ەكسپو-عا دايىندىق جۇمىستارى بۇگىندە سوڭعى شەگىنە جاقىنداپ قالدى. قازىر حالىقارالىق پاۆيلونداردىڭ قۇرىلىسى تولىعىمەن اياقتالىپ, ولاردى كورمە قاتىسۋشىلارىنا تابىستاۋ باستالدى. بۇدان باسقا, كوممەرتسيالىق پاۆيلوندار مەن قوعامدىق كوممۋنيكاتسيالار ورتالىعىنىڭ قۇرىلىسى اياقتالدى. وندا بىرىڭعاي قىزمەت كورسەتۋ ورتالىعى, اككرەديتتەۋ ورتالىعى جانە مەديا-ورتالىق ورنالاسقان. وتكەن جىلدىڭ سوڭىنا دەيىن مەملەكەتتىك ساراپتامادان 11 نىسان ءوتتى.
بۇل شاراعا قازىرگى تاڭدا تورتكۇل دۇنيە نازار اۋدارىپ وتىر. ماسەلەن, «The New York Times» گازەتىنىڭ 2017 جىلعا جاساعان رەيتينگىندە دە استاناداعى ەكسپو اتالدى. باسىلىمنىڭ جازۋىنشا, 2017 جىلى بارۋعا كەڭەس بەرەتىن ورىندار قاتارىندا استاناداعى ەكسپو كورمەسى دە بار. امەريكالىق باسىلىم ساياحاتشىلارعا 52 باعىت ۇسىنعان. بۇل رەيتينگتە ەكسپو حالىقارالىق مامانداندىرىلعان كورمەسى وتەتىن استانا قالاسى 26-ورىندا تۇر.
«2017 جىلى قازاقستان استاناسىندا حالىقارالىق ەكسپو-2017 كورمەسى وتەدى. كورمەنىڭ تاقىرىبى – «بولاشاق ەنەرگياسى», دەپ جازىلعان باسىلىم ماتەريالىندا استانادا سوڭعى جىلدارى اشىلعان تاڭعاجايىپ مەيمانحانالاردىڭ كوپتىگى دە ايتىلىپتى.
قازىرگى تاڭدا استاناداعى ەكسپو اۋماعىندا پاۆيلونداردى حالىقارالىق قاتىسۋشىلارعا بەرۋ جۇمىستارى ءجۇرگىزىلۋدە. ءتىپتى, بەلارۋس, ۆەنگريا, گەرمانيا, قىتاي, رەسەي, سينگاپۋر, ءتۇركيا, فرانتسيا, يوردانيا سياقتى مەملەكەتتەر پاۆيلوندارىن جابدىقتاۋ جۇمىستارىنا كىرىسىپ تە كەتتى. سونىمەن قاتار, قاتىسۋشىلارعا تۇرعىنجايلاردى بەرۋ دە باستالدى. «ەxpo2017astana.com» اقپاراتتارىنا سۇيەنسەك, كوميسسارلاردان 324 ءوتىنىم تۇسكەن. بۇل تۇرعىنجايلار وتەۋسىز ەمەس, قوناقتار تۇرعان ۋاقىتىنا جالداۋ اقىسىن تولەيدى. كورمەدەن كەيىن ولار قازاقستاندىقتارعا وتكىزىلەتىن بولادى. ءسويتىپ, ەلوردامىزدىڭ تۇرعىن ءۇي قورى 4 400 زاماناۋي جايلى پاتەرمەن تولىعادى. ءبىر جىلدىڭ ىشىندە ەكسپو اياسىندا 1 ملن شارشى مەتر تۇرعىنجاي سالىنعان.
