جاپون برەندى سانالاتىن Miniso جىلدىڭ العاشقى ايىندا الماتىدا فرانشيزا (فر. franchise – جەڭىلدىك) بويىنشا ەكى ءدۇكەن اشتى.
الدىمەن Miniso اتاۋى تۋرالى بىرەر ءسوز. Miniso – جاپون دۇكەندەرىنىڭ جەلىسى, الەمدىك ريتەيلەر, ياعني كەڭ سپەكترلى ءبولشەك ساۋدا جاساۋعا بەيىمدەلگەن نىسان. كۇنشىعىس ەلىندەگى مۇنداي ساۋدا ورتالىقتارىندا ازىق-ت ۇلىكتەن باستاپ كوسمەتيكا, تۇرمىستىق حيميا, ىدىس-اياق, تۇرمىستىق تەحنيكا مەن ەلەكترونيكاعا دەيىن تالعاماي ساتىلا بەرەدى. الماتىدا العاش اشىلعان بۇل ەكى دۇكەندە بەلگىلى سەبەپتەرگە بايلانىستى تەك ازىق-ت ۇلىك قانا ساتىلمايدى. قالعانىنىڭ بارلىعى سورەلەرگە قويىلدى. جاپونيالىق دۇكەندەر جەلىسىنىڭ تاعى ءبىر باستى ەرەكشەلىگى – ساتىلاتىن بۇيىمداردىڭ ءاربىرىنىڭ باعاسى 900 تەڭگەدەن اسپايدى. ءبارى دە حالىق ءۇشىن, حالىقتىڭ يگىلىگى ءۇشىن. ەلدىڭ قۇلاعىن ەلەڭ ەتكىزگەن سۋداي جاڭا Miniso Kazakhstan ساۋدا-جايلارى الماتىداعى اتاقتى «اپورت» جانە Maxima ساۋدا-ويىن ساۋىق ورتالىقتارىنان ويىپ تۇرىپ ورىن الدى. قاڭتار ايىنىڭ سوڭىنا دەيىن ەلىمىزدىڭ باس قالاسى – استانانىڭ تۇرعىندارىنا قىزمەتىن كورسەتىپ ءۇلگەرەتىن جاپونيالىق Miniso ىلە-شالا رەسپۋبليكانىڭ 10 قالاسىندا وسىنداي ساۋدا نۇكتەلەرىن اشىپ, ەل بويىنشا كەڭىنەن قانات جايماق ويى بار.
الماتىعا قايتا ورالساق, بۇل كۇندەرى قالا تۇرعىندارىنىڭ ءتىلى شەتەلدىك اتاۋلارعا كىبىرتىكتەگەنىمەن, الەمدىك تانىمال كومپانيالاردىڭ ءمىنسىز ءارى جاڭا زامانعا ساي جايلى قىزمەتىنە بوي ۇيرەتىپ العانىن دا باسا ايتقىمىز كەلەدى. ولاي دەيتىنىمىز, ءدال قازىرگى تاڭدا ەلىمىزدىڭ بۇرىنعى استاناسىندا شەتەلدىك 14 مىڭنان استام كومپانيا جۇمىس ىستەيدى دەگەنگە بىرەۋ سەنەر, بىرەۋ سەنبەس. اقيقاتى سولاي. ول تانىمال فيرمالار الەمنىڭ 100 مەملەكەتىنەن كەلگەن. اتاۋلارىنا كوز بەن قۇلاق ۇيرەنگەننەن باسقالارىن ايتپاعاندا, Alstom, Siemens, LG Electronics, Coca-Cola Bottlers-ءتىڭ ءىزىن الا الماتىعا كەلگەن فرانشيزدىك Starbucks, McDonald’s, Ritz-Carlton كومپانيالارى قالا تۇرمىسىنا ءسىڭىپ الدى. تۇرعىندار دا جاتىرقاپ جاتقان جوق. ايگىلى Kempinski-مەن قاتار, الەم تانىعان Hilton جانە قارotel مەيمانحانالارى ءتىپتى تاياۋدا اسەم الاتاۋ بوكتەرىندە قوناق قابىلداۋعا ازىرلەنىپ جاتىر...
الداعى جىلدىڭ كوكجيەگىنەن نەمىس ريتەيلەرى, ياعني بولشەك ساۋدا شەبەرى OBI الماتىدا اسا اۋقىمدى العاشقى گيپەرماركەتىن اشۋدى كوزدەپ وتىر. ال فرانتسۋزدىق تۇرمىستىق قىزمەت ريتەيلەرى Leroy Merlin كومپانياسى تاياۋدا عانا وسى اۋماقتان بولاشاق مەكەن-جايىن انىقتاپ, جايلاسار ورنىن شەگەلەپ كەتتى. بىزبەن اڭگىمەسىندە الماتىنىڭ كاسىپكەرلىك پەن يندۋستريالىق-يننوۆاتسيالىق دامۋ باسقارماسى الىپ شاھاردىڭ قازىرگى كەزدە دۇنيە ءجۇزىنىڭ ساۋدا رىنوگىنداعى ازۋىن ايعا بىلەگەن تنك جانە CITIC, Evonic, Staay Food Group, Medical Union Pharmaceuticals, Veolia سياقتى الپاۋىت كومپانيالارىمەن كەلىسسوزدىڭ جۇرگىزىلىپ جاتقانىن العا تارتتى.
ەل تاۋەلسىزدىگىنىڭ بەسىگى سانالاتىن الماتى قالاسى تۇرعىندارىنىڭ بۇگىنگى قۋانىشى – Miniso Kazakhstan بولشەك ساۋدا دۇكەندەرىندەگى حالىققا كورسەتىلگەن قايناعان قىزمەت دەر ەدىك. Miniso-نىڭ دا الىپ قالانىڭ شىرايىن اشارىنا جۇرت سەنىپ ءجۇر. ويتكەنى, ول – قازاقستانعا كۇنشىعىس ەلىنەن جەتكەن سىي!
تالعات ءسۇيىنباي,
«ەگەمەن قازاقستان»
الماتى