ۋاقىتشا تىركەۋ ماسەلەلەرى تۋرالى تۇسىنىك بەردى

پارلامەنت سەناتىنىڭ دەپۋتاتى دارحان كالەتاەۆ «نۇر وتان» پارتياسىنىڭ استاناداعى رەسپۋبليكالىق قوعامدىق قابىلداۋ بولمەسىندە ازاماتتاردى قابىلدادى. كەزدەسۋگە استانا قالاسى مەن اقمولا وبلىسىنان ءارتۇرلى الەۋمەتتىك ماسەلەلەر تولعاندىرعان تۇرعىندار كەلدى. دەپۋتاتقا كەلگەندەردىڭ كوپشىلىگى تۇرعىن ۇيمەن جانە جەر ۋچاسكەسىمەن قامتاماسىز ەتۋگە قاتىستى ماسەلەلەرمەن قايىرىلعان بولاتىن. كەلۋشىلەردىڭ ىشىندەگى زەينەتكەرلەر مەن كوپ بالالى وتباسىلاردىڭ وكىلدەرى ەڭبەككە ورنالاستىرۋ, زەينەتاقىمەن قامتاماسىز ەتۋ, الەۋمەتتىك جاردەماقى تاعا­يىن­داۋ جانە قالانى كوركەيتۋ ماسە­لە­لەرىن شەشۋگە كومەك سۇرادى. سەنا­تور د.كالەتاەۆ بارلىق ماسەلەلەردىڭ شەشىلۋىن جەكە باقىلاۋىنا الاتىن بولدى. د.كالەتاەۆ ازاماتتاردى ۋاقىتشا تىركەۋ جاعدايىنا بايلانىستى تۇسىنىك بەردى. سەناتور زاڭنىڭ قابىلدانۋى قاجەتتى شارا ەكەنىن اتاپ كورسەتتى. «ۋاقىتشا تىركەۋ تۋرالى زاڭ ەرەجەلەرى قابىلداندى جانە ونىڭ كۇشى توقتاتىلمايدى. بۇل ەرەجەلەر جەكە بىرەۋدىڭ تىلەك-قالاۋى بويىنشا قابىلدانعان جوق, ۋاقىت تالابىنان تۋىنداپ وتىرعان امالسىزدان قابىلدانعان شارا. ونى ىسكە اسىرۋدا حالىققا قىزمەت كورسەتۋ ورتالىقتارى مەن ىشكى ىستەر مينيسترلىگى جۇمىستارىندا بىرقاتار ۇيىمداستىرۋ شارالارى قابىلدانۋى ءتيىس ەكەنى ەكىنشى ماسەلە. مۇندا ىشكى ىستەر مينيسترلىگىن كىنالى قىلۋدىڭ كەرەگى جوق, وعان بارلىق مەملەكەتتىك ورگاندار اتسالىسۋى ءتيىس. ءتۇسىندىرۋ جۇمىستارىنىڭ دۇرىس جۇرگىزىلمەۋىنەن دۇرلىگۋ باستالىپ كەتتى», – دەدى دەپۋتات.  اليسۇلتان قۇلانباي, «ەگەمەن قازاقستان» استانا