كوكپەكتىدەگى جاڭا اۋرۋحانا. «100 مەكتەپ, 100 اۋرۋحانا» باعدارلاماسى بويىنشا كوكپەكتى اۋدانىنىڭ ورتالىعىندا سالىنعان 100 ورىندىق اۋرۋحانا مەن تاۋلىگىنە 150 ادام قابىلدايتىن ەمحانانىڭ سالتاناتتى اشىلۋىنا وبلىس اكىمى بەردىبەك ساپارباەۆ ءوز بايعازىسىن الا كەلدى.
30 مىڭ تۇرعىنى بار اۋداندا بۇعان دەيىن كۇن تالابىنا ساي سالىنعان اۋرۋحانا بولماعان. ەندى, مىنە, ءۇش وپەراتسيا بلوگى, جاپونداردىڭ ناركوز اپپاراتى, باسقا دا قۇندى جابدىقتارى بار اۋرۋحانا ءىشى كەرەمەت. سىرقاتتار جاتاتىن بولمەلەر كەڭ ءارى جارىق. سالتاناتتى اشىلۋدا بەردىبەك ماشبەك ۇلى اۋدان تۇرعىندارىن كەلە جاتقان تاۋەلسىزدىكتىڭ 20 جىلدىعىمەن قۇتتىقتادى. –ال مىنا اۋرۋحاناعا تارتۋ رەتىندە «ۋاز» كولىگىنىڭ كىلتىن تاپسىرۋعا رۇقسات ەتىڭىزدەر, – دەدى ءوڭىر باسشىسى ءوز سوزىندە. سول كۇنى وبلىس اكىمى بىرقاتار عيماراتتاردى اشىپ, وتكەن جىلى سۋ تاسقىنى ورىن العان لايلى سۋ قويماسىندا بولدى.
وڭداسىن ەلۋباي. شىعىس قازاقستان وبلىسى.
ۇكىلەگەن ۇمىتتەر. بىلتىر «الاشتىڭ اسقاق رۋحتى جاستارى» اتتى وبلىستىق VI فورۋم وتكەن. سول كەزدە الداعى ۋاقىتتا «سىر ءۇمىتى» اتتى سىيلىق تاعايىندالاتىنى تۋرالى ءسوز ايتىلعان ەدى. ايتىلعان ءسوز ايتىلعان جەرىندە قالماي, ىسكە استى. وبلىس اكىمى بولاتبەك قۋاندىقوۆ وبلىس شەڭبەرىندە ءار سالا بويىنشا ەڭبەك ەتىپ, جۇرت اۋزىنا ىلىككەن جاستاردى «سىر ءۇمىتى» سىيلىعىمەن ماراپاتتادى. سونىمەن, وبلىس شەڭبەرىندەگى تۇڭعىش سىيلىق جاندوس بازارتاي, باۋىرجان ماستەكوۆ, ابدۋلسايد تولەگەنوۆ, باقىتبەك قارامىرزاەۆ, الىبەك قۋانىش, ايبول قوزىباقوۆ, رۋسلان قايۋپوۆ, نۇربول باكىروۆ, جانبولات دوسىمحانوۆ, تورەبەك دارماعامبەتوۆكە بەرىلدى. ايتا كەتەرلىگى, ماراپاتقا يە بولعان جاستاردىڭ بارلىعى ءالى 30-عا تولماعان. ياعني, وردا بۇزاتىن كەزدەرى الدا.
ەرجان بايتىلەس. قىزىلوردا.
«قورعاۋ» قاۋىمداستىعىنىڭ قولداۋى. وبلىستاعى ءبىلىم بەرۋ جانە عىلىم قىزمەتكەرلەرى كاسىپتىك وداقتارىنىڭ «قورعاۋ – زاششيتا» قاۋىمداستىعى ءبىلىم بەرۋ سالاسى قىزمەتكەرلەرىنىڭ الەۋمەتتىك ماسەلەلەرى مەن قۇقىقتارىنىڭ ساقتالۋىن, ەڭبەك قاتىناستارىنىڭ ورنىعۋىنا قاتىستى ماسەلەلەردى جانە ۇشجاقتى ۇجىمدىق كەلىسىم-شارتتى ورىنداۋداعى باستاۋىش ۇيىمنىڭ بەلسەندىلىگىن ارتتىرۋعا ەرەكشە نازار اۋدارىپ كەلەدى. اتالعان قوعامدىق ۇيىم توراعاسى كەنجەبەك ومارباەۆ جىلجىمالى وقۋ سەمينارىن جامبىل, ەڭبەكشىقازاق, رايىمبەك اۋداندارى مەن قاپشاعاي قالاسىندا وتكىزىپ, بۇگىنگى قوعامداعى ءبىلىم بەرۋ سالاسى قىزمەتكەرلەرىنىڭ جاۋاپتى مىندەتتەرى, ولاردىڭ قۇقىعىنىڭ بۇزىلماۋىنا بايلانىستى وي ءبولىسىپ, پىكىر الماستى.
كۇمىسجان بايجان. الماتى وبلىسى.
