فۋتبولدان قازاقستان جاستار قۇراماسىنىڭ (U-18) جاتتىقتىرۋشىسى الەكساندر كۋزنەتسوۆ گراناتكين مەموريالى تۋرنيرىندە جارتىلاي فينالدا گرەكيانى 2:1 ەسەبىمەن جەڭگەنى جونىندە ءوز پىكىرىمەن ءبولىستى. بۇل تۋرالى prosports.kz حابارلادى.
«مەن بارشا قازاقستاننىڭ جەڭىسى. گرەكتەردى جەڭگەنىمىز بەينە ءبىر ءتۇسىم سياقتى. باپكەرلەر القاسىمەن, الاڭدا جانىن سالىپ, دوپ قۋعان جىگىتتەرمەن وسى كۇنگە جەتۋ ءۇشىن كوپ تەر توكتىك. قارسىلاستارىمىز بىزدەن ءبىر كۇن كوبىرەك دەمالعانىنا قاراماستان, جوسپارىمىزدى تولىعىمەن جۇزەگە اسىرا الدىق. فۋتبول بولعانان كەيىن كۇتپەگەن جاعدايلاردىڭ بولاتىنى بەلگىلى. ءبىر ويىنشىمىز الاڭنان قۋىلدى. قىلشىلداپ تۇرعان جاس جىگىتتەر بولعانمەن, بويىنداعى ەموتسياسىنا ەرىك بەرمەۋى قاجەت. بىراق تورەشىلەردىڭ شەشىمىن سىنعا العاندى اسا ۇناتپايمىن. بىلەسىزدەر مە, ءبىزدىڭ گراناتكين مەموريالى تۋرنيرىندەگى سوڭعى قارسىلاسىمىز ءدال وسى گرەكتەر بولاتىن. 2015 جىلى ولاردان 0:6 ەسەبىمەن ويسىراي ۇتىلىپپىز. وسىنى قاپەرىمىزدە ۇستاپ, ەسە قايتارۋدى ويلاپ جۇردىك. ەندى مىنە, رەۆانش تا الدىق. بۇل جەڭىسىمىزدى ءوز جانكۇيەرلەرىمىزگە ارنايمىز», – دەدى كۋزنەتسوۆ.
ءار جاتتىقتىرۋشىنىڭ ماتچ سايىن وزىندىك ءبىر دايىندىعى, تاكتيكاسى بولاتىن بەلگىلى. وسى جونىندە ول: «قولىمىزدا قوسىمشا ماتەريال بولدى. گرەكيانىڭ ويىندارىن تولىعىمەن زەرتتەپ شىقتىق. ويىن باستالاردان ءبىر كۇن بۇرىن ءتۇن ورتاسىنا دەيىن ءاربىر ءساتتى ەگجەي-تەگجەيلى قاراپ, تاكتيكامىزدى ويلاستىردىق. ولار كوبىنە قاپتال جاعىن اشىق قالدىرادى. ال ءبىز ءدال وسى تۇستاردى پايدالانىپ, قورعانىستان شابۋىلعا تەز شىعۋدى ماقسات ەتتىك ءارى جۇزەگە اسىردىق. ءبىر ويىنشىمىز الاڭنان قۋىلعاننان كەيىن ولار العا قاراي ۇمتىلىپ, كوپ تۇستارىن اشىق قالدىردى. ەگەر قاتەلەسپەسەم, بۇدان بولەك تاعى ءتورت گول سوعۋىمىزعا بولاتىن ەدى. شاكىرتتەرىمە گرەكتەردىڭ فيزيكالىق تۇرعىدان مىعىم ەكەندەرىن ەسكەرتتىم. بىردەن ءبىر ارتىقشىلىعى وسى بولاتىن. ال ءبىز تەك كوماندالىق رۋحىمىزدىڭ, جەڭىسكە دەگەن قايسار مىنەزىمىزدىڭ ارقاسىندا قاجەتتى ناتيجەگە قول جەتكىزدىك. ءبىزدى تەك قورعانىس ارقىلى عانا وينايدى دەپ سىنايتىندار بار. بىراق ءمان بەرىپ قارايتىن بولساق, ءتيىمدى جەرلەرگە دەر كەزىندە بەرىلگەن پاستارىمىز كوپ. وزگەلەرى ەش سەبەپسىز الدىعا, ارتقا دوپ جىبەرگەندى جاقسى كورەدى», – دەدى ول.
وتكەنگە كوز جۇگىرتىپ قارايتىن بولساق, 2012, 2014 جالدارى بۇل تۋرنيردە جاستارىمىز سوڭعى, 2015 جىلى 10-ورىنداردى يەلەنگەن. بۇل جولى دا اقتىق سىنعا جولداما الادى دەپ ەشكىم ويلاماعان بولسا كەرەك. ال باس باپكەر ءشى؟
«جارىستىڭ باسىندا بىزدەن ءار ويىندا جەڭىس كۇتپەڭىزدەر دەگەن ەدىم. مىنە, ءدال وسى كەزدەن-اق بىزگە دەگەن قىسىمدى سەيىلتتىم. ال ءوز باسىم شاكىرتتەرىمە سەنىمدى بولدىم», – دەدى الەكساندر.
ەۋروپادا دوپ تەپكەن فۋتبولشىلار ءوز ەلىڭە كەلىپ جاتسا, جاستاردىڭ سوعان قاراپ بوي تۇزەيتىنى بەلگىلى. بۇل تۋرالى: «راس, ورەندەرىمىز جۇلدىزدارعا قاراپ ەلىكتەيدى. ءبىزدىڭ فۋتبولىمىز دامۋ ۇستىندە دەپ سەنىمدى تۇردە ايتا الامىن. ماسەلەن, «قايراتتى» الايىق. لوندوننىڭ «ارسەنالىندا» دوپ تەپكەن شاشتارازشى اندرەي ءارشاۆيندى (كۇلەدى, سپورت تىلشىسىمەن باستەسىپ, شاشىن تاقىرلاپ العانىن ەسكە ءتۇسىردى) الدى. قازاقستانعا كەلىپ, قايتادان جاسارىپ كەتكەن سەكىلدى. قازىر چەمپيوناتىمىزداعى ۇزدىكتەردىڭ ءبىرى», – دەدى جاتتىقتىرۋشى.