۋ ءبىلدىرۋ دە اسا كەرەك قوي دەپ ويلايمىز.
وسى ارپا ءدانىنىڭ جۇرەك-قان تامىرلارى, قاتەرلى ىسىك جانە قانت ديابەتى ناۋقاستارىنا قارسى ەمدىك قاسيەتى بار ەكەنىن ەسكەرە وتىرىپ, ونى وسى اۋرۋدان زارداپ شەگەتىندەردىڭ, سونىڭ ءىشىندە, اسىرەسە, بالالاردىڭ اس مازىرىنە قوسۋ ءمۇمكىندىكتەرىن زەرتتەۋ جۇمىسىن جۇرگىزۋدى دەنساۋلىق ساقتاۋ جانە الەۋمەتتىك دامۋ مينيسترلىگىنە تاپسىرسا دا ۇتىلمايتىنىمىز انىق.
سەرگەي زۆولسكي,
ءماجىلىس دەپۋتاتى