جاپونيا تاقىرىبىنا ارنالدى. جۋىردا قازاقستان پەداگوگيكالىق عىلىمدار اكادەمياسىنىڭ باسقارما توراعاسى, پەداگوگيكا عىلىمدارىنىڭ دوكتورى, پروفەسسور, گەرمانيانىڭ دوكتور-ينجەنەرى, رەسپۋبليكا مەملەكەتتىك سىيلىعىنىڭ لاۋرەاتى اسقاربەك قۇسايىنوۆ سەمەيگە كەلىپ, شاكارىم اتىنداعى سەمەي ۋنيۆەرسيتەتىندە, پەداگوگيكا جانە قارجى ينستيتۋتتارىندا جاس ۇرپاققا ءبىلىم بەرۋدىڭ جاپوندىق فەنومەنى تۋرالى ماستەر-كلاسس وتكىزدى. تارتىمدى اڭگىمە بارىسىندا جاپونيانىڭ قازىرگى احۋالى تۋرالى دا دايەكتى مىسالدار مولىنان ايتىلدى. وسىعان دەيىن الەمنىڭ بىرقاتار ەلدەرىندە بولىپ, ءبىلىم ماسەلەسى جونىندەگى القالى جيىنداردا سىندارلى بايانداما جاساپ, ەل مەرەيىن اسقاقتاتىپ كەلە جاتقان كورنەكتى پەداگوگ عالىم جوعارىدا اتالعان جوعارى وقۋ ورىندارىنىڭ قۇرمەتتى پروفەسسورى اتاندى.
داۋلەت سەيسەن ۇلى. سەمەي.
ورال قالاسى فوتوسۋرەتشى كوزىمەن. ەۋروپا مەن ازيانىڭ كىندىگىندە ورنالاسقان ورال قالاسىنىڭ كورىكتى كەلبەتى مەن اسەم تابيعاتى قاي كەزدە دە فوتوسۋرەتشىلەردىڭ نازارىن اۋدارىپ كەلەدى. مىنە, وسى فوتوتۋىندىلار وتكەن اپتادا تۇتاس كولەمدى البوم تۇرىندە جارىق كوردى. وعان ەنگىزىلگەن فوتوماتەريالداردىڭ بوياۋى قانىق, اجارى ايشىقتى. ونىڭ قاي-قايسىنان دا كاسىبي شەبەرلىك پەن شىعارماشىلىق ۇشقىر ويدىڭ ءىزى بايقالادى. ەڭ باستىسى – اتالعان فوتوجيناقتى تاياۋ جانە الىس شەتەلدەردەن كەلگەن قالا قوناقتارى مەن لاۋازىمدى تۇلعالارعا ۇيالماي ۇسىنۋعا بولادى. ويتكەنى, وندا قازاقستاننىڭ كونە دە جاڭا, بۇگىنگى ساۋلەتى كەلىسكەن قالاسىنىڭ كوركەم كورىنىستەرى مەن وتكەننەن سىر شەرتەتىن تاريحي ورىندارى ءوزارا ۇيلەسىم تاپقان.
تەمىر قۇسايىن. ورال.
«التىن ساقانىڭ» تۇساۋكەسەرى. س.مۇقانوۆ اتىنداعى قازاق سازدى-دراما تەاترى ەل تاۋەلسىزدىگىنىڭ 20 جىلدىعى مەرەكەسىنە ورايلاستىرىپ «التىن ساقا» سىيلىعىن بەلگىلەدى. ونىڭ تۇساۋكەسەرى حالىقارالىق تەاتر كۇنى كەسىلدى. ءسويتىپ, ونىڭ العاشقى جەڭىمپازدارى انىقتالدى. تەاتردىڭ ءجيى قوناعى پەتروپاۆل قازاق گيمنازياسىنىڭ ديرەكتورى مايگۇل مۇحامەدجانوۆا «تىلەكتەس, نيەتتەس كورەرمەن» جۇلدەسىنە يە بولدى. كوستيۋم تسەحىنىڭ مەڭگەرۋشىسى روزا ءۋايىسوۆا, بالەتمەيستەر جاننا تەمىرباەۆا, سۋرەتشى سەرىك عابباسوۆ, تاعى باسقالارى توپ جاردى. تەاتر اكتەرلەرى اراسىندا دا 8 نوميناتسيا بويىنشا ەڭ ۇزدىكتەردىڭ ەسىمدەرى ايگىلەندى.
ءومىر ەسقالي. سولتۇستىك قازاقستان وبلىسى.
ويىلدىق ونەرپازدار ونەرى. قۇدايبەرگەن جۇبانوۆ اتىنداعى اقتوبە مەملەكەتتىك ۋنيۆەسيتەتىنىڭ جاستار سارايىندا وتكەن ويىلدىق ونەرپازداردىڭ كونتسەرتى ەل تاۋەلسىزدىگىنىڭ 20 جىلدىعى مەن ويىل اۋدانىنىڭ قۇرىلعانىنا 90 جىل تولۋىنا ارنالدى. وبلىس ورتالىعىندا تۇرىپ جاتقان ويىلدىق ونەرپازداردىڭ كونتسەرتىنە جينالعان جۇرت ءبىر-بىرىمەن قاۋىشىپ, قۋانىشقا كەنەلدى. مۇنىڭ ءوزى ءان كەشىنىڭ ءمانى مەن ماڭىزىن ارتتىرا ءتۇستى. كونتسەرتكە جينالعاندار الدىندا ويىل اۋدانى اكىمىنىڭ ورىنباسارى اسقار قازىباەۆ, مادەني شارانى ۇيىمداستىرۋعا مۇرىندىق بولعان ىنتالى توپتىڭ جەتەكشىسى — اقتوبە قالاسىنداعى «Nobel» باسپاحاناسىنىڭ ديرەكتورى نۇرلان جۇماعاليەۆ ءسوز سويلەپ, يگى باستاماعا ءىلتيپات ءبىلدىردى.
ساتىبالدى ءساۋىرباي. اقتوبە وبلىسى.