قالا سىرتىندا قايناربۇلاق دەگەن ساياجاي بار. بۇگىندە شىمكەنتكە كىرىپ, قۇرقىلتايدىڭ ۇياسىنداي اۋىل بولىپ ۇيىسىپ وتىر. ەكى-ءۇش اي بۇرىن سول اۋىل تۇرعىندارىنىڭ قاتتى جانايقايى ەستىلدى. بەلگىسىز بىرەۋلەر كوشەگە ورناتىلعان سۋ ەسەپتەگىش قۇرالدارىنىڭ قورابىن بۇزىپ, قوندىرعىنى الىپ كەتىپ وتىرعان. شەشىپ العانى بار, كۇش قولدانىپ ج ۇلىپ العانى بار, جالعانعان تۇربالاردان اتقىلاعان سۋ كوشەگە جايىلىپ كەتكەن.
سۋ ەسەپتەگىش قوندىرعىسى اقشاعا كەلگەن, ءىشىڭ اشيدى. ال ەسەپسىز اعىپ جاتقان سۋدىڭ شىعىنى قايناربۇلاقتىقتارعا تەڭ ءبولىنۋى جانە مۇمكىن. ءاربىر قوندىرعىنىڭ جانىنا كۇزەتشى قوياتىنداي ەمەس, شارباق ىشىنە ورناتۋعا زاڭ كوتەرمەيدى. قايناربۇلاقتىقتار وسىلاي دابىل قاققان. ارينە, ۇرىلاردى ەركىنسىتىپ قويعان پوليتسەيلەر اتىنا دا اۋىر سوزدەر ايتىلعان.
بۇل جولى دا ۇرى الىستان كەلمەپتى. قاراتاۋ اۋداندىق پوليتسەيلەرىنىڭ كۇن, ءتۇن قاتىپ ىزدەۋ سالۋى, سىرتتاي اڭدۋى جەمىسىن بەردى. ۇستالعان ەكى كۇدىكتىنىڭ ءبىرى وسى ەسەپتەگىش قۇرالدى ورناتقان جۇمىسشىلاردىڭ ءبىرى بولىپ شىقتى. «داندەگەن قارساق قۇلاعىمەن ءىن قازادى» دەگەندەي, قىركۇيەك ايىنداعى العاشقى ساپارلارىنان بەرى ۇستالماي جۇرگەنىنە ماساتتانعان ەكەۋ سول ۋاقىتتان بەرى 2 ملن تەڭگەنىڭ ەسەپتەگىش قۇرالدارىن ۇرلاپ ۇلگەرىپتى.
قولعا تۇسكەن ەكى جاس جىگىت تولە بي اۋدانىنىڭ تۋمالارى ەكەن. بۇگىندە ولارعا تەرگەۋ امالدارى ءجۇرىپ جاتىر. ازىرگە كۇدىكتىلەردىڭ 500-گە جۋىق ەسەپتەگىش قۇرالىن ۇرلاعانى انىقتالدى. ءتۇن جامىلعان ەكەۋ اۋىلعا كەلىپ مونتيروۆكامەن قوراپتى مايىستىرىپ اشىپ, ەسەپتەگىش قۇرالدى الىپ كەتىپ وتىرعان. ۇرلانعان قۇرالداردى قارا بازاردا ارزان باعاعا ساتىپ, اقشانى ءوز قاجەتتەرىنە جۇمساعان.
تۇتاستاي ءبىر اۋىلدى قان قاقساتقان ەكەۋ بۇگىندە قىلمىستىق كودەكستىڭ 188-بابى بويىنشا ايىپتالىپ, تەرگەۋ وقشاۋلاعىشىنا جابىلدى. ولار «ۇرلىق ءتۇبى قورلىق» ەكەندىگىن ەندى تۇسىنگەن سىڭايلى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى