شىمكەنتتەگى شاتقالداردى كوگالداندىرۋعا ۋنيۆەرسيتەت ۇجىمى اتسالىسادى. بۇل تۋرالى بۇگىن م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىندە شىمكەنت قالاسىنىڭ اۋماعىنداعى شاتقالداردى كوگالداندىرۋ» تاقىرىبىندا وتكەن دوڭگەلەك ۇستەل بارىسىندا ايتىلدى, دەپ حابارلادى وقو اكىمىنىڭ ءباسپاسوز قىزمەتى.
اتاپ ايتقاندا, وبلىس اكىمىنىڭ باستاماسىمەن قولعا الىنعان «شاتقال» باعدارلاماسىنىڭ ءبىرىنشى كەزەڭىن جۇزەگە اسىرۋ ءۇشىن اتالعان جوعارى وقۋ ورنىنىڭ عالىم, پروفەسسورلارىمەن تالقىلاۋ بارىسىندا ۋنيۆەرسيتەت ۇجىمى تاراپىنان وبلىس اكىمىنە 5 گەكتار جەر ۋچاسكەسىن ءبولۋ تۋرالى ۇسىنىس جاسالدى. ياعني, وقۋ ورنىنىڭ ستۋدەنت, وقىتۋشىلارى ارنايى بولىنگەن جەر ۋچاسكەسىن كوگالداندىرىپ, اباتتاندىرۋ جۇمىستارىن مىندەتىنە الماق. جيىنعا وقو تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى م.وتارشيەۆ, شىمكەنت قالاسى اكىمىنىڭ ورىنباسارى ب.جانبوسىنوۆ, اتالعان جوعارى وقۋ ورنىنىڭ رەكتورى ج.مىرحالىقوۆ جانە ۋنيۆەرسيتەتتىڭ عالىم, پروفەسسورلارى قاتىستى.
مۇنان بولەك, وتىرىستا م.اۋەزوۆ اتىنداعى وقمۋ عالىمدارى «كۇردەلى رەلەفتى جەرلەردەگى جانە شىمكەنتتىڭ ىستىق كليماتى جاعدايىنداعى لاندشافتىق جوبالاۋ», «قالالىق لاندشافتاردى كوگالداندىرۋدىڭ ەكولوگيالىق اسپەكتىلەرى», «وڭتۇستىك قازاقستان وبلىسىنىڭ شاتقالدارىندا وسەتىن وسىمدىكتەر» جانە «اعاش جانە بۇتاق كوشەتتەرىن ايكول اۋىلىنداعى 80 گەكتار جەرگە ءوسىرۋ پيتومنيگىنىڭ جوباسى» تاقىرىپتارىندا باياندامالار وقىپ, اتالعان باسقارما باسشىلىعىنا ءتۇرلى ۇسىنىس, پىكىرلەر جاسادى. ناقتىراق ايتقاندا, وقىتۋشىلار قۇرامى «شاتقال» باعدارلاماسى اياسىندا قولا الىنعان جەر ۋچاسكەلەرىن اباتتاندىرۋ ىسىندە دەمالىس ورىندارىنا تاريحي, مادەني اشىق مۇراجاي سالۋ, تەك ۇلتتىق كينوتۋىندىلارىمىز كورسەتىلەتىن كينوتەاتر سالۋ سىندى ويلارىمەن ءبولىستى.
پىكىرلەردى مۇقيات تىڭداعان م.وتارشيەۆ جيىن سوڭىندا م.اۋەزوۆ اتىنداعى وقمۋ ۇجىمىنىڭ ۇسىنىسىن وڭ باعالاپ, بىرلەسە جۇمىس ىستەۋگە دايىن ەكەنىن جەتكىزدى.