استانادا وتەتىن ەكسپو - 2017 حالىقارالىق كورمەسىنە بارۋعا قىزىلوردا وبلىسى ءۇشىن 75 مىڭ ادامعا كۆوتا ءبولىندى. بۇل وبلىس تۇرعىندارىنىڭ 10 پايىزىن قۇرايدى. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق كاسىپكەرلىك جانە تۋريزم باسقارماسىنىڭ باسشىسى نۇرجان ومىرسەرىك ۇلى مالىمدەدى, دەپ حابارلادى قازاقپارات.
قازىرگى تاڭدا كورمە بيلەتتەرى 6 - 8 مىڭ تەڭگە كولەمىندە ساتىلىمعا شىقتى. سونداي-اق ەكسپو-عا 181 ەرىكتىنى قاتىستىرۋ جوسپارلانعان. وعان قالاداعى جوعارعى وقۋ ورىندارى مەن كوللەدجدەردەن ءۇش ءتىلدى ەركىن مەڭگەرگەن ستۋدەنتتەر ىرىكتەپ الىندى.
«وبلىس كولەمىندە كورمەنى ناسيحاتتاۋ ماقساتىندا 79 سيۋجەت, 150-دەن اسا ماتەريال جاريالاندى. رەسمي لوگوتيپ قالاداعى 112 قوعامدىق كولىككە, «قايسار» جانە «بايقوڭىر» فۋتبول كلۋبتارىنىڭ فورمالارىنا ورنالاستىرىلدى. سونداي-اق قازاقستان مەن رەسەي اراسىندا وتكەن ۇكىمەتارالىق كوميسسيادا شەتەل ازاماتتارىنا «بايقوڭىر» كەشەنىنە كىرۋگە رۇقسات الۋدى 45 كۇننەن 10 كۇنگە دەيىن قىسقارتۋعا قول جەتكىزدىك. بايقوڭىر قالاسىنداعى «كرايني» اۋەجايى كۇردەلى جوندەۋدەن ءوتىپ, ۇلكەن ۇشاقتاردى قابىلداي الاتىن مۇمكىندىككە يە بولدى», - دەيدى ن.ومىرسەرىك ۇلى.