نەگىزىنەن ەكسپو داعدارىسقا قارسى جوبا دەپ باعالانعان. ماسەلەن, وتاندىق تاۋار وندىرۋشىلەردى قولداۋ ءۇشىن بارلىق وبلىستاردىڭ اكىمدىكتەرىمەن ىنتىماقتاستىق تۋرالى مەموراندۋم جاسالعان. ناتيجەسىندە, بۇگىندە 322 وتاندىق تاۋار وندىرۋشىلەر تارتىلعان, جالپى سوماسى 48,9 ملرد تەڭگەگە كەلىسىمشارتتار جاسالدى. قورىتىندىسىندا جوبا بۇكىل قازاقستان بويىنشا 50 مىڭداي جۇمىس ورنىن قۇرىپ, ساقتاۋعا مۇمكىندىك بەردى. بۇدان باسقا, دەمەۋشىلىك قارجى رەتىندە 126 ملن ەۋرو, سونىمەن قاتار, ينۆەستيتسيا رەتىندە 211 ملرد تەڭگە تارتىلعان. بۇل تۋرالى «استانا ەكسپو-2017» ۇك» اق باسقارما توراعاسى احمەتجان ەسىموۆ جىل قورىتىندىسىنا ارنالعان قوعامدىق كەڭەس وتىرىسىندا مالىمدەدى.
قازىرگى ۋاقىتتا 18 حالىقارالىق ۇيىم جانە 112 ەل كورمەگە قاتىساتىندىقتارىن راستاعان, ولاردىڭ 108-ءى ءوز كوميسسارلارىن تاعايىندادى. 94 كەلىسىمشارتقا قول قويىلدى. 75 ەل ۇلتتىق كۇندەرىن وتكىزەتىن ۋاقىتتارىن الدىن الا بەلگىلەپ, ۇلتتىق پاۆيلونداردىڭ 89 تۇجىرىمداماسى الىنعان. سونداي-اق, كورمەنى حالىقارالىق دەڭگەيدە ناسيحاتتاۋ, جەتىلدىرۋ, بيلەتتەر ساتۋ, تۋريستەر تارتۋ جانە ەرىكتىلەردى دايىنداۋ بويىنشا جۇمىستار ءجۇرگىزىلۋدە. ال حالىقارالىق قاتىسۋشىلاردىڭ كەزەكتى كەڭەسىن ءوتكىزۋ الداعى اقپان ايىنا جوسپارلانعان.
جاقىندا بىرىككەن اراب ءامىرلىكتەرىنىڭ استاناسى ءابۋ-دابي قالاسىندا «استانا ەكسپو-2017» جانە «ەكسپو دۋباي-2020» اراسىندا ىنتىماقتاستىق مەموراندۋمىنا قول قويىلدى. قۇجاتقا «استانا ەكسپو-2017» ۇلتتىق كومپانياسى» اق باسقارما توراعاسى احمەتجان ەسىموۆ پەن «ەكسپو دۋباي-2020» بيۋروسىنىڭ اتقارۋشى ديرەكتورى نادجيب موحاممەد ءال-ءالي قول قويدى. قۇجاتتىڭ قول قويىلۋى ءباا-گە ەلباسى نۇرسۇلتان نازارباەۆتىڭ رەسمي ءىسساپارى جانە ءابۋ-دابيدەگى «بولاشاق ەنەرگياسى» بۇكىلالەمدىك 10-شى مەرەيتويلى سامميت اياسىندا جۇزەگە استى.
مەموراندۋم اياسىندا ەكى جاق 2017 جىلى استانادا جانە 2020 جىلى دۋباي قالاسىندا وتكىزىلەتىن ەكسپو كورمەلەرىنە دايىندىق بارىسىندا ءوزارا قولداۋ كورسەتۋگە كەلىستى. ءسويتىپ, حالىقارالىق دارەجەدەگى كورمەنى ۇيىمداستىرۋ مەن وتكىزۋدەگى تاجىريبە مەن ءبىلىم الماسۋ ماقساتىندا ەكى جاق اراسىندا ارنايى جۇمىس توبى قۇرىلماق.
دينارا بىتىكوۆا,
«ەگەمەن قازاقستان»