بۇرناعى كۇنى اقش-تىڭ نيۋ-يورك قالاسىندا وتكەن بىرىككەن ۇلتتار ۇيىمى قاۋىپسىزدىك كەڭەسىنىڭ بيىلعى العاشقى وتىرىسىنا كەڭەستىڭ جاڭا مۇشەسى رەتىندە قازاقستان دا قاتىستى. مينيسترلەر دەڭگەيىندە وتكىزىلگەن كوپشىلىك وتىرىسىندا «قاقتىعىستاردىڭ الدىن الۋ جانە بەيبىتشىلىكتى ساقتاۋ» تاقىرىبىندا اشىق پىكىرتالاس ءوربىدى. وندا ەلىمىزدىڭ سىرتقى ىستەر ءمينيسترى قايرات ءابدىراحمانوۆ قازاقستاننىڭ 2017-2018 جىلدارداعى بۇۇ قاۋىپسىزدىك كەڭەسىنىڭ مۇشەسى رەتىندەگى جۇمىسىنىڭ نەگىزگى ساياسي باسىمدىقتارىن قامتيتىن مەملەكەت باسشىسىنىڭ ساياسي ۇندەۋىن جاريا ەتكەنى ءمالىم.
وسىعان بايلانىستى كەشە ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا سىرتقى ىستەر ءمينيسترىنىڭ ورىنباسارى ەرجان اشىقباەۆ ۇندەۋدە ايتىلعان نەگىزگى ماسەلەلەرگە توقتالدى. ونىڭ ايتۋىنشا, ەلىمىزدىڭ تەڭگەرىمدى سىرتقى ساياساتى, بارلىق ەلدەرمەن, ونىڭ ىشىندە يادرولىق بەستىكپەن ارىپتەستىك قارىم-قاتىناستارى جانە مەملەكەت باسشىسىنىڭ ءتيىمدى بىتىمگەرشىلىك پەن دانەكەرلىك باستامالارى ەسكەرىلە وتىرىپ, قازاقستان ورتالىق ازيادان بۇۇ قاۋىپسىزدىك كەڭەسىنە سايلانعان تۇڭعىش مەملەكەت بولىپ وتىر. كەڭەستىڭ باسقا مۇشە مەملەكەتتەرى قازاقستاننىڭ بۇل ورگانداعى الەۋەتتى رولىنە قيسىندى بولجامدار جاساپ, جوعارى قىزىعۋشىلىق ءبىلدىردى.
سىرتقى ىستەر ءمينيسترىنىڭ ورىنباسارى ەرجان اشىقباەۆ ەلباسى ۇندەۋىندە قازاقستاننىڭ كەڭەس شەڭبەرىندە اتقاراتىن جۇمىسىنىڭ نەگىزى بولاتىن جەتى باسىم باعىت كورسەتىلگەنىن ايتىپ بەردى.
«ءبىرىنشى باسىم باعىت – يادرولىق قارۋدان ازات الەمگە قول جەتكىزۋ. ەكىنشىسى – عالامدىق جانە وڭىرلىك اۋقىمداردا اسكەري تەكەتىرەس دەڭگەيىن تومەندەتۋ ارقىلى عالامدىق سوعىس قاۋپىنىڭ الدىن الۋ جانە ول قاۋىپتى مۇلدەم جويۋ. ءۇشىنشى باسىمدىق – ورتالىق ازيادا وڭىرلىك بەيبىتشىلىك, قاۋىپسىزدىك, ارىپتەستىك پەن دامۋ ايماعىنىڭ مودەلىن قۇرۋ. ءتورتىنشى باسىمدىق حالىقارالىق تەرروريزم جانە ەكسترەميزممەن كۇرەسكە بەرىلگەن. بەسىنشىسى – افريكا قۇرلىعىندا بەيبىتشىلىكتى قالپىنا كەلتىرۋ ماسەلەسى. التىنشى باسىمدىق سوعىس پەن قاقتىعىستاردىڭ الدىن الۋ, ادام قۇقىقتارىن قورعاۋ, ورنىقتى دامۋ ماقساتتارىن جۇزەگە اسىرۋ, كليماتتىڭ وزگەرۋىمەن كۇرەسۋ بويىنشا بىرلەسكەن شارالار قولدانۋدى قاراستىرادى. جەتىنشى باسىم باعىت – ەۋروپا مەن امەريكا, ازيا مەن افريكانىڭ بارلىق وڭىرلىك ۇجىمدىق قاۋىپسىزدىك ۇيىمدارىنىڭ اراسىندا ارىپتەستىكتى كەڭەيتۋ», – دەپ اتاپ ءوتتى ە.اشىقباەۆ.
ءمينيستردىڭ ورىنباسارى ەلىمىز يادرولىق قارۋسىزدانۋدىڭ بەلسەندى جاقتاۋشىسى ەكەنىن, 2015 جىلى بۇۇ باس اسسامبلەياسىنىڭ سەسسياسىندا ەلباسى نۇرسۇلتان نازارباەۆ 2045 جىلى بۇۇ-نىڭ 100 جىلدىق مەرەيتويى قارساڭىندا يادرولىق قارۋدان ازات الەمگە قول جەتكىزۋ تۋرالى ۇسىنىس بىلدىرگەنىن ەسكە سالدى.
«قازاقستان جاپونيامەن قاتار يادرولىق سىناقتارعا جاپپاي تىيىم سالۋ ۇيىمىنىڭ تەڭ توراعاسى بولىپ تابىلادى. ماگاتە-نىڭ شەشىمىمەن ەلىمىز اۋماعىندا تومەن بايىتىلعان يادرولىق وتىن بانكى قۇرىلدى. ءبىز قاۋىپسىزدىك كەڭەسىنىڭ جاپپاي قىرىپ-جويۋ قارۋدى تاراتپاۋ رەجىمىن كۇشەيتۋ جونىندەگى 1540-شى قارارىنىڭ مۇلتىكسىز ورىندالۋىنا كومەكتەسەتىن بولامىز. قازاقستان يراننىڭ يادرولىق باعدارلاماسى توڭىرەگىندەگى ماسەلەلەردى رەتتەۋگە ۇلەس قوستى جانە دە وسىعان ۇقساس جاعدايلار مەن داعدارىستاردا دا قولداۋ كورسەتۋگە دايىن. كورەي تۇبەگىندەگى يادرولىق قارۋ ماسەلەسى بويىنشا جەدەل ءارى كونسترۋكتيۆتى شەشىم قابىلداۋ اسا ماڭىزدى مىندەت بولىپ تابىلادى», – دەپ اتاپ ءوتتى ە. اشىقباەۆ.
ونىڭ ايتۋىنشا, الەمنىڭ بەيبىتشىلىك سۇيگىش بولىگى عالامدىق سوعىس قاۋپىنىڭ الدىن الۋ ماسەلەسىندە قازاقستان باسشىسىنىڭ «الەم. ءححى عاسىر» مانيفەسىندە اتاپ وتىلگەن «مەملەكەتارالىق پروبلەمالاردى رەتتەۋ قۇرالى رەتىندە سوعىستان باس تارتىپ, بەيبىتشىلىككە قول جەتكىزۋ XXI عاسىردا ادامزاتتى امان ساقتاۋدىڭ نەگىزگى امالى بولىپ تابىلادى», دەگەن پىكىرىنە سۇيەنەدى.
ايدار ورىسباەۆ,
«ەگەمەن قازاقستان»