تەمەكى تارتۋ الەمدىك ەكونوميكانى جىلىنا تريلليون دوللاردان استام شىعىنعا باتىرىپ وتىر, دەپ جازادى حابار24.
مۇنداي دەرەكتى ارنايى زەرتتەۋ جۇرگىزگەن دۇنيەجۇزىلىك دەنساۋلىق ساقتاۋ ۇيىمى مەن اقش-تىڭ ونكولوگيا جونىندەگى ۇلتتىق ينستيتۋتىنىڭ عالىمدارى مالىمدەپ وتىر. ماماندار دەرەگىنشە, شىلىم شەگۋ سالدارىنان دەندەيتىن دەرتتەن جىل سايىن 6 ميلليون ادامنىڭ اجالى جەتەدى. ەندى الەم ەلدەرى بىرلەسە وتىرىپ, وسى قاسىرەتتىڭ الدىن الماسا, قۇرباندار قاراسى قالىڭداي بەرەرى داۋسىز.
جىل سايىن تەمەكى تارتىپ, ءتۇرلى اۋرۋ ساتىپ العان 6 ميلليون ادام دەرتىنە شيپا دارىماي, كوز جۇمادى. جامان ايتپاي, جاقسى جوق. ماماندار 13 جىلدان كەيىن وكپەسىن ۋلاپ, ومىردەن وزاتىندار سانى ارتۋى مۇمكىن دەپ دابىل قاعىپ وتىر. بۇدان باسقا, الەم ەكونوميكاسىنا شىلىم شەگۋدەن 1 تريلليون دوللاردان استام شىعىن كەلەدى. ياعني ەم-دومعا قىرۋار قارجى جۇمسالىپ, ەڭبەك ونىمدىلىگى قاتتى قۇلدىرايدى.
"2030 جىلعا قاراي تەمەكى تارتىپ, باقيلىق بولعاندار بۇگىنگى كۇنى 6 ميلليوننان 8 ميلليون ادامعا جەتۋى مۇمكىن. ونىڭ ۇستىنە, وسىنداي ءولىم-ءجىتىمنىڭ 80%-ى تابىسى تومەن جانە ورتاشا دەڭگەيدەگى ەلدەردىڭ ۇلەسىندە," .- دەيدى دۇنيەجۇزىلىك دەنساۋلىق ساقتاۋ ۇيىمىنىڭ مامانى دجەرەمي پول.
ۇيىمنىڭ ەسەبىندە تىڭ دەرەكتەر كەلتىرىلگەن. قازىر الەم حالقىنىڭ 21%-ى 15 جاستان اسقاندار. بۇل ءبىر ميللياردتان كوپ. شامامەن ەرلەردىڭ 35%-ى, قىز-كەلىنشەكتەردىڭ 6%-ى شىلىمعا قۇمار. ونىڭ ىشىندە وسى 25%-ى كەدەيشىلىك قامىتىن كيگەندەر. سوندىقتان شىلىم شەگۋمەن كۇرەسۋ ءۇشىن سەبەپ جەتكىلىكتى. «بۇل مايدان ەكونوميكاعا اۋىرتپالىق سالادى» دەگەن بيلىكتىڭ ءۋاجى شىندىققا جاناسپايدى.
"كوپتەگەن ەلدىڭ بيلىگىندە تەمەكى تارتۋعا قارسى كۇرەس ەكونوميكاعا تەرىس اسەر ەتەدى دەگەن قورقىنىش بار. بىراق بۇل ۇرەيگە بوي الدىرۋعا ەش دالەل جوق. عىلىم ارەكەتكە كوشۋ كەرەك دەپ ناقتى باعىت-باعدار بەرىپ تۇر. سوندىقتان ءبارى ساياسي ەرىك-جىگەرگە كەلىپ تىرەلەدى. الايدا قۇزىرلى ورگاندار بۇل تۇرعىدا بەلسەندىلىك تانىتپاي وتىر. راسىندا تەمەكى ونىمدەرىنە سالىق كولەمىن ارتتىرعان ەلدەر ادامداردىڭ ءومىرىن ساقتاۋمەن بىرگە ەسەپسىز تابىسقا كەنەلەر ەدى," - دەيدى دجەرەمي پول.
مامانداردىڭ جاعىمدى جاڭالىقتارى دا جوق ەمەس. زەرتتەۋ بويىنشا تەمەكى تارتۋ قازىر ءساندى ءۇردىس بولۋدان قالىپ بارادى. جالپى جىل سايىن كوك ءتۇتىندى قۇشىرلانا سورىپ, سوڭىندا سورلايتىندار سانى ازايىپ جاتىر. بىراق ءبارىبىر الەمدەگى دەموگرافيا وسكەن سايىن جان باسىنا شاققانداعى شىلىمقورلار قاتارى دا ارتىپ كەلەدى.