اركىمنىڭ تاعدىرى ارقالاي, ەشكىم بەينەتتى, مۇگەدەكتىكتى سۇراپ المايدى, ال تاعدىرىنا كەز بولعان ەكەن – كوتەرۋى ءتيىس! ەلىمىزدە مۇمكىندىگى شەكتەۋلى جانداردىڭ سپورتپەن اينالىسۋىنا جول اشىلعان, ولار سپورتتىڭ بىرنەشە تۇرلەرى بويىنشا پاراليمپيادالارعا قاتىسىپ, ءتۇرلى جاتتىعۋ ورىندارىندا شىنىعىپ ءجۇر.
ماڭعىستاۋداعى مۇگەدەكتەر سپورت كلۋبىنىڭ ديرەكتورى نۇرالى ق ۇلىشوۆ – رەسپۋبليكالىق «مەرەيلى وتباسى» بايقاۋىنىڭ جەڭىمپازى. ۇلگىلى وتباسىنىڭ وتاعاسى بولا العان ازامات وڭىردە تالايلى تاعدىر يەلەرىنىڭ قوعامنان ءبولىنىپ قالماي ۋاقىتىن كوڭىلدى وتكىزۋىنە ءارى دەنساۋلىعىن شىڭداۋىنا كوپ كوڭىل ءبولىپ كەلەدى. ن.ق ۇلىشوۆ ءمۇمكىندىگى شەكتەۋلى جاندارعا قاتىستى تاعى ءبىر جاعىمدى جاڭالىقتى جاريا ەتتى.
اقتاۋ قالاسىندا وتكەن جىلدىڭ تامىز ايىندا باستالعان مۇگەدەكتەرگە ارنالعان سپورت كەشەنىنىڭ قۇرىلىسى جىل سوڭىندا اياقتالعان. مۇقتاج جاندار 15 جىل كۇتكەن زالعا جەرگىلىكتى بيۋدجەتتەن 108 ميلليون تەڭگە ءبولىنىپتى. وڭىردەگى مۇگەدەكتەر سپورت كلۋبىنا 167 ادام تىركەلگەن, جىل سوڭىنا دەيىن ولاردىڭ سانى 300-گە جەتەدى دەپ كۇتىلۋدە. ال ۆولەيبول, ۇستەل تەننيسى, شاحمات پەن دويبى ويناۋعا مۇمكىندىك بەرەتىن, كيىم اۋىستىراتىن ورىن مەن جۋىنىپ-شايىناتىن بولمەسى بار, ەدەنى جىلىتىلعان زالعا قازىر مۇمكىندىگى شەكتەۋلى 60 ادام كەلىپ جاتتىعىپ ءجۇر.
كلۋب جەتەكشىسىنىڭ ايتۋىنشا, كەشەنگە وڭىردەگى ءىرى كومپانيا 5 ميلليون تەڭگە كولەمىندە دەمەۋشىلىك كورسەتكەن. جۇگىرۋ جانە ۆەلوجاتتىعۋ, كىر تاستارى, سپورتتىق كيىمدەر مەن تەننيس, ۆولەيبول تورلارى, دوپ, وزگە دە سپورتتىق قۇرال-جابدىقتار الىنىپتى. الداعى ۋاقىتتا دەمەۋشىلەردەن كومەك بولسا, ۇلكەن تەننيس زالىن اشۋ مەن اربامەن سپورتتىق بي بيلەۋ تۇرلەرىن اشۋ, سونداي-اق, زاعيپ جاندار ءۇشىن گولبول ويىنىن جولعا قويۋ جوسپاردا بار. بيىل كوكتەمدە وبلىستىڭ اۋداندارى مەن قالالارىندا ونداعان سپورت تۇرلەرى بويىنشا جارىستار وتكىزىپ, ءوڭىر سپورتشىلارىن رەسپۋبليكالىق سايىستارعا شىعارۋ مەجەلەنىپ وتىر.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى