تەكەلى قالاسىنداعى «تەكەسۋ» تۋريستىك كەشەن قۇرىلىسىنىڭ جوباسىن جۇزەگە اسىرۋعا 159,6 ملن. تەڭگە تارتىلىپ, يگەرىلدى. قازىرگى كەزدە بۇل اۋماقتا 400 مەترلىك جانە 800 مەترلىك سىرعاناق جولى, باللونمەن, شانامەن سىرعاناۋعا ارنالعان جولى بار تۋريستىك بازانىڭ قۇرىلىسى اياقتالدى. سونىمەن قاتار مۇندا قىس مەزگىلىندە شاڭعى جانە سنوۋبوردتا سىرعاناۋ, جازدا تاۋ ۆەلوسيپەدىمەن ەكسترەمالدى سىرعاناۋ جولدارىن توسەۋ جۇمىستارى ءبىتتى. بۇل تۋرالى تەكەلى قالاسىنىڭ اكىمى باقتيار ونەرباەۆ حالىق الدىندا ەسەپ بەرۋ جيىنىندا ايتتى, دەپ حابارلايدى الماتى وبلىسى اكىمدىگىنىڭ ءباسپاسوز قىزمەتى.
ب. ونەرباەۆتىڭ ايتۋىنشا, تەكەلى قالاسىنىڭ تابيعي لاندشافتى مەن كليماتتىق ەرەكشەلىگى قالا مەن ونىڭ ماڭايىندا ءتۋريزمدى دامىتۋعا زور مۇمكىندىك بەرەدى. سوندىقتان تۋريستىك سالا الماتى وبلىسى باسشىلىعىنىڭ ايرىقشا نازارىندا. قازىرگى كەزدە وبلىس اكىمى ا. باتالوۆتىڭ تاپسىرماسىنا سايكەس ارنايى تۋريستىك كارتا ازىرلەنىپ, تۋريستىك بازالار مەن باسقا دا تۋريستىك نىسانداردىڭ قۇرىلىسىنا ينۆەستور تارتۋ ءىسى جولعا قويىلدى. بۇل باعىتتاعى جۇمىس بيىلعى جىلى دا جالعاستىرىلاتىن بولادى.
تەكەلىدە, سونىمەن قاتار بالالار مەن جاسوسپىرىمدەر ءتۋريزمى بويىنشا تاۋ, سپورتتىق جانە ولكەتانۋ باعىتىنداعى تۋريزم ورتالىعى جۇمىس ىستەيدى.
ب.ونەرباەۆ ءتۋريزمدى دامىتۋ سپورتتىق سالامەن تىعىز بايلانىستى ەكەنىن دە اتاپ ءوتتى. ماسەلەن, تەكەلى قالاسىندا مامانداندىرىلعان بالالار مەن جاسوسپىرىمدەر سپورتتىق مەكتەبى جۇمىس ىستەپ, ونداعى سەكتسيالاردا 600-دەي بالا جاتتىعادى.