2017 جىلعى قىسقى ۋنيۆەرسيادا قارساڭىندا الماتىدا قوسىمشا تاعى 300-دەن اسا اقپاراتتىق-كورسەتۋ جول بەلگىسى ورناتىلدى. ۋنيۆەرسيادا ديرەكتسياسى حابارلاپ وتىرعانداي, سپورتتىق نىساندار مەن وسى نىساندارعا دەيىن جۇرەتىن كولىك قوزعالىسىنىڭ باعىتى تۋرالى جەكە جوبالاۋ بەلگىلەرىندەگى اقپارات قازاق, ورىس جانە اعىلشىن تىلدەرىندە كورسەتىلگەن.
جول بەلگىلەرىنىڭ ديزاينىندا جارىستاردىڭ بەكىتىلگەن لوگوتيپى جانە وتكىزىلەتىن جارىس تۇرلەرىنە سايكەس سپورتتىق نىسانداردىڭ پيكتوگراممالارى بەينەلەنگەن. جول باعىتىن كورسەتەتىن بەلگىلەر سپورتتىق عيماراتتارعا, كولىك ينفراقۇرىلىم نىساندارىنا (تەمىر جول ۆوكزالدارى جانە «الماتى» حالىقارالىق اۋەجايى), دەمالۋ ورىندارىنا, سونداي-اق, ۋنيۆەرسيادا سپورتشىلارى مەن قوناقتارى جايعاساتىن ورىندارعا دەيىن جەتكىزەتىن وڭتايلى جولساپار باعىتتارىندا ورنالاستىرىلعان.
سونداي-اق, ناۆيگاتسيا ءجۇيەسىنە №4 قالالىق كلينيكالىق ەمحانا, №7 قالالىق كلينيكالىق ەمحانا, جەدەل جاردەم كورسەتۋ ەمحاناسى جانە ورتالىق قالالىق كلينيكالىق ەمحانا سەكىلدى الماتىنىڭ مەديتسينالىق مەكەمەلەرى ەنگىزىلىپ, عيماراتتاردىڭ قاسبەتى ۋنيۆەرسيادا-2017 نىشانىندا بەزەندىرىلدى.
بولجامعا ءسايكەس, ۋنيۆەرسيادا قاتىسۋشىلارىنىڭ 90 پايىزى تىكەلەي رەيسپەن الماتىنىڭ حالىقارالىق اۋەجايىنا ۇشىپ كەلمەك. ستۋدەنتتىك ويىنداردىڭ قوناقتارىنا جول كورسەتۋ ءۇشىن اۋە ايلاعىنىڭ عيماراتىندا اقپاراتتىق ۇستەلدەر قويىلعان, وندا جالپى كولىك قىزمەتى, ۇشىپ كەلۋ جانە اتتانۋ كەزىندەگى تاسىمالداۋ كەستەسى, ۋنيۆەرسيادا رەسمي كولىگىنىڭ قوزعالىس باعىتى تۋرالى اقپارات الۋعا بولادى. سونداي-اق, مۇنداي ۇستەلدەر «الماتى-1», «الماتى-2» تەمىر جول ۆوكزالدارىندا دا قىزمەت جاساماق.
سونىمەن قاتار, اتلەتتەر اۋىلىنا اپاراتىن جولدىڭ قاۋىپسىزدىگىن قامتاماسىز ەتۋ ءۇشىن «الماتى ارەنا» سپورت كەشەنىنىڭ وڭتۇستىگىندە ب.مومىش ۇلى كوشەسى بويىندا باعدارشام ورناتىلدى. ال «الماتى ارەنا» سپورت كەشەنىنىڭ سولتۇستىگىندە بوس ورىنداردىڭ بار-جوقتىعىن كورسەتەتىن ەلەكتروندىق تابلومەن جابدىقتالعان قوسىمشا كولىك تۇراعى ورنالاسقان.
قايرات جۇنىس ۇلى