ۋنيۆەرسيادا كەزىندە اۋىر جاراقات العان سپورتشىلار اۋرۋحاناعا تىكۇشاقپەن جەتكىزىلەدى. اۋە كولىكتەرى اسا قاۋىپتى سپورت تۇرلەرىنەن سايىس وتەتىن ءۇش نىسانعا كەزەكشىلىك ەتەدى. اتاپ ايتقاندا - مەدەۋ, تاباعان تاۋلى ايماقتارى مەن الماتى ارەنادا زارداپ شەككەندەر, نەبارى 15 مينۋتتا اۋرۋحاناعا جەتكىزىلىپ, شۇعىل كومەك الا الادى. بۇل تۋرالى "الماتى" تەلەارناسى حابارلادى.
ءدۇبىرلى دودا كەزىندە اۋىر جاراقات العان ناۋقاستارعا شۇعىل كومەك № 7 جانە 4-ءشى قالالىق اۋرۋحانالاردا كورسەتىلەدى. ول ءۇشىن قوس اۋرۋحانانىڭ بازاسىندا ارنايى تىكۇشاق قوناتىن الاڭ جاسالدى. جوسپار بويىنشا جەدەل-جاردەم كولىگى تىكۇشاقپەن جەتكىزىلگەن ناۋقاستى كۇتىپ الىپ, بىردەن اۋرۋحانانىڭ قابىلداۋ بولىمشەسىنە جەتكىزەدى. ول نەبارى 2 مينۋت ۋاقىتتى الادى.
ۋنيۆەرسيادانى وتكىزۋگە دارىگەرلەر ساقاداي ساي. قاجەتتى مەديتسينالىق قۇرال-جابدىقپەن جانە ءدارى-دارمەكپەن قامتاماسىز ەتىلگەن كەزەكشى جەدەل مەديتسينالىق كومەك بريگاداسى بارلىق 9 سپورت نىسانىندا دا جۇمىس ىستەيتىن بولادى. جاڭادان الىنعان 40 جەدەل جاردەم كولىگى شۇعىل, دەرەۋ جانە قاجەتتى مەديتسينالىق كومەك كورسەتۋگە دايىن تۇرادى. سپورتتىق سايىستار وتەتىن اۋماقتاردا 150-دەن استام جەدەل كومەك كورسەتەتىن اق حالاتتىلار بولادى.
"ۋنيۆەرسيادانى وتكىزۋ اياسىندا مينيسترلىك الماتى قالاسىنىڭ اكىمشىلىگىمەن بىرگە قاتىسۋشىلارعا شارا بارىسىندا جانە توقتاعان ورنىندا ۋاقتىلى, ساپالى مەديتسينالىق كومەك كورسەتۋ ماسەلەلەرىن پىسىقتادى. جالپى مەديتسينالىق كومەك كورسەتۋ ستاتسيونارلىق تۇردە كورسەتىلەتىن بولادى, جەدەل-جاردەم تۇرىندە كورسەتىلەتىن بولادى. سونداي-اق مەديتسينالىق پۋنكتتەردىڭ قىزمەتتەرى ۇيىمداستىرىلاتىن بولادى. بۇگىنگى تاڭدا قاجەتتى دايارلىق تولىق اياقتالدى دەسەك بولادى", - دەدى قر الەۋمەتتىك دامۋ جانە دەنساۋلىق ساقتاۋ ءمينيسترى تامارا دۇيسەنوۆا.
جارىس كەزىندە كومەك كورسەتەتىن جەدەل-جاردەم قىزمەتكەرلەرىنىڭ بارلىعى كوزگە ەرەكشە تۇسەتىن, ارنايى كيىم ۇلگىسىمەن قامتاماسىز ەتىلگەن. ولاردىڭ بارلىعى دا اعىلشىن تىلىنەن ءدارىس ءوتىپ, جاتتىعىپتى.