اۋىل مۇعالىمىنىڭ احۋالى

قازاق پوەزياسىنىڭ الىبى قادىر مىرزا ءالى «ءبىز وتە دارىندى, تالانتتى حالىقپىز» دەگەن ەدى. سول تالانتتاردىڭ دەنى اۋىلدان شىققانى دا داۋ تۋعىزبايدى. قاۋىرسىن قانات قابىلەتتى جەتكىنشەكتەردى تاربيەلەپ, ءبىلىم بەرۋدە اۋىل مۇعالىمدەرىنىڭ ەڭبەگى ايرىقشا. ال, وسىنداي ەرەن ەڭبەك جاساپ جۇرگەن اۋىل مۇعالىمدەرىنە قولداۋ مەن قامقورلىق قاي دەڭگەيدە؟  الدىمەن اۋىل مۇعالىمىنىڭ تۇر­مىسى جايلى ايتساق. قالا­مەن سالىستىرعاندا اۋىل تۇر­­­عىندارىن تولعاندىراتىن ءتىر­شى­لىك تۇيتكىلدەرى كوپ. ءالى كۇنگە دەيىن كوگىلدىر وتىندى تۇتىنۋ مۇمكىندىگىنە جەتپەگەن, قىس كەزىندە قي, تەزەك, كومىر جاعىپ وتىرعان اۋىل تۇرعىندارى بار. اۋىل مۇعالىمدەرىنىڭ دە كورگەن كۇنى وسى. ەسىل ۋاقىت وتىن كىرگىزىپ, كۇل شىعارۋعا كەتەدى. ولارعا وتىن الۋعا جۇمساعان شىعىنى دا وتەلمەيدى. اۋىل مۇعالىمدەرىن قولداۋدىڭ جولى قانداي؟ قازىر اۋىل اكىمدىكتەرىنىڭ بيۋدجەتى بار. قاراجات اۋىلداردى كوركەيتۋ مەن اباتتاندىرۋعا جۇمسالماق. سول قارجىنىڭ بەلگىلى ءبىر بولىگى اۋىل مۇعالىمدەرىنە وتىن الۋعا جانە كوممۋنالدىق قىزمەت ءتو­لەم­دەرى ءۇشىن بولىنسە دۇرىس بو­لار ەدى. اۋىل مۇعالىمدەرىن قارجىلاي قولداۋدىڭ مۇنداي ۇلگىسى بۇعان دەيىن بولعان. سونى قايتا جاڭعىرتسا قايتەدى؟ اۋىل مۇعالىمدەرى ءۇشىن ۇلكەن قولداۋ بولار ەدى. ءبىلىم جانە عىلىم قىز­مەت­كەر­لە­رى كاسىپوداعىنىڭ وڭىرلەردە ۇيىم­دارى بار. سول ارقىلى دا اۋىل مۇعالىمدەرىن الەۋمەتتىك قول­داۋ ماسەلەسىن شەشۋگە بولادى ەمەس پە؟ وڭىرلەردەگى ءبىلىم بەرۋ سالا­سى­نىڭ وكىلدەرىنە الەۋمەتتىك جە­ڭىلدىكتەر جاساۋ – ولاردىڭ ءمار­تەبەسىن كوتەرۋدىڭ تاپتىرماس ءبىر جولى. مۇنىڭ سىرتىندا بىلىكتى كادرلاردى اۋىلدا تۇراق­تان­دىرۋ دەگەن ماڭىزدى ماسەلە تاعى بار. اۋىلدىق جەردە تۇرىپ قىزمەت جا­سايتىن پەداگوگ-ماماندارعا الەۋ­مەتتىك جەڭىلدىكتەر تۋعىزۋ ءىسىن­دە سالالىق كاسىپوداق ۇيىم­لا­رىنىڭ ءرولىن ارتتىرۋ دا كەزەك كۇتتىرمەيتىن ءىس. رەسپۋبليكانىڭ كەز كەلگەن وڭىرىندە ءبىلىم جانە عى­لىم قىزمەتكەرلەرىنىڭ باسىن قۇ­رايتىن كاسىپوداق بىرلەستىگى سول ايماقتاعى ەڭ ءىرى سالالىق ۇيىم بولىپ تابىلادى. باتىس قا­زاقستان وبلىسى بويىنشا 28 مىڭعا جۋىق مۇعالىم كا­سىپ­وداق ۇيىمىنىڭ مۇشەسى. وب­لىستىق ءبىلىم جانە عىلىم قىز­مەتكەرلەرى كاسىپوداعىنىڭ تاياۋدا وتكەن پلەنۋمىندا اۋىلدا تۇراتىن مۇعالىمدەرگە الەۋمەتتىك جەڭىلدىكتەر جاساۋ جونىندەگى ماسەلە ورىندى كوتەرىلدى. سالا­لىق كاسىپوداقتىڭ توراعاسى مارات داۋپاەۆ وعان مۇشە اۋىل مۇ­عا­لىمدەرىنە ساۋىقتىرۋ جانە دە­مالىس ورىندارىنا جولداما بەرۋ ءارى ولاردىڭ بالالارىنىڭ جاز­عى دەمالىستارىن ۇيىم­داس­تى­رۋ ماسەلەلەرى ۇدايى نازاردا ەكەنىن اتاپ كورسەتتى. ەندى اۋىل مۇعالىمدەرىنە الەۋمەتتىك قار­جىلاي كومەك جاسالسا, ءتىپتى دۇ­رىس بولار ەدى. تەمىر قۇسايىن, «ەگەمەن قازاقستان» باتىس قازاقستان وبلىسى