اتىراۋدا دا جول ماسەلەسى وتكىر تۇر. جولدىڭ قادىرىن اتىراۋلىقتار وزگەلەردەن جاقسىراق بىلەتىن شىعار. ويتكەنى, مۇنايلى ءوڭىردىڭ ورتالىعى سانالاتىن اتىراۋ قالاسىنا ازداعان ىلعال تۇسسە, تابانىڭا جەلىمدەي جابىسار بالشىعىمەن ءجۇرۋ مۇڭعا اينالادى. ونىڭ ۇستىنە قالانىڭ اۋقىمى شاعىن اۋداندارمەن كەڭەيىپ كەلەدى. جاڭادان بوي كوتەرگەن شاعىن اۋدانداردا ينجەنەرلىك ينفراقۇرىلىمدار جۇرگىزىلگەنمەن, جول سالۋ تولىق شەشىمىن تاپتى دەۋگە بولمايدى. بۇل ماسەلە تۇرعىندار تاراپىنان اسىرەسە, اكىمدەردىڭ جىل سايىنعى ەسەپ بەرۋىندە وقتىن-وقتىن كوتەرىلەدى. جولدىڭ قاجەتتىگى اتىراۋ قالاسىنىڭ اكىمشىلىك بولىسىنە قارايتىن ەلدى مەكەندەردىڭ بارلىعىندا دەرلىك بايقالادى.
ماسەلەن, وتكەن جىلى مۇنايلى قالا مەن وعان تاياۋ ورنالاسقان وكرۋگتەردە 95 شاقىرىمعا سوزىلعان جول سالىنىپتى. سونىڭ ىشىندە جۇمىسكەر جانە جۇمىسكەر-2 اۋىلدارىنىڭ 19 كوشەسىنە 8,9 شاقىرىمدى قۇراعان جول توسەلگەن. مۇنداي جۇمىس ەركىنقالا, قۇرساي, راكۋشا اۋىلدارىندا, «بالاۋسا» جانە «سامال» شاعىن اۋداندارىنىڭ 30-دان استام كوشەسىندە جۇرگىزىلىپتى. اتىراۋ قالاسىنىڭ اكىمى سەرىك شاپكەنوۆتىڭ ءمالىم ەتۋىنشە, بيىل بۇل جۇمىستىڭ جالعاسۋى قارجىنىڭ بولىنۋىنە بايلانىستى بولماق. قازىردىڭ وزىندە قالا ىرگەسىندەگى 30 ەلدى مەكەننىڭ 311 كوشەسىنە جول توسەلەتىندىگى جوسپارلانىپتى. جوبالىق-سمەتالىق قۇجاتى دايىندالعان جولدىڭ ۇزىندىعى 250 شاقىرىمدى قۇرايدى. بىراق, مۇنىمەن بۇل ەلدى مەكەندەردىڭ بارىندە تاقتايداي تەگىس جولمەن تولىق قامتىلادى دەۋگە بولمايدى. ويتكەنى...
– بىرنەشە ەلدى مەكەندەردە جول قۇرىلىسىن جۇرگىزۋ ءۇشىن ءالى دە جوبالىق-سمەتالىق قۇجاتتاماسىن جاساقتاۋ قاجەت. قازىر قۇرساي, ەركىنقالا سەكىلدى قالالىق اكىمدىككە قاراستى وزگە دە ەلدى مەكەندەرگە جول توسەۋ ءۇشىن وسىنداي جۇمىستار جاسالۋدا, –دەيدى قالا اكىمى سەرىك شاپكەنوۆ.
راس, جول سالۋ جۇمىستارى اكىم مىسالعا كەلتىرگەن ەلدى مەكەندەرمەن عانا شەكتەلمەيدى. ويتكەنى, «جۇلدىز», «كوكتەم», «بىرلىك-2» سەكىلدى شاعىن اۋداندار تۇرعىندارى دا جولدىڭ ازابىن تارتىپ كەلەدى. بۇل شاعىن اۋدانداردىڭ بارىندە دە جەكە يەلىكتەگى تۇرعىن ۇيلەر سالعان تۇرعىنداردىڭ اسىرەسە, كوكتەم, كۇز ايلارىندا قاتىناۋىنىڭ قيىندىعىن باسقا بەرمەسىن دەڭىز. سونىمەن بىرگە, ولار ءۇشىن «جەدەل جاردەم» قىزمەتىن شاقىرۋ دا وڭاي ەمەس. ال «كوكارنا» شاعىن اۋدانىنىڭ ءبىر كوشەسىن مەكەن ەتكەن تۇرعىنداردىڭ ءوز كۇشتەرىمەن جولعا قۇرىلىس قالدىقتارىن توككەنىنە كۋا بولعانىمىز بار. ەندى وتكەن جىلدىڭ كۇزىنەن بەرى «بەرەكە» اتالاتىن تاعى ءبىر شاعىن اۋداندا دا تۇرعىن ءۇي قۇرىلىسى جاندانا باستادى. جوبا بويىنشا مۇندا 11 كوپ قاباتتى تۇرعىن ءۇي بوي كوتەرەدى. دەمەك, ءدال وسى تۇرعىن الابىنىڭ ءوزىنە دە جول قۇرىلىسى سالىنۋى قاجەت.
قالاي دەگەندە دە, جاياۋ جۇرگىنشىلەرگە ارنالعان جولاقتى ايتپاعاننىڭ وزىندە كولىك جۇرەتىن جولدىڭ جىرى بۇل وڭىردە دە ازىرگە بىتە قويار ءتۇرى كورىنبەيدى. مامانداردىڭ پىكىرىنشە, جول قۇرىلىسى قاراجاتتى مولىنان قاجەت ەتەتىنگە ۇقسايدى. ارينە, قارجى تابىلعانمەن, جول دەگەنىڭىز بىردەن سالىنا قويمايدى. ونىڭ الدىن-الا جاسالاتىن جوبالىق-سمەتالىق قۇجاتتاماسىنىڭ وزىنە قىرۋار قارجىنىڭ جۇمسالاتىنىن ايتادى. بىراق, ءبارىبىر جول بولماي تۇرعىندار كوڭىلى جاي تاپپايتىنى دا بەسەنەدەن بەلگىلى. اتىراۋ قالاسىنىڭ ىرگەسىندەگى ەلدى مەكەندەر مەن شاعىن اۋداندارعا جول توسەلسە, بۇل الدىمەن تۇرعىنداردىڭ تۇرمىسىنا وڭ اسەر ەتەتىنى داۋسىز. سوندا ولار وزدەرى تۇراتىن كوشەلەردە شاشتاراز, دۇكەن, كافە سەكىلدى شاعىن جانە ورتا بيزنەستىڭ وركەندەۋىنە ۇلەس قوسار نىساندار اشار ما ەدى؟
جولداسبەك شوپەعۇل,
«ەگەمەن قازاقستان»
اتىراۋ وبلىسى