جالقاۋلىققا بوي الدىرىپ, از قوزعالعان ايەلدەر سەگىز جىلعا از ءومىر سۇرەدى ەكەن. زەرتتەۋ جۇمىستارىن جۇرگىزگەن اقش-تىڭ سان-ديەگو قالاسىنداعى كاليفورنيا ۋنيۆەرسيتەتىنىڭ عالىمدارى وسىنداي قورىتىندىعا كەلدى. بۇل تۋرالى lenta.ru حابارلادى.
American Journal of Epidemiology جۋرنالىنا جاريالانعان ماقالادا زەرتتەۋ جۇمىستارىنا 64-95 جاستاعى 1500 ايەل ادامنىڭ قاتىسقاندىعى جازىلعان. ولاردىڭ وڭ جاق سانىنا اكسەلەرومەتر تاعىلىپ, ءبىر اپتاداعى فيزيكالىق بەلسەندىلىگى زەرتتەلدى. بۇدان كەيىن عالىمدار ادامنىڭ قارتايۋمەن تىكەلەي بايلانىستى حروموسومانىڭ ەكى يىعىنىڭ ۇشىنداعى بولىگى تەلومەرانى ولشەپ كوردى.
كۇنىنە ەڭ بولماعاندا 30 مينۋت فيزيكالىق جاتتىعۋ جاسايتىن ايەلدەردىڭ تەلومەراسى از قوزعالاتىندارمەن سالىستىرعاندا ۇزىنداۋ بولادى. دەمەك, كوپ وتىرىپ جۇمىس ىستەيتىندەردىڭ جاسۋشالارى تەز قارتايادى. بۇل ءوز كەزەگىندە ىسىك, ديابەت اۋرۋلارىنا تەز شالدىعۋعا بەيىم بولادى.
تەلومەرالار دنق-نىڭ بىرقاتار قايتالاناتىن رەتتىلىگىنەن تۇرادى. ولار كوبەيەتىن حروموسومالاردى زاقىمدانۋدان قورعايدى, الايدا, ءاربىر جاسۋشا بولىنگەن سايىن قىسقارا بەرەدى. بۇل پروتسەسس ادامنىڭ قارتايۋىمەن بايلانىستى دەپ ەسەپتەلەدى. جاسۋشالار قىسقا تەلومەرالارمەن ءتيىستى قىزمەتتەردى اتقارا الماعاندىعىنان ولۋىنە اكەلەدى.