شىمكەنتتە 2 ەلەكتر ستانساسىنىڭ قۇرىلىسى جۇرۋدە. بۇل تۋرالى وقو ايماقتىق كوممۋنيكاتسيالار قىزمەتىندە وتكەن بريفينگتە وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى م.مارايىم مالىمدەدى, دەپ حابارلادى قازاقپارات.
ونىڭ ايتۋىنشا, وبلىس تۇرعىندارىن ساپالى ەلەكتر قۋاتىمەن قامتاماسىز ەتۋ ماقساتىندا 2016 جىلى وبلىستىق بيۋدجەتتەن 5,534 ملرد تەڭگە ءبولىنىپ, 22 نىساننىڭ قۇرىلىسى جۇرگىزىلدى. ناتيجەسىندە, 585,8 شاقىرىم ەلەكتر جەلىسى مەن 233 دانا كتپ ورناتىلىپ, 72 مىڭ تۇرعىن تۇراقتى جانە ساپالى ەلەكتر قۋاتىمەن قامتىلعان.
«شىمكەنت قالاسىنىڭ سولتۇستىك بولىگىندە 350 مىڭ تۇرعىن مەن الەۋمەتتىك نىسانداردى ساپالى ەلەكتر قۋاتىمەن قامتۋ ماقساتىندا قۇنى 6,7 ملرد تەڭگەنى قۇرايتىن 220 كيلوۆولتتىق «بوزارىق» قوسالقى ستانساسىنىڭ قۇرىلىسى جۇرگىزىلۋدە. سونىمەن قاتار, 2016 جىلى شىمكەنت قالاسىندا 80 مىڭ حالىقتى قامتيتىن 110 كيلوۆولتتىق «استانا-1,2» قوسالقى ستانتسياسىنىڭ قۇرىلىسى باستالدى», – دەدى باسقارما باسشىسى.
بەلگىلى بولعانداي «وڭتۇستىك جارىق ترانزيت» جشس-ءنىڭ ينۆەستيتسياسى ەسەبىنەن 4,86 ملرد تەڭگەگە 610,9 شاقىرىم ەلەكتر جەلىسى مەن 108 دانا قوندىرعىلارعا قايتا قۇرۋ جانە جاڭارتۋ جۇمىستارى جۇرگىزىلگەن. وسىلايشا, ەلەكتر جۇيەلەرىنىڭ توزىعى جەتۋى 57,5 پايىزدان 55 پايىزعا تومەندەپ وتىر.